August

Mu uno Salamo muji bishinka bibiji byanema: (1) Bantu baoloka bapita mu makatazho. (2) Yehoba witupokolola ku makatazho etu onse. Yehoba witupokolola byepi? Jishinda jimo jo obilamo bino ke kwitukwasha kuyuka mwakubila na makatazho o tupitamo mu ino ntanda yatama. Nangwa kya kuba’mba Yehoba witulaya’mba tukamwingijilanga na lusekelo, kechi kilumbulula’mba tukekalanga bwikalo bwa kubula kupita mu makatazho ne. (Isa. 66:14) Witutundaika kuketekela mu bwikalo bwa kulutwe mo tukekala myaka ne myaka byonka byo akebelenga. (2 Ko. 4:16-18) Luno witukwasha kutwajijila kumwingijila pa juba pa juba. (Jila. 3:22-24) Twakonsha kufunjilako ku bapopweshi ba Yehoba ba kishinka banembwa mu Baibolo ne ba mu ano moba? Twakonsha kupita mu makatazho a kubula kuketekela. Bino, inge twaketekela mwi Yehoba ukatwajijila kwitukwasha.​—Sala. 55:22. w23.04 14-15 ¶3-4

Tufunjilako bintu byavula bingi ku byaubile Yosefwa ne Maliya. Bakookejile bakulumpe balama kyalo nangwa kya kuba kyakatezhe kuba bino. (Luka 2:1-6) Maliya byo ajinga na jimi ja bañondo batanu na bana, kafulumende wakebelenga’mba Yosefwa ne Maliya bobe kintu kyakatezhe bingi. Mfumu wa mu Loma aye Augusatusa, wakambizhe bantu bonse kuba’mba babwele kwabo na kunembesha. Yosefwa ne Maliya baendele kuya ku Betelema museke walepele bingi makilomita 150 kabiji mu mukwakwa mwajinga bingi mikolo. Luno lwendo lwakatezhe bingi kwi Maliya. Yosefwa waakaminwe bingi pe Maliya ne mwana wakijinga munda mambo walangulukilenga’mba wakonsha kupapila mu jishinda. Kabiji mwana wajinga munda wajinga Mesiasa ye bapembelejilenga. Nanchi kino kibalengejile kubula kukookela muzhilo walengele kafulumende nyi? Abino byonse kechi byalengejile Yosefwa ne Maliya kubula kukookela uno muzhilo ne. Yehoba wibapesheshe mambo bakookejile. Bafikiletu bulongo mu Betelema kabiji Maliya wapapile mwana wajingatu bulongo. Kino kyafikizhe bungauzhi bwa mu Baibolo.​—Mika 5:2. w23.10 8 ¶9; 9 ¶11-12

Ñanyi bintu byo mwakonsha kuba inge mumvwa bingi moyo kukumbulapo? Kyafwainwa kwimukwasha ke kunengezha bulongo. (Maana 21:5) Inge mwayuka bulongo biji mu mutwe ye mubena kufundapo kyakonsha kwimupeelela bingi kukumbulapo. Kabiji mwakonsha kukumbulatu mukumbu mwipi. (Maana. 15:23; 17:27) Mukumbu mwipi ukepeshako moyo. Kukumbulapo mu byambo byenu bicheche kumwesha’mba mwanengezha bulongo kabiji mwaumvwisha bishinka biji mu yewo mutwe. Ñanyi bintu byo mwakonsha kuba inge mwaeseka ano mashinda onse bino mwatwajijilatu na kumvwa moyo wa kukumbulapo jibiji nangwa javula? Yukai’mba Yehoba usanta bingi pa byo mwibikako kukeba kukumbulapo. (Luka 21:1-4) Kabiji Yehoba kechi ukeba atweba kuba kintu kyo ayuka’mba twakonsha kukankalwa kwikyuba ne. (Fili. 4:5) Monaipo kintu kimo kyo mwafwainwa kuba. Lombai pa kuba’mba mwikale na kyubilo kya kutekanya. Kintu kitanshi kyo mwafwainwa kuba ke kukumbulapo jimo mukumbu mwipi. w23.04 21 ¶6-8

Mutumwa Paulo witwesakanya ku bashilikale bajimuka kabiji bavwala bya nkondo. Bantu baketekela’mba bashilikale bafwainwa kwinengezhezha jimo kimye kyonse kulwa nkondo. Ne atweba twafwainwa kwinengezhezha jimo juba ja Yehoba saka jikyangye kwiya ne kuvwala pa kyaji kyela kya lwitabilo ne butemwe ne kuvwala ku mutwe kampompo ka luketekelo. Kyela kya pa kyaji kyazhikijilanga muchima wa mushilikale. Lwitabilo ne butemwe bizhikijila muchima wetu wa kifwanyikizho. Bino byubilo bitukwasha kutwajijila kwingijila Lesa ne kulondela Yesu. Lwitabilo lwitulengela kushiinwa’mba Yehoba uketufweta inge twatwajijila kumukeba na muchima wetu yense. (Hebe. 11:6) Lwitabilo luketulengela kutwajijila kwikala ba kishinka kwi Ntangi wetu Yesu, nangwatu kwitukwasha kuchinchika inge tubena kupita mu makatazho. Kufunda p bantu ba mu ano moba batwajijile kwikala ba kishinka nangwa kya kuba bebamanyikilenga nangwa kya kuba bajinga bayanji kuketukwasha kukosesha lwitabilo lwetu ne kuchinchika makatazho. Kabiji twakonsha kuchinuzhuka kutemwa mali ne kukebesha kwikala na bintu byavula inge twauba bintu byaubile bano bantu bapezhezheko bwikalo bwabo ne kutangizhako Bufumu patanshi. w23.06 10 ¶8-9

