Bibena Kumweka Mu Ntanda
Kwamba Pa Asia
Asia kyo kibunji muji bantu bavula bingi. Kyalo kya China ne kya India mo mwikala bantu bavula bingi kukila byalo bikwabo pano pa ntanda. Ñanyi makatazho abena kupitamo byalo bya mu Asia pa kufunjisha ne kuzhikijila bangikazhi babo?
Kufunda Kuzhikijila Baana
Kwesakana na byaambile bashayuka ba mizhilo mu China, baana bebamanyika bingi inge bansemi babo bakankalwa kwibafunjisha pa kwilaala saka bakiji banyike. Aba bemenako kafulumende mu bije bya mambo ku China baambile mambo 8,000 a bantu bakuna baana babacheche pa myaka ina yapitapo. Shayuka wa mizhilo umo pa sukulu mukatampe wa Beijing Normal University waambile: “Baana kechi baji na wa kwibazhikijilako ne, kabiji bakulumpe bakebesha bingi kulaala nabo. Kufunjisha baana pa kwilaala kwibazhikijila ku bantu bakeba kwibakuna.”
BYAMBA BAIBOLO: Bansemi ba maana bafunjisha baana babo bya kwizhikijila “ku muntu wamba byambo byaluwankana.”—Byambo bya Maana 2:1, 10-12.
Bantu Bafwa Panyuma ya Mvula wa Kinkunkwila
Kwesakana na byo bataana bishinka, baana babakazhi bafwa mu mwaka umo panyuma ya kinkunkwila mu Philippines bavula bingi kukila bafwa na kinkunkwila kine. Bintu bimo bilengela ke kushalatu kwa kubula nkito na mambo a kinkunkwila, mali akebewa pa kuba’mba bashimukulule mazubo aonaika, ne byo babanya bintu ku baana babakazhi babacheche, kubikapotu ne kukepa kwa bya kuja ne michi.
BYAMBA BAIBOLO: ‘Jai kajo kenu na boba bafwa nzala, letai bayanji ne boba babula mazubo mu nzubo yenu, vwikai muntu ye mwamona wabula bya kuvwala.’—Isaya 58:7.
Bakulumpe Babena Kwikujika mu Kyalo Kya South Korea
Mu mwaka wa 2011, bantu bavula bingi bekujikile mu kyalo kya South Korea bajinga na myaka 65 ne kuya peulu. Bamo bafunda bingi bamba’mba kilengela ke kubula kulama bulongo bakulumpe ne buyanji. Kukila pa kichika kya bakulumpe mu kyalo kya South Korea bayanda bingi. Ano moba bantu bachechetu mu south Korea balanguluka’mba baana bafwainwa kukwasha bansemi babo bakoma.
BYAMBA BAIBOLO: “Nemeka bashobe ne bainobe.”—Efisesa 6:2.