Nanchi Bupopweshi Bonse Bufunjisha Bukinenyi?

1. Ñanyi mitundu imo yampopwelo iji mu Africa?

BANTU bavula mu Africa baitabizha’mba kyanema bingi kupopwela Lesa. Bino, bapusana mumpopwelo yabo. Bamo bamupopwela mubishimikwa bya mosque, bakwabo nabo kubipandawilo byakishakulu. Bamo nabo baya nakupopwela mumachechi. Bino mashinda ampopwelo asatu kechi o onka ajimotu mu Africa ne. Ba Mozelemu, baji namizhilo yabo nebisho byabo byavula. Bisho byamubupopweshi nabyo byaenda kupusana-pusana kwesakana nampunzha ijiko bobo bupopweshi. Mumachechi avula a Kilishitendomu, kafwamo lumvwañanone. Pano bino, machechi akatampe a Kilishitendomu kechi o onka ajimone, muji nemachechi akwabo avula mwaya Africa.

Bupopweshi Bwetu Bwafwainwa Kwimena Pabukine

2. (a) Kintuka javula kilengela bantu kwitabila mubupopweshi? (b) Bika bimwesha kuba’mba bupopweshi bwetu kechi busangajika Lesa ne?

² Mamboka bantu obapopwela mujishinda jobobilamo? Bantu bavula betabila mubupopweshi buyako bansemi yabo. Bintu byaubiwanga kala keene nabyo byalengela bupopweshi bwabantu lelo jino kuya mungi. Buku wa The Africans—A Triple Heritage waamba’mba: “Bupopweshi bwaba Mozelemu bwakumbana kukabeta kabuyeke bwakiselebwa kya Sahara namambo akushinda kwashinjile byalo byaba Mozelemu, . . . Bwina Kilishitu nabo bwakumbana kukabeta kabulenge bwakiselebwa kya Sahara mujonka jino jishinda. Bwina Kilishitu bwakumbene kukabeta kabulenge bwa Sahara kupichila mukwipaya bantu byonka byaubilenga bupopweshi bwa ba Mozelemu.” Nangwa byonkabyo, atweba bavula twitabila’mba bupopweshi bwetu bwaitabilwa na Lesa. Pano bino, bupopweshi kechi bwikala bwakine namambotu akuba’mba kokuya bansemi yetu nangwa mambo momwayanga bashakulu betune.

3-5. Ñanyi kyakumwenako kyakonsha kwitukwasha kuyuka’mba kechi bupopweshi bonse bufunjisha bukinene?

³ Nangwa kyakuba bupopweshi bonse bwamba’mba bufunjisha mizhilo yawama pamambo akwingijila Lesa, lwitabilo lwabo lwapusana. Bafunjisha bintu byavula bingi byapusana-pusana pe Lesa byoaji nebyoakeba kwiatweba. Akilangulukai pakino: Twambe namba mwatwela nkito kukampanyi kakatampe. Juba jitanshi jakutatula nkito, bemubula’mba mukulumpe wankito uji palivi. Pano mwaipuzha bamingilo basatu kuba’mba bemubule byomwafwainwa kuba. Wamwingilo mutanshi wimubula’mba mukulumpe wankito ukeba’mba mupyange mukishimikwa. Wabubiji wimubula’mba mwafwainwa kupenta kishimikwa. Wabusatu wimubula’mba mutwale makalata.

⁴ Kepo, mwabwela mwaipuzha bano bamingilo kuba’mba bemubule bimweka uno mukulumpe wankito. Mutanshi waamba’mba uno mukulumpe wankito walepa kimino, mwanyiketu kabiji washinta bingi. Wabubiji waamba’mba uno mukulumpe wankito mwipi, uji mumafumbi abukulumpe, kabiji uji bingi nalusa. Wabusatu wimubula’mba uno mukulumpe wankito kechi wamulumene—wamukazhi. Mwakonsha kuyuka’mba bano bonse bamingilo basatu kafwapo nangwa umo ubena kwamba kyakine. Umvwe mukeba kutwajijila nakwingila yoyo nkito yomwatwela katataka, mwakonsha kukeba kuyuka biji yewo mukulumpe wankito nekuyuka mingilo yomusakwingilanga.

⁵ Byobiji nebupopweshi. Mambo akuba’mba byambiwa pe Lesa byoaji byavula kabiji nebyoakeba kwiatweba, twafwainwa kumona kuba’mba jishinda jotupopwelamo jo jishinda jabukine. Pano bino twakonsha kumuyuka byepi Lesa?