Kwikanya kulumbulula kubula kuba byatama. Kabiji kwikanya kukebewa pa kuba’mba tufikizhenga bikonkwanyi byetu kikatakata inge kikonkwanyi kyo twibikila kyakatazha nangwa inge kechi tuji na kizaku ne. Vulukainga’mba kwikanya ke kipangwa kya mupashi. Onkao mambo, lombainga kwi Yehoba kuba’mba emupe mupashi wanji wazhila kuba’mba emukwashe kwikala na kino kyubilo kyawama. (Luka 11:13; Nga. 5:22, 23) Kange mupembelelenga’mba kana bintu bikawame ne. Mu ino ntanda, bintu kechi bikawamapo ne. Inge ke tupembelele’mba kana bintu bikawame, kechi tukafikizha kikonkwanyi kyetu ne. Kizaku kyakonsha kupwa inge kya kuba kikonkwanyi kyetu kyakatazha kwikifikizha. Inge byo byo kiji kwi anweba, nanchi kechi mwakonsha kwabanya kikonkwanyi kyenu mu tubikonkwanyi tuchetuche nenyi? Inge mwibikila kikonkwanyi kya kwikalapo na kyubilo kimo kya bwina Kilishitu, mwakonsha kutendeka kwikimwesha mu tubintu tucheche. Inge mwibikila kikonkwanyi kya kutanga Baibolo, mwakonsha kulenga mutanchi wa kutangakotu byepelo bicheche. w23.05 29 ¶11-13

Mu ano moba akupelako, Yehoba ubena kwingijisha jibumba janji kwitupa mikambizho yafuma mu mambo a Lesa pa kuba’mba itutangijilenga byo tubena kwenda mu “Mukwakwa Wazhila.” (Isa. 35:8; 48:17; 60:17) Umvwe muntu waswa kufunda Baibolo twakonsha kwamba’mba watendeka kwenda mu “Mukwakwa Wazhila.” Bino bamo bendamotu pa kakimye kacheche ne kufumamo. Pakuba bakwabo batwajijilatu kwenda mu uno mukwakwa ne kufika ko babena kuya. Nanchi uno mukwakwa waya kwepi? Aba baji na luketekelo lwa kuya mwiulu, “Mukwakwa Wazhila” wibatangijila ku “paladisa wa Lesa” wa mwiulu. (Lum. 2:7) Ku boba baji na luketekelo lwa kwikala pano pa ntanda, Mukwakwa Wazhila wibatangijila ku bumi bwalumbuluka ku mpelo ya bukalama bwa kwa Kilishitu bwa myaka kiumbi kimo. Inge mubena kwenda mu uno mukwakwa lelo jino, kange mulangulukenga pa bintu byo mwasha ne. Kange muleke kwenda mu uno mukwakwa ne, kufikatu ne kimye kyo mukatwela mu ntanda ipya. w23.05 17 ¶15; 19 ¶16-18

Inge kemulanguluke pa bintu byonse bimubila Yehoba, mukakebanga kumusanchila kabiji kino kikemulengela kufuukulapo kwipana kwi Yehoba. (Sala. 116:12-14) Baibolo utela Yehoba amba ye Mpanyi wa “bya bupe byonse byawama ne byalumbuluka.” (Yako. 1:17) Bupe bwakila bonse ke kitapisho kya Mwananji, aye Yesu. Akilangulukai pa kino. Bukuzhi bwimulengela kwikala na bulunda bwakosa ne Yehoba. Kabiji bwimulengela kwikala na luketekelo lwa kukekala myaka ne myaka. (1 Yoa. 4:9, 10) Kwipana kwi Yehoba ke jishinda jawama bingi jo mwafwainwa kumwesheshamo amba musanta pa buno butemwe bukatampe bwitumwesha Yehoba kuvwangakotu ne bintu bikwabo byawama bitubila Yehoba.​—Mpitu. 16:17; 2 Ko. 5:15. w24.03 5 ¶8

Ano moba inge twamona bantu bavula baji na byubilo byatama, tumvwatu byonka byaumvwine Lota. Lota “wajinga na bulanda bukatampe na mambo a byubilo bya kwizozola bya bantu ba mizhilulwila,” mambo wayukile’mba Shetu wa mwiulu washikwa byubilo byatama. (2 Pe. 2:7, 8) Kwakamwa Lesa ne kumutemwa ko kwalengejile Lota kushikwa byubilo byatama byajinga na bantu pa kyokya kimye. Ne atweba tuji mu ntanda muji bantu babula kunemeka mizhilo ya Yehoba. Nangwa byonkabyo, twakonsha kutwajijila kwikala na byubilo byawama inge twatwajijila kutemwa Lesa wetu ne kwikala na moyo wa kumwakamwa. Yehoba witukwasha kuba bino, kwingijisha lutundaiko luji mu buku wa Byambo bya Maana. Bena Kilishitu bonse banabalume ne banabakazhi, banyike ne bakulumpe bakonsha kumwenamo mu kulanguluka pa maana aji mu uno buku. Inge twaikala na moyo wa kwakamwa Yehoba, kechi tukekala na balunda boba bintu byatama ne. w23.06 20 ¶1-2; 21 ¶5

