Mfumu Mutanshi wa Bena Isalela Watwajilwe mu Buzha mu Babilona

Saulo ye mutanshi kwikala mfumu wa bena Isalela. Bino Yehoba wamufumishepo kabiji wasajile Davida kwikala mfumu ne kupinga pa kifulo kyanji. Tusakumona bintu byavula byamwekejile Davida. Byo akijinga mwanyike, walwile na kitonzhi, aye Goliata. Palutwe kacheche, wanyemene kwi Mfumu Saulo wajinga na kichima. Kabiji Abigaila walambile bingi wakanyishe Davida kuba kintu kya bumbulwamaana.

Kabiji tusakufunda bintu byavula bingi pa mwana wa kwa Davida, aye Solomone waswaine Davida ne kwikala mfumu wa bena Isalela. Bamfumu batanshi basatu ba bena Isalela bonse umo umo balamine au myaka 40, au myaka 40. Solomone byo afwile, bena Isalela baabene ne kwikala na bufumu bubiji, bumo ku kabeta ka ku buyeke kabiji bukwabo ku kabeta ka ku bulenge.

Bufumu bwa bisaka jikumi bwa ku kabeta ka ku buyeke bwaikele myaka 257 saka bukyangye konaunwa ku bena Asilya. Kabiji panyuma ya kupitapo myaka 133, bufumu bwa bisaka bibiji bwa ku kabeta ka ku bulenge nabo bwaonawinwe. Pa kino kimye, bena Isalela batwajilwe mu buzha ku Babilona. Onkao mambo, Kipungu kya BUNA kyaamba pa myaka 510 ya mu bwikalo bwa bantu mwamwekelenga bintu byavula byo twabujile kwimwena na meso etu ne.