Twajijilai Kwingijila Yehoba Namuchima Wata Kumo Konka

“Muchima wami wata kumo konka, anweba Lesa, muchima wami wata kumo konka.”—MASALAMO 57:7.

1. Mamboka otwafwainwa kwikela naluketekelo nabiji lwakwa Davida?

YEHOBA wakonsha kwitukosesha mulwitabilo lwabwina Kilishitu kuba’mba tukakachile ku bwina Kilishitu bwakine byotuji bakalume banji bepana kwiaye. (Loma 14:4) Onkao mambo, twakonsha kwikala naluketekelo nabiji lwakwa Davida nyimbi wamasalamo, watundaikilwe kwimba’mba: “Muchima wami wata kumo konka, anweba Lesa.” (Masalamo 108:1) Umvwe muchima wetu wata kumo konka, tukatundaikwa kwikala mwayila kwipana kwetu kwi Lesa. Kabiji umvwe ketutale kwiaye kuba’mba etupe maana nebulume, tukekala bashikamanatu, bakosa mumfuukwilo nemulwitabilo byotubena kusunga bulumbuluke, ne ‘kukelwa kwingijisha mwingilo wa Nkambo.’—1 Kolinda 15:58.

2, 3. Mukambizho wakwa Paulo mu 1 Kolinda 16:13 ulumbululaka?

² Mumukambizho yeakambizhe baana babwanga bakwa Yesu mu Kolinda ubena kukingila nekubena Kilishitu balelo, mutumwa Paulo waambile’mba: “Labainga ne kukenkenta, koselai mu lwitabilo, ikalai byafwainwa banabalume, kosai.” (1 Kolinda 16:13) Mu Kingiliki, ino mikambizho yonse umo umo yaambiwa muñambilo ibena kumwesha kintu kibena kubiwa, kokuba’mba ibena kulumbulula kwiilondela jonse. Uno mukambizho walumbululaka?

³ Twakonsha kwikala ‘balaba ne kukenkenta’ kumupashi umvwe ketumukane Diabola bino satufwenya kwipi ne Lesa. (Yakoba 4:7, 8) Kukinka manungo mwi Yehoba kwitukwasha kwikala bakwatankana ne ‘kukosela mu lwitabilo lwabwina Kilishitu.’ Atweba bonse kubikapo nebanabakazhi ‘twikala byafwainwa banabalume’ kupichila mukwingijila Lesa nakuchinchika byotuji bataya mbila ya Bufumu. (Masalamo 68:11) ‘Tukosa’ umvwe satutwajijila kutala kwi Shetu wamwiulu kwitupa bulume bwakukonsha kuba kyaswa muchima wanji.—Filipai 4:13.

4. Kika kitulengejile kubatizwa amba twikale bena Kilishitu?

⁴ Byotwipaine kwi Yehoba kwakubula kuzhinauka nekumwesha kwipana kwetu mulubatizhilo lwamu mema, twamwesheshe kuba’mba twatambwila bukine. Pano kika kitulengejile kubatizwa? Patanshi twakifunjile maana alumbuluka amu Byambo bya Lesa. (Yoano 17:3) Kino kitulengejile kwikala nalwitabilo nekwitutundaika kulapila, kumwesha bulanda bwakine pabubi botwaubanga kala. (Byubilo 3:19; Bahebelu 11:6) Kufuma popo, twapimpukile, mambo twafumineko kubyubilo byatama pakuba’mba bwikalo bwetu bwikale mwayila kyaswa muchima wa Lesa. (Loma 12:2; Efisesa 4:23, 24) Pakino palondejile kwipana kwetu namuchima yense kwi Yehoba mululombelo. (Mateo 16:24; 1 Petelo 2:21) Twalombele kwi Lesa kwitupa muchima wawama ubula kwituzhachisha kabiji twabatizwe kumwesha kwipana kwetu kwiaye. (1 Petelo 3:21) Kulanguluka pabino bintu kuketukwasha kuta muchima pabuneme bwakutwajijila kwikala mwayila kwipana kwetu nekwingijila Yehoba namuchima wata kumo konka.

Twajijilai Nakukeba Maana Alumbuluka

5. Mamboka otwafwainwa kutwajijila kufunda maana amu Binembelo?

⁵ Pakuba’mba twikalenga mwayila kwipana kwetu kwi Lesa, twafwainwa kutwajijila kufunda maana amu Binembelo akosesha lwitabilo. Byokyajingapo kyalusekelo kuja kajo kakumupashi kimye kitanshi kyotwayukile bukine bwa Lesa! (Mateo 24:45-47) Aka “kajo” kawamine bingi kabiji ketukwashishe kukoma kumupashi. Onkao mambo, kikebewa bingi kutwajijila kuja kajo kawama kakumupashi pakuba’mba twikale namuchima wata kumo konka byotuji bakalume ba Yehoba bepana kwiaye.