Anweba bamo kampe ba mu kisemi kyenu bemwimena ku ntundwa nangwa kampe mwasankilapo bya ku mubiji na mambo a kutangizhako bufumu patanshi. (Mat. 6:33) Inge byo byo kiji, yukai’mba Yehoba wayuka byonse byo mwauba pa kuba’mba mumwingijilenga. (Hebe. 6:10) Kyamweka ne anweba mwaswa bukine bwa byambo byaambile Yesu bya kuba’mba: “Kine nemwambila namba, kafwako washa nzubo, bakolojanji nangwa bankasanji ba balume, banyenga yanji, bainanji, bashanji, baana nangwa majimi na mambo a amiwa ne na mambo a mambo awama ukabula kutambula byavula kufika ku 100 mu kino kimye—mazubo, bakolojanji ba balume, bankasanji ba balume, banyenga yanji, bainanji, baana, ne majimi, ne kumanyikwa ne mu bwikalo bukeya bumi bwa myaka ne myaka ne.” (Mako 10:29, 30) Bintu byawama byo mwamwenamo byanema bingi kukila bintu byonse byo mwasankilapo.​—Sala. 37:4. w24.03 9 ¶5

Byo kwaishile kipowe kya nzala kikatampe ku bena Kilishitu baikalanga mu Yudea, balongo ne banyenga ba mu Antioka “bafuukwilepo kupana bintu byo bakonsheshe kupana, ne kutuma kajo ka kutuuka ku balongo baikelenga mu Yudea.” (Byu. 11:27-30) Bena Kilishitu bajinga mu Antioka bafuukwilepo kukwasha balongo ne banyenga bamanaminenga na mambo a kipowe kya nzala kikatampe nangwa kya kuba bajinga kwalepa. (1 Yoa. 3:17, 18) Lelo jino tubila balongo ne banyenga kifyele inge twayuka’mba babena kumanama na mambo a mvula wa kipupu kikatampe nangwa na mambo a makatazhotu akwabo. Tuba bino, inge twaipuzha bakulumpe mu kipwilo umvwe twafwainwa kukwashako mu mwingilo umo, twapanako mali a kutundaika mwingilo wa ntanda yonse nangwa kulombelako balongo ne banyenga baji mu lukatazho. Balongo ne banyenga yetu nabo bakeba kwibakwasha pa kuba’mba bakapuluke. Umvwe mfumu wetu aye Kilishitu Yesu akachibile bantu mambo, tukeba aketutaane tubena kumwesha kifyele ku bakwetu kabiji aketwambile’mba “swanai Bufumu.”​—Mat. 25:34-40. w23.07 4 ¶9-10; 6 ¶12

Yesu naye kechi waumijilenga pa kintu kimo ne. Yehoba wamutumine pano pa ntanda na kusapwila “ku mikooko yaeleka ya kisaka kya Isalela.” Bino Yesu byo asapwijilenga wamwesheshe’mba wakooka muchima. Kimye kimo, mwanamukazhi wabujile mwina Isalela wamusashijile kuba’mba abuke mwananji ye “bamanyikilenga bingi ku ndemona.” Yesu wamwesheshe kifyele ku uno mwanamukazhi byo amubijile kintu kyo akebelenga kabiji wabukile mwananji. (Mat. 15:21-28) Langulukai pa kintu kikwabo kyo aubile. Yesu kimye kyoatendekele mwingilo wanji, waambile’mba “yense unkana . . . , ne amiwa nkamukana.” (Mat. 10:33) Bino Petelo byo akaine Yesu pa bimye bisatu, aye kechi wamukaine ne. Yesu wayukile kuba’mba Petelo walapijile pa kyo aubile kabiji wajinga muntu wa kishinka. Yesu byo asangukile wamwekele kwi Petelo ne kumubuula’mba wamulekelako mambo kabiji wamutemwa bingi. (Luka 24:33, 34) Yehoba ne Yesu Kilishitu bonse babiji bakooka bingi muchima. Nga atweba? Yehoba ukeba atweba kukooka muchima. w23.07 21 ¶6-7

Mu uno mutwe twisamba pa bintu byakonsha kwitulengela kushiinwa’mba ino ntanda ikekala Paladisa. Pano ñanyi bintu byo twafwainwa kubuulako bakwetu pa kuba’mba nabo bashiinwe’mba kine kino kikamweka? Kitanshi, Yehoba mwine ye walaya. Buku wa Lumwekesho waamba’mba: “Awa waikele pa jitanda waambile’mba: ‘Tala! Mbena kulenga bintu byonse kwikala ke bipya.’” Ukafikizha mulaye wanji mambo uji na maana ne bulume kabiji ukebesha kuba bino. Kya bubiji, Yehoba wayuka’mba kyo aambile kine kikafika. O ene mambo o aambijile’mba: “Bino byambo bya kishinka kabiji bya kine. . . . Byonse byaubiwa!” Kya busatu, kafwako nangwa kimo kyakonsha kulengela Yehoba kukankalwa kupwisha kyo atendekele ne. O ene mambo o aambijile’mba: “Amiwa yami Alefwa ne Omeka.” (Lum. 21:6) Yehoba ukamwesha patoka kuba’mba Satana wa bubela kabiji kechi wakonsha kulengela Yehoba kubula kufikizha kyaswa muchima wanji ne. Onkao mambo, inge muntu waamba’mba, “Kino kechi kikamweka ne,” tangai Lumwekesho 21:5, 6 ne kumulumbulwila. Kabiji mumweshai kuba’mba Yehoba ukafikizha mulaye wanji mambo kiji nobe wasaina kuba’mba ukekyuba.​—Isa. 65:16. w23.11 7 ¶18-19

