Buulaiko Bakwenu Kwimukwashako
“Muntu umo wakonsha kushinda mukwabo uji bunke, pakuba bantu babiji kechi wakonsha kwibashinda ne.”—Musapwishi 4:12.
IGE tuji na bakwetu bakwitukwashako, ko kuba’mba kitupeelela bingi kushinda mulwanyi wetu nangwa ekalepotu byepi na bulume. Onkao mambo, inge mukeba kuleka kupeepa fwanka, mwafwainwa kwipuzha kisemi kyenu, balunda nenu nangwa bantu bakwabo bafwainwa kwimubuulako mashinda a kulekelamo kupeepa fwanka.
Mwafwainwa kwipuzhako mukwenu walekapo kala kupeepa fwanka kwimukwashako mambo aye wayuka mwa kubila kabiji ukemukwasha. Torben mwina Kilishitu wikala ku Denmark waambile’mba: “Bakwetu bankwashishe bingi kuleka kupeepa fwanka.” Abraham wikala ku India wanembele’mba: “Butemwe bwa kine bummwesha kisemi kyami ne bena Kilishitu bakwetu byankwashishe bingi kuleka kupeepa fwanka.” Pano bino, bukwasho bwa kisemi ne balunda netu kechi bo bonkatu bukebewa ne.
Mwanamulume wa jizhina ja Bhagwandas waambile’mba: “Napeepa fwanka pa myaka 27. Bino nafuukwilepo kuleka kupeepa fwanka mambo a bintu byo nafunjile mu Baibolo pa bintu byatama bifumamo. Nalangulukilepo kukepeshako kupeepa fwanka. Nalekele kupwanañananga na bakwetu mo twapeepelanga fwanka. Nakebele bantu bafwainwe kunkwashako kuleka kupeepa. Nangwa byonkabyo, bakankelwe kunkwasha. Juba jimo bufuku, nalombele kwi Yehoba Lesa kufuma panshi ya muchima wami kuba’mba ankwashe kuleka kupeepa fwanka. Kabiji Yehoba wankwashishe kuleka.
Kintu kikwabo kyanema kuba ke kwinengezhezha jimo ku makatazho a kulutwe. Ñanyi makatazho onkao? Mutwe walondelapo usakulumbulula ano makatazho.
[Kitenguluzha]
NANCHI MWAFWAINWA KWINGIJISHA MUCHI YE BAPA BAPEEPA FWANKA KULEKA NYI?
Muchi wa kukwasha bapeepa fwanka kuleka nabiji bwando babena kumwingijisha ku bantu bavula bingi. Kabiji bwaikala ke busulu bukatampe bingi. Saka mukyangye kufuukulapo kwingijisha muchi ye bapa bapeepa fwanka kuba’mba baleke, iipuzhai ano mepuzho:
Ñanyi buwame bujimo mu kwingijisha uno muchi? Michi yavula beyambapo kuba’mba ikwasha bingi muntu kuleka kupeepa fwanka mambo ikepeshako kilaka kikala na muntu kya fwanka. Pano bino, kukiji kwichochekapo pa buwame bwa uno muchi.
Makatazho ka ajimo mu kwingijisha ino muchi? Michi imo ilengela bantu kulevuma ku muchima, kukizhamo kwikala na bijikila ne kukebatu kwikujika. Yukai’mba uno muchi naye uletatu makatazho akwabo ku mubiji wa muntu. Onkao mambo, muntu yense wingijisha uno muchi ukakebangatu kumutoma pa kuba’mba omvwako bulongo.
Ñanyi mashinda akwabo a kwingijisha ajiko? Sawakya umo waambile kuba’mba bantu bavula bapeepa fwanka balekatu bene kwa kubula kwingijishapo ne muchi ne.