Ñanyi Kintu Kyafwainwa Kwimukwasha Kuleka Kupeepa Fwanka?
Buku umo waamba’mba “Lekai Kupeepa Fwanka Lonka Luno!” waamba’mba: “Kwibikako kuleka fwanka, kyo kintu kitanshi kyanema bingi kyuba bantu bapeepa fwanka.”
INGE mwakebesha kuleka kupeepa fwanka, ibikaiko bingi. Pano mwakonsha kuba byepi pa kuba’mba mwikileke? Langulukaipo bulongo pa bintu byawama byo mukamwenamo inge mwaleka kupeepa fwanka.
Kechi mukonaunanga mali ne. Inge mwapeepa tushiki twa fwanka twavula pa juba, ko kuba’mba mukataya mali avula bingi pa mwaka. Gyanu wa ku Nepal waambile’mba: “Natayile mali avula bingi kupota fwanka.”
Inge mwaleka kupeepa fwanka bwikalo bwenu bukawama bingi. Regina wa ku South Africa waambile’mba: “Bwikalo bwami bwawamine bingi byo nalekele kupeepa fwanka.” Inge bantu baleka kupeepa fwanka, bekala na bulume bwa kutompa kajo ne kubula kununkanga bwema bwa fwanka. Kabiji bekala na butuntulu bwa mubiji bwawama ne kumweka kipaale.
Butuntulu bwa mubiji bukawaminako. Kipamo kya U.S. Centers for Disease Control and Prevention kyaambile’mba: “Kuleka kupeepa fwanka mufuma bintu byawama bingi byavula ne kwikala na butuntulu bwa mubiji bwawama ku bonsetu banabalume ne banabakazhi ba mafumbi onsetu.”
Mukoobanga bintu byawama mu bwikalo bwenu. Henning wa ku Denmark waambile’mba: “Nalekele kupeepa fwanka mambo kechi nakebelenga fwanka kunonka buzha ne. Nakebelenga amiwa mwine kwikala na luusa pa mubiji wami.”
Kisemi kyenu ne balunda nenu bakamwenamo byawama. Kipamo kya American Cancer Society kyaambile’mba: “Kupeepa fwanka . . . Konauna butuntulu bwa mubiji bwa bantu baji pepi babena kubula kupeepa. . . . Bantu bavula babena kufwa pa mwaka pa mwaka na kikola kya kansa ne kikola kya muchima na mambo a bwishi bo bakabula ku bantu bapeepa fwanka.”
Mukatokesha Lesa ku muchima. “Anweba batemwe . . . twayai twitokeshe ku bubipisho bonse bwa mubiji.” (2 Kolinda 7:1) “Mulambule mibiji yenu kwikala . . . kyazhila, kyaitabilwa kwi Lesa.”—Loma 12:1.
Sylvia wikala ku Spain waambile’mba: “Byo nayukiletu’mba Lesa wakanya kwingijisha bintu bitamisha mubiji, ponkapotu nalekele kupeepa fwanka.”
Kwikalatu na muchima wa kukeba kuleka kupeepa fwanka kechi ko kukebewatu ne. Pa kuba’mba tuleke kupeepa fwanka, twafwainwa kukeba bukwasho ku bakwetu kuvwangakotu ne bisemi byetu ne balunda netu. Pano bakonsha kwitukwasha byepi?