Yehoba wabuujile Abalahama uno mulaye byo ajinga na myaka 75 kwakubula kusemapo mwana. Nanchi Abalahama wamweneko byafikile uno mulaye nyi? Wamwenekotu pacheche. Byo aabukile mukola wa Ufelata ne kupembelela pa myaka 25, Abalahama wamwene kusemwa kwa mwananji mu jishinda ja kukumya. Kabiji byo papichile myaka 60, wamweneko kusemwa kwa bankana banji ba Isao ne Yakoba. (Hebe. 6:15) Abalahama kechi wamweneko kisemi kyanji kyaikala ke kisaka kikatampe ne kuswana ntanda ya mulaye ne. Nangwa byonkabyo, awa mwanamulume wajinga na bulunda bwawama na Mulenga wanji. (Yako. 2:23) Kabiji Abalahama byo bakamusangula ukasangalala bingi pa kuyuka’mba bisemi byonse bya pano pa ntanda bebipesheshe na mambo a lwitabilo ne kutekanya kwanji. (Nte. 22:18) Ñanyi bintu byo tufunjilako? Tufunjilako kuba’mba kechi tukamona milaye yonse ya Yehoba kufika lonka luno ne. Ne atweba umvwe twatekanya byonka byatekenye Abalahama, tukayuka’mba Yehoba uketufweta mu ino ntanda ne kwitupa bintu byavula byawama mu ntanda ipya yo etulaya.​—Mako 10:29, 30. w23.08 24 ¶14

Byo ajinga mwanyike, mfumu Uzaya wipelwile bingi. Wafunjile “kwakamwa Lesa wa kine.” Kabiji Yehoba wamupesheshe bingi pa myaka yonse 68 yo aikele na bumi. (2 Moba 26:1-4) Uzaya washinjile bisaka byavula bya balwanyi ba Lesa kabiji wazhikijile muzhi wa Yelusalema. (2 Moba 26:6-15) Uzaya wajinga bingi na lusekelo mu bwikalo bwanji na mambo a bintu byonse Lesa byo amukwashishe kuba. (Sapwi. 3:12, 13) Mfumu Uzaya wakebanga bingi kubuula bakwabo bintu bya kuba. Akino kampe kyo kyamulengejile kulanguluka’mba uji na luusa lwa kuba kyonsetu kyo akeba. Juba jimo, Uzaya wafuukwilepo kuya mu nzubo ya Yehoba kabiji na mambo a kwilundumika wakebele kusoka bya kufutumuna pa kya kusokelapo bya kufutumuna. Bamfumu kechi bebaswishishe kwingila uno mwingilo ne. (2 Moba 26:16-18) Ñanga Mwine Mukatampe aye Azaliya waesekeshe kumukanya, bino Uzaya wazhingijile bingi. Na mambo a kukana lujimuno, Uzaya walekele kwikala wa kishinka kabiji bamukambwile na kikola kya mbumba. (2 Moba 26:19-21) Kinetu, bwikalo bwanji inge bwawamine bingi inge kya kuba watwajijile kwikala wipelula. w23.09 10 ¶9-10

Nangwatu mutumwa Petelo byo aikele mwina Kilishitu washingwa, watwajijile na kulubankanya. Mu mwaka wa 36 C.E., Petelo wajingapo kimye Koneleusa kyo ashingilwe na mupashi wazhila. Akino kyamwesheshe’mba “Lesa kechi uji na misalululo ne.” Kabiji bantu ba mu bisaka bikwabo bafwainwe kwikala mu kipwilo kya bena Kilishitu. (Byu. 10:34, 44, 45) Onkao mambo, Petelo wakasulukile kujiila pamo na bantu ba mu bisaka bikwabo, kintu kyo abulanga kuba kala. Nangwa kyajinga bino, bena Kilishitu Bayudea bamo bamwene’mba Bayudea ne bantu ba mu bisaka bikwabo kechi bafwainwa kujiila pamo ne. Bamo pa bano byo bafikile mu Antioka, Petelo walekele kujiila pamo na balongo ba mu bisaka bya bantu. Kampe waubile kino pa kuba’mba abule kuzhingijisha bena Kilishitu Bayudea. Mutumwa Paulo wamwene bukamfutumfutu bwa kwa Petelo kabiji wamolweleko pa mvula bantu. (Nga. 2:13, 14) Nangwa kya kuba Petelo walubankenye bino, watwajijile kwikala wa kishinka. w23.09 22 ¶8

Buno bwipuzho kampe bwakonsha kwimukwasha kuyuka mo mubena kubula kuba bulongo. Inge byo kiji, kange mulefulwe ne. “Nkambo . . . ye wa lusa” kabiji ukemukwasha. (1 Pe. 2:3) Mutumwa Petelo witubuula’mba: “Lesa . . . ukapwisha kwimufunjisha. Ukemulengela kushikimana.” Patanshi Petelo walangulukile’mba kechi wafikilamo kwingila pamo ne Yesu ne. (Luka 5:8) Bino Yehoba ne Yesu bamukwashishe kutwajijila kwingijila pamo ne Yesu mu bukishinka. Kepo Yehoba amuswishishe “[kutwela] mu Bufumu bwa myaka ne myaka bwa Nkambo yetu kabiji Mupulushi aye Yesu Kilishitu.” (2 Pe. 1:11) Kino kintu kyawamine bingi. Inge mwatwajijila kwibikako byonka byaubile Petelo ne kuswisha Yehoba kwimufunjisha, ne anweba mukatambula bumi bwa myaka ne myaka. Kabiji “[mukafikizha] kikonkwanyi kya lwitabilo lwenu lukemulengela kupuluka.”​—1 Pe. 1:9. w23.09 31 ¶16-17

