Kitango 15
Twafwainwa Kwikala Ba Lusa
MISALULULO yoika?— Misalululo ke kushikwa muntu mambo a kuba’mba kampe wa mu mukoka ungi nangwa wamba mulaka ungi. Onkao mambo, misalululo ke kushikwa mukwenu saka ukyangye nangwa kumuyukatu ne.
Nanchi kyawama kushikwa mukwenu saka ukyangye nangwa kumuyuka nenyi?— Ine, misalululo yatama, kabiji kechi ko kwikala na lusa ne. Kechi twafwainwa kushikwa mukwetu mambotu a kuba’mba twapusana nanji ne.
Nanchi wayukapo muntu ye mwapusana nanji kikoba nangwa wamba mulaka ungi nyi?— Kampe wayukapo bantu bamo bo bakozha nangwa baji na kikola. Nanchi wibobila lusa ne kwibatemwa bo wapusana nabo nyi?—
Umvwe ke tumvwine Mufunjishi Wayukisha, aye Yesu Kilishitu, tukekala ba lusa ku bantu bonse. Kechi twafwainwa kusalulula na mambo a kyalo ko bafuma nangwa kikoba kyabo ne. Twafwainwa kwibobila lusa. Nangwa kya kuba bantu bavula kechi boba bino ne, luno ke lufunjisho lwafunjishe Yesu. Aki twaya twisambepo.
Muyudea wajinga na misalululo waishile kwi Yesu ne kumwipuzha’mba, ‘Nafwainwa kuba ka pa kuba’mba nkekale myaka ne myaka?’ Uno muntu wakebelenga’mba Yesu amwambile’mba twafwainwa kubilatu lusa bantu bamukoka umo nangwa kyalo. Mu kifulo kya kumukumbula, Yesu wamwipwizhe amba: ‘Muzhilo wa Lesa waamba’mba twafwainwa kuba ka?’
Awa muntu wakumbwile’mba: ‘Wafwainwa kutemwa Yehoba Lesa wobe na muchima wobe yense, kabiji wafwainwa kutemwa mukwenu byonka byo witemwa obe mwine.’ Yesu waambile’mba: ‘Mwakumbula bulongo. Ubainga byonkabyo kabiji mukekala na bumi bwa myaka.’
Pano bino, uno muntu kechi wakebelenga kwikala na lusa nangwa kutemwa bantu bo apusene nabo ne. Onkao mambo wakebelenga kwibingisha. Wamwipwizhe Yesu amba: “Nanchi mukwetu ye ñanyi?” Wakebelenga Yesu kwamba’mba: “Bakwenu ke balunda nobe,” nangwa’mba “Bakwenu ke boba bamwekana byonka byo uji.” Pa kukumbula buno bwipuzho, Yesu washimikizhe jishimikila ja Muyudea ne mwina Samaliya. Watendekele kushimikizha bino.
Muntu umo wafuminenga ku Yelusalema kuya ku Yeliko. Wajinga Muyudea. Byo ayilenga mu jishinda, batupondo bamukwachile. Bamunakwile panshi ne kumwangata mali ne bivwalo. Bano batupondo bamupumine bingi, kabiji bamushile walaalatu sulubya nobe wafwa kunsa ya mukwakwa.
Papichiletu ka kimye kacheche, ñanga wa Lesa wasolomokele ponka. Wamumwene uno muntu ye bakozhezhe bingi. Umvwe wajinga obewa inge waubile byepi?— Ñanga wa Lesa wasezhezhe kwapela mukwakwa kaye ne kuya. Kechi waimene nangwa kwimanatu ne. Kechi wamukwashisheko ne.
Muntu mukwabo naye wapopwelanga Lesa wafikile ponka. Wajinga mwina Levi waingilanga pa nzubo ya Lesa mu Yelusalema. Nanchi waimene amba amukwasheko nyi?— Ine. Waubiletu byonka byaubile ñanga wa Lesa.
