Muntu Wakijilepo mu Bulume

NANCHI wayukapo muntu umo wakijilemo kwikala na bulume bukatampe panopantanda nyi? Wajinga mutonyi Samisonyi. Yehoba ye wamupele bulume Samisonyi. Nangwatu Samisonyi saka akyangye kusemwa, Yehoba wabujile inanji amba: ‘Ukasema mwana wa mulume. Ukatatula kupokolola bena Isalela mu maboko a bena Filishitiya.’

Bena Filishitiya bajinga bantu batama bingi baikalanga mu Kenana. Bajinga na bantu bavula bingi ba kulwa nkondo, kabiji bakozhanga bingi bena Isalela. Samisonyi byo ailenga kwaikalanga bena Filishitiya, kwaishile bokwe mukatampe saka abuluma ko aji. Bino Samisonyi waipayile yewa bokwe kwa kubula kintu nangwa kimo mu kuboko kwanji ne. Kabiji waipayile ne bitota bya bantu batama bonka bena Filishitiya.

Palutwe kacheche Samisonyi wafwalamine mwanamukazhi wa jizhina ja Delila. Bakulumpe ba bena Filishitiya bamulayile Delila amba umo umo wa mwiabo ukamupa mashekele a siliva 1,100 umvwe wibabula kyalengejile Samisonyi kwikala na bobwa bulume. Delila wakebele kwikala na ano onse mali. Kechi wajinga mulunda wa kine wa kwa Samisonyi, nangwa wa bantu ba Lesa ne. Kepo atwajijile na kumusashijila Samisonyi amba amubule mwaikela bulume bwanji bukatampe.

Kyapeleleko Delila wakonsheshe kubujiwa kwi Samisonyi kwafumine bulume bwanji. Samisonyi waambile’mba: ‘Nsuki yami ikyangye kutendewapo ne. Kufuma munda ya bamama, Lesa wansajile kwikala wanji wa mwingilo utelwa’mba Munazili. Umvwe bantenda nsuki, bulume bwami busakufumamo mwi amiwa.’

Delila byo ayukile bino, wamulajikile Samisonyi tulo ponka pa maulu anji. Kepo aichile muntu amba amutende nsuki. Samisonyi byo abukile, bulume bwanji bwalupukile mwi aye. Bena Filishitiya baishile ne kumukwata. Bamulobwele meso anji onse abiji, ne kumwalula ke muzha wabo.

Juba jimo bena Filishitiya bajinga na kijiilo kikatampe kya kupopwela lesa wabo Dagona, kabiji bamuletele Samisonyi kufuma mu kaleya ne kutendeka kumwendeleka. Nsuki ya kwa Samisonyi saka yakoma kala jibiji. Samisonyi waambijile mwanyike wa mulume wamukwachilenga ku kuboko kwanji amba: ‘Ndeke nkwate ku mashiki akosesha nzubo.’ Kepo Samisonyi alombele kwi Yehoba amba amupe bulume, wabwela wakwata ku mashiki. Wabijikile amba: ‘Pano mfwe nabo bena Filishitiya.’ Ku kyokya kijiilo kya bena Filishitiya kwajinga bantu 3,000, kabiji Samisonyi washinjikile oa mashiki a nzubo ne kukunduka yakundukile ne kwipaya bano bantu bonse batamine.