Tente wa lusambakeno wajinga na kipango kimo. Kino kipango kyajinga na lubanza ye bazhokolwesheko luvimba bañanga mo baingijilanga mingilo yabo. Mu kipango mwajinga kya kusokelapo bitapisho bya mulambo wa kusoka. Kino kya kusokelapo bekilengele na mukuba kabiji kyajinga kikatampe bingi. Mu kipango mwajinga ne shomeka wa mukuba wa mema bañanga ye baowelangamo saka bakyangye kutendeka kwingila mwingilo wabo wazhila. (Lupu. 30:17-20; 40:6-8) Lelo jino, bashingwa bashalapo bengijila mu kipango kya mukachi kya nzubo ya Lesa ya ku mupashi pano pa ntanda. Shomeka mukatampe wajinga mu tente wa lusambakeno uvululamo bashingwa ne bena Kilishitu bonse kuba’mba bafwainwa kwikala na byubilo byawama bya bwina Kilishitu. Pano nga “jibumba jikatampe,” jingijila kwepi Yehoba? Mu kimwesho, mutumwa Yoano wibamwene saka “baimana kulutwe ya jitanda,” ko kuba’mba mu kipango kya pangye, mo “babena kumwingijila mwingilo wazhila mute ne bufuku mu nzubo yanji.” (Lum. 7:9, 13-15) Tusanchila bingi Yehoba pa kwituswisha kumwingijila mu nzubo yanji ikatampe ya ku mupashi! w23.10 28 ¶15-16

Yehoba wingijisha bakulumpe mu kipwilo kwitukosesha. (Isa. 32:1, 2) Onkao mambo, inge mwaikala na bijikila, buulai bakulumpe mu kipwilo kabiji mwafwainwa kulondela byo bemubuula. Yehoba ukemukosesha kupichila mwi abo. Luketekelo lwetu mu mulaye wa mu Baibolo wa kuya mwiulu nangwa wa kwikala mu Paladisa pano pa ntanda lwitukosesha ne kwitukwasha kutwajijila kwingijila Yehoba. (Loma 4:3, 18, 19) Luno luketekelo lwitukwasha kuchinchika meseko, kusapwila Mambo Awama a bufumu ne kukwasha balongo ne banyenga. (1 Tesa. 1:3) Luno luketekelo luntutu lumo lo lwakwashishe ne mutumwa Paulo. Wazhokolokelwe na makatazho apusana pusana. Aye ‘wasusubele,’ ‘wamanyikilwe’ ne ‘kumunyakwila panshi.’ Pa bimye bimo, bumi bwanji bwajinga ne mu kizumba. (2 Ko. 4:8-10) Kulanguluka pa luketekelo lwanji ko kwakwashishe Paulo kuchinchika makatazho o apichilengamo (2 Ko. 4: 16-18) Paulo wateletu muchima pa luketekelo lwanji lwa kukekala mwiulu myaka ne myaka. Paulo walangulukanga pa luno luketekelo kimye kyonse. Kyafuminemo, waikalanga ‘ke mupya pa juba pa juba.’ w23.10 15-16 ¶14-17

Umvwe mubena kulomba, langulukai inge kyo kimye kya Yehoba kya kwimupa byo mubena kulomba. Kimo kimye twakonsha kulanguluka’mba tubena kukeba Yehoba kuba’mba etukumbule ponkapotu. Nangwa byonkabyo, Yehoba ye wayuka kimye kyawama kyo afwainwa kwitukwasha. (Hebe. 4:16) Umvwe twabula kutambwila ponkapotu kintu kyo twalomba, kechi twafwainwa kufikenatu kupwisha kuba’mba Yehoba wakana kukumbula ne. Kampe kimye kyanji kya kukumbwilamo kikyangye kukifika. Akilangulukai pa mulongo walombelenga’mba Yehoba amubuke kikola kyanji. Pano bino kikola kyanji kechi kyapwile ne. Umvwe Yehoba wamubukile mu jishinda ja kukumya, Satana inge waambilenga’mba uno mulongo watwajijila kwingijila Yehoba mambo Yehoba wamubuka. (Yoba 1:9-11; 2:4) Yehoba aye mwine wayuka kimye kyo akapwisha bikola byonse. (Isa. 33:24; Lum. 21:3, 4) Kufikatu ne kyokya kimye, kechi twakonsha kuketekela Yehoba kwitubuka bikola byetu mu jishinda ja kukumya ne. Onkao mambo, mulongo wakonsha kulomba Yehoba kuba’mba amukoseshe ne kubula kwikala na bijikila pa kuba’mba achinchike na kikola kyanji ne kutwajijila kwingijila Lesa mu bukishinka. w23.11 24 ¶13