Kyapeleleko, kwaishile mwina Samaliya. Nanchi wamumona awa muntu wafika pachimpukila jishinda nyi?— Wamwene Muyudea ye bakozhezhe bingi saka alaala panshi. Pano bino bena Samaliya ne Bayudea kechi baumvwañananga ne. (Yoano 4:9) Nanchi uno mwina Samaliya wamushile uno muntu kwakubula kumukwasha nyi? Nanchi waambile amba: ‘Nga mambo ka o nafwainwa kukwashisha uno Muyudea? Umvwe yami baji kukozha inge wankwasha nyi?’
Mwina Samaliya byo amwene awa muntu kasa alaala kunsa ya mukwakwa, wamubile lusa. Walangulukile’mba kechi kyawama kumusha uno muntu, efwile ne. Waikijile pa nyama wanji ne kuya kwajinga uno muntu kabiji watendekele ne kuwamisha pa bilonda byanji. Waichijilepo manyi ne binyu kuba’mba bilonda bipwe. Wabwela wakasapo ne kisapi.
Mwina Samaliya wabikile uno muntu ye bakozhezhe pa nyama wanji. Kabiji bayilenga bitende bitende bakafika ne ku nzubo ya bwenyi. Uno mwina Samaliya wapaine mali a kibamba mwakulaala uno muntu ne a kujilamo.
Yesu wabwelele waipuzha mwanamulume ye esambilenga nanji amba: ‘Ñanyi pa bano banabalume basatu ye walanguluka’mba wajinga muntu wawama?’ Nga obewa wakonsha kukumbula’mba ka? Nanchi ñanga wa Lesa nyi, inyi mwina Levi nangwa mwina Samaliya?—
Awa mwanamulume wakumbwile’mba: ‘Yenkawa waimene ne kukwasha awa muntu ye bakozhezhe, ye muntu wawama.’ Yesu waambile’mba: ‘Waamba bulongo. Nanchi yainga mukobenga byonkabyo.’—Luka 10:25-37.
Jino jishimikila jawama bingi, ke ibyo nenyi? Jitukwasha bingi kuyuka bakwetu. Kechi balunda netu bonkatu ne. Kabiji kechi bantu baji na kikoba byonka biji kyetu nangwa bamba mulaka ye twamba ne. Yesu witufunjishe kwikala ba lusa ku bantu bonse kechi na mambo a ko bafuma, byo bamwekana, nangwa mulaka ye bamba ne.
Byo biji ne Yehoba Lesa. Kechi uji na misalululo ne. Yesu waambile’mba, ‘Shenu wa mwiulu uselesha juba ku bantu batama ne bawama pamo. Kabiji unokesha mvula pa bantu bawama ne batama pamo.’ Onkao mambo, twafwainwa kwikala ba lusa ku bantu bonse byonka biji Lesa.—Mateo 5:44-48.
Umvwe wamona muntu wikozha, wafwainwa kuba byepi?— Ibyepi umvwe kya kuba awo muntu wafuma ku kyalo kingi nangwa wa mutundu ungi? Naye mukwenu, wafwainwa kumukwasha. Umvwe wamona’mba kechi wakonsha kumukwasha ne mambo wakikepa, wafwainwa kwambila mukulumpe amba akukwasheko. Nangwa wafwainwa kwita bakapokola nangwa mufunjishi. Kuba bino ko kwikala na lusa, byonka byaubile mwina Samaliya.
Mufunjishi Wayukisha ukeba’mba twikale ba lusa. Ukeba amba tukwashenga bantu bonse, kechi na mambo a byo baji ne. O ene mambo o ashimikizhizhe jishimikila ja mwina Samaliya wa lusa.
Pa luno lufunjisho lwa kwikala na lusa ku bantu bonse kechi na mambo a mutundu nangwa kyalo ko bafuma ne, tanga Byambo bya Mana 19:22; Byubilo 10:34, 35; ne 17:26.
[Bipikichala pa jipa 83]
Twafwainwa kuba byepi na bantu bo twapusana nabo kikoba?
[Bipikichala pa jipa 84, 85]
Mambo ka mwina Samaliya o aikejile muntu wawama?
[Kipikichala pa jipa 86]
Wakonsha kwikala byepi muntu wawama?