LUFUNJISHO 10
Kupwila na Bakamonyi ba kwa Yehoba Kwafwainwa Kwimukwasha Byepi?
Nanchi mwakipwilapo kala na Bakamonyi ba kwa Yehoba nyi? Inge mukyangye, kyakonsha kwimulengela kubula kukasuluka kutanwako kimye kitanshi. Mwakonsha kutendeka kwiipuzha’mba: ‘Ñanyi bintu byubiwa pa kuno kupwila? Nanchi kuno kupwila kwanemena ka? Mambo ka o nafwainwa kutaainwako?’ Mu uno mutwe, musakufunda kupwila pamo na bantu ba Lesa byo kwafwainwa kwimukwasha kwikala mulunda ne Lesa ne kwimukwashatu mu mashinda akwabo.
1. Mambo ka Bakamonyi ba kwa Yehoba o bapwijila pamo?
Monai byaamba Baibolo pa ene mambo o kyawamina kupwila pamo na bakwetu. Baibolo waamba’mba: “Nkamutota Yehoba mu kipwilo kikatampe.” (Salamo 26:12) Byonkatu byaubanga bena Kilishitu batanshi, Bakamonyi ba kwa Yehoba nabo batemwa bingi kupwila pamo na bakwabo. Ntanda yonse, Bakamonyi ba kwa Yehoba bapwila kimye kyonse na kupopwela Lesa. Pa kutendeka kupwila, bemba nyimbo ya kutota Lesa ne kulomba kwi aye. Kabiji pa mwaka pa mwaka bekala na kubuñana ne kushonkena kutanwa bantu bavula.
2. Ñanyi bintu byo mukafunda inge mwataanwa ku kupwila kwetu?
Pa kupwila Mambo a Lesa bealumbulula bulongo kwi atweba. (Tangai Nehemiya 8:8.) Inge mwataanwa ku kupwila kwetu, mukafunda biji Yehoba ne byubilo byanji byawama. Byo mukemwena anweba bene byo emutemwa, mukekala mulunda nanji. Kabiji mukafunda pe Yehoba byo afwainwa kwimukwasha kwikala bwikalo bwawama.—Isaya 48:17, 18.
3. Ñanyi bintu byawama byo mukamwenamo pa kupwijila pamo na balongo ne banyenga ku kupwila kwetu?
Yehoba witukambizha atweba kuba’mba “twitenga muchima atwe bene na bene kuba’mba twitundaikenga kwitemwa atwe bene na bene ne kuba mingilo yawama, kabiji kange tuleke kupwila pamo” ne. (Bahebelu 10:24, 25) Ku kupwila kwetu, mukataanako bantu betemwa bene na bene kabiji bajitu byonka byo muji anweba, nabo bakeba bingi kufunda pe Lesa. Mukeumvwina majashi o bamba a mu Baibolo ne byo bakumbula mikumbu itundaika. (Tangai Loma 1:11, 12.) Kabiji mukafunjilako ku bakwenu bintu bibena kwibakwasha kuyuka mwa kupwishisha makatazho bulongo. Abino byo bishinka bimo byalengela Yehoba kwitubuula kupwilanga pamo kimye kyonse.
FUNJILAIPO BIKWABO
Yukai bintu byubiwa pa kupwila kwa Bakamonyi ba kwa Yehoba. Kabiji yukai ne ene mambo o mwafwainwa kwibikako kutanwanga ku kuno kupwila.
4. Bipwila Bakamonyi ba kwa Yehoba
Mu myaka itanshi, bena Kilishitu bapwilanga pamo na kupopwela Yehoba. (Loma 16:3-5) Tangai Kolose 3:16, ne kwisamba buno bwipuzho:
Mambo ka bena Kilishitu batanshi o bapwijilanga pamo?
Byonkatu byaubanga bena Kilishitu batanshi, Bakamonyi ba kwa Yehoba nabo lelo jino bapwila pamo mu Mazubo abo a Bufumu. Pa kuba’mba muyuke byubiwa ku kupwila kwabo, Tambai VIDYO. Inge mwapwisha kutamba uno vidyo, talai pa kipikichala kyamwesha bantu babena kupwila kabiji mwisambe ano mepuzho.
Ñanyi kwipasha kuji pa byubiwa pa Nzubo ya Bufumu ne byo mwatanga pa Kolose 3:16?