Nangwa kya kuba Samisonyi walubankenye, kechi walekele kwingijila Yehoba ne. Wamwenepo jishinda ja kulwa na bena Filishitiya byonka byakebelenga Yehoba. (Mito. 16:28-30) Samisonyi wasashijile Yehoba’mba: “Ndekai nshinkanye na bena Filishitiya.” Lesa wakumbwile lulombelo lwa kwa Samisonyi ne kumupa bulume jibiji. Pa kikye kimye Samisonyi waipayile bena Filishitiya bavula kukila bo aipayile kala. Nangwa kya kuba Samisonyi wapichile mu bintu byatama na mambo a kintu kyatama kyo afuukwilepo, kechi walekele kuba kyaswa muchima wa Yehoba ne. Inge twalubankanya kabiji betololako nangwa betulekesha kwingila mingilo imo mu kipwilo kechi twafwainwa kuleka kwingijila Yehoba ne. Vulukainga’mba Yehoba waswila jimo kwitulekelako mambo. (Sala. 103:8, 9) Nangwa kya kuba tulubankanya, Yehoba uketupa bulume bwa kuba kyaswa muchima wanji byonkatu byo aubile kwi Samisonyi. w23.09 6 ¶15-16

Kuchinchika kwenu kwimulengela kwitabilwa kwi Yehoba. Kino kechi kilumbulula’mba Yehoba usekela inge mubena kupita mu bya malwa nangwa makatazho ne. Pano bino, usekela na mambo a kuba’mba tubena kuchinchika makatazho o tubena kupitamo mu bukishinka. Kitutundaika bingi kuyuka’mba tutokesha Yehoba ku muchima inge ke tuchinchike mu bya malwa. (Sala. 5:12) Vulukai kuba’mba Abalahama wachinchikile meseko kabiji kuba bino kwamulengejile kwitabilwa kwi Lesa. Yehoba wamumwene’mba mulunda nanji kabiji wamutelele’mba waoloka. (Nte. 15:6; Loma 4:13, 22) Ne atweba twakonsha kwikala balunda nanji ne kutelwa’mba twaoloka. Yehoba kechi usekela mwi atweba na mambo a mingilo yo tumwingijila ne. Pano bino, usekela mwi atweba na mambo a kuchinchika mu bukishinka. Atweba bonse twakonsha kuchinchika kechi na mambo a jifumbi jetu, bintu byo tupitamo nangwa bulume bwetu ne. Nanchi pa kino kimye mubena kuchinchika bya malwa mu bukishinka nyi? Umvwe ibyo, yukai’mba Yehoba ubena kwimubila bibusa. Kuyuka’mba twaitabilwa kwi Lesa kwakonsha kwitukwasha kutwajijila kumwingijila kabiji kwakonsha kukosesha luketekelo lwetu lwa kuba’mba bintu byonse byalaya Lesa bikafika. w23.12 11 ¶13-14

Mwanamulume mwina Kilishitu wafwainwa kuyuka bulongo bya kwisamba na bantu. Mwanamulume wayuka kwisamba bulongo na bakwabo uteleka ne kumvwisha bibena kwamba bakwabo ne byo babena kumvwa ku muchima. (Maana 20:5) Wakonsha kufunda ne kuyuka ñumvwanyikilo ya jiwi ja muntu ye abena kwamba nanji, mwekelo ya kilungi kyanji ne kuyuka inge watako muchima nangwa ne. Kechi mwakonsha kufunda bino bintu byonse inge kya kuba kechi mutanwa na bantu bimye byavula ne. Inge javula mwatemwa kwisamba na bantu kwingijisha keyala wenu wa pa intaneti ne kwitumina tubyambo pa foni, kino kyakonsha kwimulengela kubula kwisambanga na bantu kilungi na kilungi. Onkao mambo, ikalaingapo na kimye kya kwisamba na bantu kilungi na kilungi. (2 Yoa. 12) Mwanamulume mwina Kilishitu uba bulongo wafwainwa kumonapo mashinda a kwikwashishamo aye mwine ne kisemi kyanji pamo. (1 Timo. 5:8) Kyanema bingi kufundapo mwingilo umo ukemukwasha kutaana nkito. (Byu. 18:2, 3; 20:34; Efi. 4:28) Ibikaiko kwingila nkito na ngovu ne kwiipwisha bulongo kabiji kino kikalengela bantu kuyuka’mba mwingila bingi bulongo mingilo yenu kwakubula kwiisha kisaikila. Inge ke mube bino, kikemupelelanga kutaana nkito. w23.12 27 ¶12-13

Baibolo inge waamba pa “juba ja Yehoba,” ulumbulula kimye Yehoba kyo a konauna balwanyi banji ne kupulusha bantu banji. Kala Yehoba wakambulanga bisaka bimo bya bantu. (Isa. 13:1, 6; Ezi. 13:5; Zefwa. 1:8) Mu kino kimye kyetu, “juba ja Yehoba” jikatendeka kimye bantangi ba bumulwila ntanda kyo bakonauna Babilona Mukatampe. Kepo pakalondela nkondo ya Amagedonyi. Pa kuba’mba tukapuluke joja “juba,” twafwainwa kwinengezhezha jino lonka luno. Yesu wafunjishe’mba “inengezhezhai jimo” “malwa akatampe” saka akyangye kwiya, ko kuba’mba twafwainwa kutwajijila kwinengezha. (Mat. 24:21; Luka 12:40) Mutumwa Paulo waingijishe bintu byavula mu nkalata yo anembejile bena Tesalonika byakwashishe bena Kilishitu kwinengezhezha jimo, juba jikatampe ja Yehoba ja luzhachisho saka jikyangye kwiya. Paulo wayukile kuba’mba juba ja Yehoba kechi jakonsheshe kwiya mu kyonkakya kimye ne. (2 Tesa. 2:1-3) Nangwa byonkabyo, wakambizhe balongo kwinengezhezha jimo ne kumonanga jino juba nobe jikeya kesha. Ne atweba twakonsha kwingijisha lujimuno lwanji. w23.06 8 ¶1-2

