Kufunda Kechi Kuji Amba Nemukotene
BA KSENIYA basemekelwe mumwaka wa 1897. Bajinga nabaana babakazhi basatu, wamulume umo, bankana 15, nebankanununa 25. Mubwikalo bwabo bonse baubilenga bibafunjishe bansemi yabo. Nangwa kyakuba bayile bukipuluka mu Moscow namambo akunyema nkondo mu Abkhaz Republic, kyalo kiji pakachi ka Black Sea ne Caucasus, bajinga nalusekelo mubwikalo bwabo, kikatakata namambo alwitabilo lwabashakulu babo lobajinga nalo.
Mu 1993, mwanabo wamukazhi Meri waikele ke Kamonyi wakwa Yehoba. Meri watatwile kwisamba naba Kseniya pe Yehoba Lesa ne Baibolo, panobo kechi bakebelenga kwibyumvwane. Ba Kseniya bamubujilengatu mwanabo kikupu kuba’mba: “Nakota kuba nafunda byakatatakane.”
Nangwa baambilenga bino, mwanabo Meri; Londa, muka munkanabo wamulume, nebankanununa babo ba Nana ne Zaza, baikele ke Bakamonyi bakwa Yehoba batwajijile kwisamba nabo byambo byamu Baibolo. Juba jimo mabanga mu 1999, ba Kseniya bebatangijile kinembelo kimo kibafikile bingi pamuchima. Mukino kinembelo mwajinga byambo byabulanda byaambile Yesu kubatumwa banji bakishinka kimye kyoatendekeshe kuja Kijiilo kya Nkambo. (Luka 22:19, 20) Pajino juba ba Kseniya sabaji namyaka yakusemwa 102, bafuukwile amba batatule kufunda Baibolo.
Ba Kseniya bashimikizha’mba: “Panyuma yakwikala myaka 102, popo nayukile kyotwaikelako. Pano nayuka namba kafwako kyawama kukila kwingijila Yehoba Lesa wetu wawama kabiji wabutemwene. Mwane monkijitu wakosa bulongo. Ntangatu bulongo kwakubula makalashi ameso nekwisambila pamo nakisemi kyami.”
Kufika mumwaka wa 2000, pa 5 November, ba Kseniya babatizwe. Baamba’mba: “Pano napana bumi bwami kwi Yehoba namba namwingijilenga nabutemwe. Ngya nakwikala pakiteshenyi kiji kwipi nanzubo yami santambika magazini ne matalakiti. Balongo bami beya javula nakumpempula, kabiji nalusekelo nebabulako bukine bwa Yehoba.”
Ba Kseniya babena kutengela kimye ‘mubiji wabo kyoakaluka nobe wamwanyike, nekubwelamo kwabulume bwabwanyike bwabo.’ (Yoba 33:25) Umvwe muntu wamyaka kukila 100 kechi wimona’mba nakota kyakukankalwa kufunda Baibolo nekuyuka kyotwaikelakone, nga anweba?