Mu vidyo ye mwatamba nangwa pa kipikichala, abya mwamonapo bintu bikwabo byubiwa pa kupwila byo mwatemwa nyi?
Tangai 2 Kolinda 9:7, ne kwisamba buno bwipuzho:
Mambo ka Bakamonyi ba kwa Yehoba o babujila kwambila bantu kupana mali pa kutanwa ku kupwila kwabo?
Anweba ne wimufunjisha Baibolo, isambai pa byo musakufunda pa kupwila uno mulungu.
Kwepi kupwila ko mwatemwa bingi?
Bishinka bikwabo
Pa jw.org, mukataanapo kimye ne mpunzha kwikela kupwila.
Ku kupwila kwetu kwikala majashi, kutamba mavidyo ne kufunda bya kusapwila ne bya kufunjisha bantu Baibolo. Kupwila kutendeka na lwimbo ne kupwa na lulombelo
Kwikala majashi amo bepuzha baiya na kupwila kukumbulapo
Muntu yense wakasuluka kwiya na kupwila nabiji bisemi, bakatanda, bazhike, bakulumpe ne banyike
Ku kupwila kwetu kechi tulipilisha bantu mali ne. Bakamonyi ba kwa Yehoba kechi balipilisha bantu mali pa kutanwa ku kupwila kabiji kechi bapishamo nsanyi amba muntu abikemo mali ne
5. Mwafwainwa kwibikako pa kuba’mba mutaanwenga ku kupwila
Funjilaiko byaubanga bashanji ne bainanji Yesu. Kufuma ku Nazala kuya ku Yelusalema baendangapo moba asatu pa kuba’mba bataanwe ku kupwila kwa pa mwaka pa mwaka. Kabiji bapitanga mu binkunenke ne mu mitumba. Tangai Luka 2:39-42, ne kwisamba ano mepuzho:
Nanchi mwalanguluka’mba kyapeelele kuya ku Yelusalema nyi?
Mambo ka o mwafwainwa kwibikako kutanwanga ku kupwila?
Mwalanguluka’mba kupwila pamo na kupopwela Yehoba kwanema nyi? Mambo ka o mwakumbwila byobyo?
Baibolo waamba’mba kupwila pamo na kupopwela Yehoba kwanema bingi. Tangai Bahebelu 10:24, 25, ne kwisamba buno bwipuzho:
Mambo ka o twafwainwa kutanwanga ku kupwila kimye kyonse?
BANTU BAMO BAMBA’MBA: “Kechi mwafwainwa kupwilanga pamo na bakwenu ne. Kyawama kufundangatu Baibolo bunke pa nzubo kwapwa.”
Ñanyi kinembelo nangwa kyamwekele kiji mu Baibolo kimwesha bintu bikeba Yehoba?
ÑANYI BISHINKA BYO MWAFUNDA?
Kutanwa ku kupwila kukemukwasha kuyuka byavula pe Yehoba ne kukakosesha bulunda bwenu ne aye. Kabiji mukamwingijilanga pamo na bantu banji.
Mepuzho a Kupitulukamo
Mambo ka Yehoba o etukambizha kupwilanga pamo?
Ñanyi bintu byo mukafunda pa kupwila na Bakamonyi ba kwa Yehoba?
Nanchi mwalanguluka’mba kutanwa ku kupwila kwakonsha kwimukwasha nyi? Mu ñanyi mashinda?
KEBAI BIKWABO BIKWABO
Mwafwainwa kuba byepi inge kechi mukasuluka kutanwa ku kupwila ne? Monai mwanamulume umo wabulanga kukasuluka kutanwa ku kupwila byo aubile pa kuba’mba abule kushalanga ku kupwila.
Monai nsongwalume umo watemenwe kupwila ne byo aubile pa kuba’mba abule kushalanga ku kupwila.
Monai bintu byaambapo bantu bamo pa kutanwa ku kupwila.
“Mambo ka a Kuyila na Kupwila pa Nzubo ya Bufumu?” (Kibaaba kiji pa jw.org)
Monai mwanamulume umo wajinga mu jibumba ja bambanzhi byo apimpwile byubilo byanji na mambo a kutanwa ku kupwila kwa Bakamonyi ba kwa Yehoba.