Mu mwaka wa 1978, bashimikile kishimikwa kyalepa mu muzhi wa Tokyo, mu kyalo kya Japan. Bantu bavula baakaminwe inge kino kishimikwa kechi kikakunduka ne, mambo mu yewa muzhi mupita bingi bitentanshi. Bashayuka bekilengele byepi pa kuba’mba kibulenga kukunduka inge kwapita kitentanshi? Bekishimikile mu jishinda ja kuba’mba inge kwapita kitentanshi kisunkenatu, kechi kikukunduka ne. Bena Kilishitu nabo baji nobe kino kishimikwa. Mu ñanyi jishinda? Mwina Kilishitu wafwainwa kushikimana ne kubula kutelengela. Wafwainwa kukosa ne kutwajijila kukookela mizhilo ya Yehoba ne byo akeba. Wikala wa “lukookelo” ubula kupeezha bikeba Yehoba. Kabiji kechi ‘uminatu pa kintu kyo akeba’ ne, bino umvwe bintu byaaluka naye walula milanguluko. (Yako. 3:17) Mwina Kilishitu wafunda kuba bino, kechi ukosesha mizhilo nangwa kuba kyonse kyo akeba mwine ne. w23.07 14 ¶1-2

Yesu washinjile meseko afuminenga kwi Satana Diabola kubikapotu ne bintu Satana byo amwambijile’mba obe byakonsheshe kumulengela kubula kwikala wa kishinka kwi Yehoba. (Mat. 4:1-11) Satana wakebeshenga Yesu kulenga mambo pa kuba’mba abule kupana bukuzhi. Yesu byo aingijilenga mwingilo wa kusapwila pano pa ntanda, wachinchikile ne meseko akwabo. Bamumanyikilenga ku balwanyi banji ne kukeba kumwipaya. (Luka 4:28, 29; 13:31) Kabiji kechi waumvwanga bulongo pa byalubankanyanga baana banji ba bwanga ne. (Mako 9:33, 34) Byo bakebelenga kumwipaya, bamumanyikile ne kumwambila mwenga. Kabiji wafwile lufu lwatama bingi luleta bumvu. (Hebe. 12:1-3) Kabiji wachinchikile lweseko lukatampe lwapeleleko kwa kubula Yehoba kumuzhikijila. (Mat. 27:46) Yesu wamanamine bingi pa kubatu’mba apane bukuzhi. Yesu wapichile mu meseko avula bingi ne kupana bumi bwanji kwitukuula ku bundengamambo ne lufu. Kulanguluka languluka pa bino byonse kwitulengela kumutemwa bingi. w24.01 10-11 ¶7-9

Kutekanya kwitulengela kukosesha bulunda na bakwetu. Kwitukwasha kuteleka bulongo umvwe bakwetu babena kwamba. (Yako. 1:19) Kabiji kutekanya kwitulengela kumvwañana na bakwetu. Umvwe twatekanya kechi tukumbula bukiji nangwa kuba kintu kyakonsha kuzhingijisha bakwetu ne. Kechi tuzhingila bukiji umvwe mukwetu wituba kintu kitukozha ku muchima ne. Kechi tushinkanya ne, bino ‘twitekenya atweba bene na bene ne kwilekelako mambo.’ (Kolo. 3:12, 13) Kabiji kutekanya kwakonsha kwitulengela kufuukula bulongo. Kechi tukafuukulanga bintu na kanswatu ne. Pakuba tukekalangako na kimye kya kukebakeba bishinka pa kintu kyo tukeba kufuukula. Umvwe tubena kukeba nkito, na mambo a kanswatu, kampe twakonsha kuswatu nkito yonse yamweka. Bino umvwe twatekanya, tukalangulukapo pa nkito yo tubena kukeba kutwela, ne kumona inge ikalengela bulunda bwetu na Yehoba ne bulunda bwetu na kisemi konaika. Kutekanya kwitukwasha kufuukula bulongo. w23.08 22 ¶8-9

Inge mwalefulwa na mambo a kwibikako kukana bintu byatama bisakasaka muchima wenu, kulanguluka pa byo mwalayile Yehoba byo mwipaine kwi aye, kukemulengela kwikala na bulume bwa kushinda meseko. Mu ñanyi jishinda? Kwipana kwi Yehoba kulumbulula’mba mwikana anweba bene. Kino kibena kulumbulula’mba mukachinuzhukanga bisakasaka muchima wenu pa kuba’mba mutookeshenga Yehoba ku muchima. (Mat. 16:24) Onkao mambo, inge mwaesekwa, kechi mukakankazhamanga pa byo mwafwainwa kuba ne. Mukafuukwila jimo kintu kyawama kyo mwafwainwa kuba, ko kuba’mba kutwajijila kwikala wa kishinka kwi Yehoba. Mukakebesha kutwajijila kutookeshanga Yehoba ku muchima. Umvwe mwauba bino, mukoba byonka byaubile Yoba. Nangwa kya kuba wapichile mu makatazho ashinkisha bulaka, waambile’mba: “Kechi nkasankilapo bulumbuluke bwami ne.”​—Yoba 27:5. w24.03 9 ¶6-7

