BYAMBAPO BAIBOLO

Bakajilwa Bakajilwa

Nanchi Lesa watako muchima ku bantu bakajilwa nyi?

“Mwikale babula kutemwa mali, sekelainga mu bintu byonka byo muji nabyo, mambo Lesa walaya amba: “Kechi nkakusha nangwa kukulekelela ne.’”—Bahebelu 13:5.

LESA BYO AMWESHA KUBA’MBA WIBATA MUCHIMA Umvwe mupopweshi wa Yehoba Lesa waikala mu makatazho, Lesa ukamukwasha mu mashinda apusana pusana. Jishinda jimo ke bukwasho bufuma ku bena Kilishitu bakwetu.a Yakoba 1:27 waamba’mba: “Kupopwela Lesa kwatoka kabiji kwabula kubipa ku meso a Lesa wetu Tata ko ko kuno: kulama bulongo baana bakishale ne banabakazhi bafwilwa babena kumanama, ne kwifumyako ku biko bya pano pa ntanda.”

Bena Kilishitu batanshi bekwashanga. Kyakumwenako, kimye kyo baambile kuba’mba kukekala kipowe kya nzala mu Yudea, bena Kilishitu bajinga mu muzhi wa Antioka mu Silya bepaine “kutuma kajo ka kutuuka ku balongo baikelenga mu Yudea.” (Byubilo 11:28-30) Ne kyafuminemo, bena Kilishitu bakajilwe batambwijile bintu byo bakebelenga. Buno bupe bwa kufuma panshi ya muchima bwamwesheshe bena Kilishitu byo betemwa.—1 Yoano 3:18.

Muntu wakajilwa wafwainwa kuba byepi pa kuba’mba bintu bimuwamine?

“Amiwa ne Yehoba Lesa wenu, yenka wimufunjisha’mba mukamwenemo byawama.”—Isaya 48:17, 18.

LESA WITUKWASHA KUPICHILA MU MAMBO ANJI Bantu bavula batana kuba’mba mu Baibolo mo muji maana kabiji etukwasha kuyuka bya kuba na bintu. Byambo bya Mana 2:6, 7 byaamba amba: “Mambo Yehoba ye upana mana; mu kanwa kanji mo mufuma kuyuka ne milangwe; wibatujila baoloka mana a kishinka.” Umvwe bantu kebakebe ano maana ne kwiengijisha bakamwenamo.

Kyakumwenako, ano maana ebakwasha kuleka kwingijisha bizhima nangwa kukizhamo kutoma maalwa abyo byakonsha kubika bumi bwabo mu kizumba. (2 Kolinda 7:1) Kabiji ebakwasha kwikala bakishinka, bayuka mwakubila na bintu, kino kibalengela kwibaketekela ku bakulumpe bebatwezha nkito. Efisesa 4:28 waamba’mba: “Awa wiba ekileke, bino engile kyakosa, . . . kuba amba amwenemo byawama bya kupapo wakajilwa.”

Nanchi kujiko bintu bimwesha amba maana aji mu Baibolo akwasha bakajilwa nyi?

“Bintu byaoloka byuba muntu byo bimumwesha amba uji na maana.”—Mateo 11:19.

BINTU BYO BAAMBAPO MU KINO KIBABA BYA KINE Wilson, wikala mu kyalo kya Ghana wingila nkito ya pa kimyetu kicheche, moba anji a kwingila ajinga pepi na kupwa. Juba japeleleko ja kwingila kimye Wilson kyoaovwelenga motoka wa bakulumpe ba nkito, watainemo mali. Kapitao wamwambijile amba alame ano mali. Pano bino Wilson wakaine kwiba oa mali mambo wajinga Kamonyi wa kwa Yehoba. Wafuukwilepo kumutwajila mwine mwina mali. Mu kifulo kya kuleka kwingila pa joja juba, Wilson bamwambijile kutwajijila kwingila kikupu kabiji pa kupitapo moba bamubikile pa kifulo kikatampe.

Mu kyalo kya Europe, Géraldine naye bamupangile nkito mambo mukulumpe wanji wa nkito kechi watemenwe Bakamonyi ba kwa Yehoba ne. Bainanji ba uno mukulumpe wa nkito bamwambijile amba “watamisha bingi pa kupanga uno muntu mambo kechi ukatanapo muntu wa kishinka kabiji wingila bulongo nobe Kamonyi wa kwa Yehoba ne.” Ponkapo uno mukulumpe wa nkito waile na kumukeba ne kumubwezha pa nkito.

Sarah nsemi wamukazhi wikala mu kyalo kya South Africa, kimye kyo apichilenga mu makatazho, wimwenejile mwine butemwe bwa mubijile balongo mu kipwilo kupichila mu kumupa bya kuja ne bukwasho mu bya ñendelo. Kino kyalengejile baana banji kwamba’mba “Tuji na bansemi bavula mu kipwilo.”

Kuji byakumwenako byavula byo twakonsha kwambapo. Kino kituvululako byambo byo tutanga mu Byambo bya Mana 1:33 bya kuba’mba: “Pakuba awa uñumvwa amiwa ukekalatu bulongo.” Bino byambo bya kine.

[Tubyambo twa mushi]