Yehoba, “Lesa wa butemwe” uji ne atweba. (2 Ko. 13:11) Wituta muchima atweba bonse pa muntu pa muntu. Twashiinwa kuba’mba ‘betuzhokoloka ku butemwe bwanji bubula kwaluka.’ (Sala. 32:10) Inge twatwajijila kulanguluka languluka pa butemwe bo etumwesha, tumona byo etuta muchima kabiji tufwenya kwipi ne aye. Twakonsha kulomba kwi aye saka twakasuluka ne kumubuula kuba’mba tukeba aye kutwajijila kwitutemwa. Twakonsha kumubuula bijikila byonse byo tuji nabyo ne kushiinwa kuba’mba umvwa byo tumubuula kabiji ukebesha kwitukwasha. (Sala. 145:19) Byonkatu byo tufwenya ku mujilo inge kuji mashika pa jojo juba, ne butemwe bwa Yehoba byobyo bwitulengela kufwenya kwipi ne aye. Nangwa kya kuba Yehoba witutemwa bingi, bino witumwesha ne kifyele. Onkao mambo, twafwainwa kwikala na lusekelo mambo Yehoba witutemwa. Na mambo a kuba’mba Yehoba witutemwa, twayai ne atweba twambe’mba: “Namutemwa Yehoba”!​—Sala. 116:1. w24.01 31 ¶19-20

Yesu kechi wabuulangatu bantu amba jizhina ja Lesa Yehoba ne. Bino wibabuulanga ne bintu bikwabo byavula pe Yehoba. Bayudea Yesu bo afunjishanga bayukile jizhina ja Lesa. Pano bino, Yesu ‘ye wamulumbulwile’ bulongo. (Yoa. 1:17, 18) Mu Binembelo bya Kihebelu, Yehoba bamulumbulula’mba ye Lesa wa lusa ne kifyele. (Lupu. 34:5-7) Yesu walumbulwile bulongo buno bukine byo aambile pa kishimpi kyaamba pa mwana walubile ne shanji. Mu kino kishimpi, shanji byo amwene mwananji walapijile “byo akijinga palepa byobya,” wamunyemejile lubilo ne kumupakachilamo kabiji wamulekejileko mambo na muchima yense. Kino kishimpi kimwesha lusa lwa Yehoba ne kifyele. (Luka 15:11-32) Yesu wakwashishe bantu kuyuka byubilo byawama biji ne Yehoba. w24.02 10 ¶8-9

Yehoba naye utekenesha bonse baji na bijikila. Twakonsha kubila byepi bakwetu kifyele ne kwibatekenesha byonka byuba Yehoba? Jishinda jimo jo twakonsha kubilamo bino kekwikala na byubilo byawama biketulengelanga kumvwina bakwetu lusa ne kwibatekenesha. Ñanyi bino byubilo bimo byo twafwainwa kwikala nabyo? Ñanyi byubilo biketukwasha kutwajijila kutemwa bakwetu ne “kwitekenesha atwe bene na bene” moba onse? (1 Tesa. 4:18) Twafwainwa kwikala na bino byubilo nabiji kwiubila lusa, kutemwa balongo ne kwiubila kifyele. (Kolo. 3:12; 1 Pe. 3:8) Bino byubilo byakonsha kwitukwasha byepi? Inge ketubile lusa balongo ne banyenga ne kwibata muchima, kino kiketulengelanga kwibatekenesha inge kebapite mu bya malwa. Yesu waambile’mba: “Kanwa kamba monka mwavujila biji mu muchima. Muntu wawama wamba bintu byawama byonka biji mu muchima wanji.” (Mat. 12:34, 35) Kutekenesha balongo ne banyenga babena kupita mu makatazho ke jishinda janema bingi jimwesha’mba twibatemwa. w23.11 10 ¶10-11

Twafwainwa kulomba bukwasho pa kuba’mba tumvwishe bungauzhi bwa mu Baibolo. Fwanyikizhai’mba mwaya ku mpunzha yo mwabula kuyuka bino mulunda nenu mo mwayila ku yoyo mpunzha wiiyuka bulongo. Wayuka bingi bulongo po mwafika ne mikwakwa yonse wiiyuka. Kwa kubula nangwa kuzhinaukatu ne, mwafwainwa kusanchila mulunda nenu pa kwendela pamo ne anweba. Yehoba uji nobe uno mulunda nenu wafwainwa kwimukwasha kabiji wayuka bingi bulongo bintu byawama biji kulutwe. Onkao mambo, pa kuba’mba tumvwishe bungauzhi, twafwainwa kulomba kwi Yehoba kuba’mba etukwashe. (Da. 2:28; 2 Pe. 1:19, 20) Yehoba ukeba baana banji kwikala bwikalo bwawama kulutwe byonkatu bansemi byo bakeba. (Yele. 29:11) Nangwa byonkabyo, Yehoba kechi uji nobe bansemi ba pano pa ntanda ne. Aye wambila jimo bikamweka kulutwe kabiji byo amba kimye kyonse bifika. Yehoba wasajile banabalume kuba’mba banembe bungauzhi buji mu Mambo anji pa kuba’mba tuyuke bintu byanema bikamweka kulutwe.​—Isa. 46:10. w23.08 8 ¶3-4