6. Mwakwashiwe byepi kwikala nalusanchilo lwakusanchila bukine bwamu Baibolo kufuma mukachi kamuchima?

⁶ Kikebewa kwibikako pakuba’mba twikale namaana amu Binembelo avujilako. Kiji nobe kukeba bintu byabuneme byafyamika, pakuba’mba muntu ebimone wafwainwa kukosako. Pano bino kikwasha bingi umvwe twatana ‘maana a kumuyuka Lesa.’ (Byambo bya Mana 2:1-6) Musapwishi wa Bufumu kimye kitanshi kyoatendekele kwimufunjisha Baibolo, apo kampe waingijishe buku wa Kuyuka Kutangijila ku Bumi bwa Myaka. Kampe papichilengapo nekimye kyabaya pakuba’mba mupwishe kitango kimo, kimye kimo kitangotu kimo kyonka mwafunjilengamo javula pakuba’mba kipwe. Mwamwenejilemo bingi byomwatangilenga binembelo byamweshiwa nekwisambapo. Umvwe kishinka kyashupa kwikyumvwa, bemulumbulwijilengakyo. Wimufunjishenga lufunjisho lwa Baibolo wanengezhenga bulongo, walombelenga mupashi wa Lesa, nekwimukwasha kusanchila bukine kufuma mukachi kamuchima.

7. Kika kilengela muntu kwikala wafwainwa kufunjishako bantu bakwabo bukine bwa Lesa?

⁷ Kuba kino kwafwainwe bingi, mambo Paulo wanembele’mba: “Awa ye bafunjisha mambo, apanenga mu byonse byawama kwi yewa umufunjisha.” (Ngalatiya 6:6) Kino kinembelo kya Kingiliki kibena kumwesha’mba mafunjisho a Byambo bya Lesa abikwanga mumilanguluko nemu muchima wa muntu ubena ‘kufunda.’ Kufunjishiwa mujino jishinda kwimulengela nenuwa kwikala mufunjishi wafwainwa kufunjishako bantu bakwabo. (Byubilo 18:25) Pakuba’mba mwikale bakishinka mukwipana kwenu, mwafwainwa kusunga butuntulu bwenu bwakumupashi nekwikala bakosa kupichila mukufunda Byambo bya Lesa.—1 Timoti 4:13; Titusa 1:13; 2:2.

Vulukai Lulapilo Lwenu Nekupimpuka

8. Kika kyakonsha kwitukwasha kwikala nabyubilo bikeba Lesa?

⁸ Abya mubena kuvuluka lusekelo lomwaumvwine kimye mwafunjile bukine, mwalapila nekulapila, nekwiumvwa’mba Lesa wimulekelako mambo namambo alwitabilo lwenu mukitapisho kyankuulo yakwa Yesu nyi? (Masalamo 32:1-5; Loma 5:8; 1 Petelo 3:18) Kyakine kechi mubena kukeba kubwela jibiji kubwikalo bwabundengamambone. (2 Petelo 2:20-22) Kikwabo, kulomba kimye kyonse kwi Yehoba kukemukwasha kwikala nabyubilo bikeba Lesa, kwikala mwayila kwipana kwenu, nekutwajijila kwingijila Yehoba mubukishinka.—2 Petelo 3:11, 12.

9. Byotubafume kubyubilo byabundengamambo, twafwainwa kubaka?

⁹ Byomwapimpuka kufuma kubyubilo byabundengamambo, twajijilai nakukeba bukwasho bwa Lesa kuba’mba mwikale namuchima wata kumo konka. Kiji nobe mwaendelenga mujishinda jingi pano byomwamwene pamaapu, mwijisankijilepo nekutendeka kwenda mujishinda jingi jafwainwa. Kange mupampukemo kuya mujingine. Twajijilai nakuketekela mumaana a Lesa, sakishai kwikala mujishinda jiya kubumi.—Isaya 30:20, 21; Mateo 7:13, 14.

Kange Mulubeko Kwipana Kwenu Nelubatizhilo Lwenune

10. Ñanyi bishinka byotwafwainwa kuvulukanga pamambo akwipana kwetu kwi Yehoba?

¹⁰ Vulukai kuba’mba mwipaine kwi Yehoba mululombelo, namulanguluko wakukeba kumwingijila mubukishinka myaka nemyaka. (Yuda 20, 21) Kwipana kulumbulula kusalululwa nangwa kupatulwa kwingila mwingilo wazhila. (Bena Levi 15:31; 22:2) Kwipana kwenu kechi kwajinga kwakakimye kachechetu nangwa kwakwingijila bantune. Kwajinga kwipana kwakikupu kwi Nkambo Walengele byonse, kabiji kwikala mwayila kuno kwipana kukebewa bukishinka mubwikalo bwenu bonse. Ee, ‘twikale bomi, nangwa tufwe, twi bakwa Nkambo.’ (Loma 14:7, 8) Lusekelo lwetu lwaimena palukokelo lwetu lwakuba kyaswa muchima wanji nekutwajijila kumwingijila namuchima wata kumo konka.

11. Mamboka omwafwainwa kuvulukilanga lubatizhilo lwenu nebyolwalumbulula?

¹¹ Kimye kyonse kasa muvuluka lubatizhilo lwenu momwamwesheshe kwipana kwenu kwi Yehoba namuchima yense. Kechi lwajinga lubatizhilo lwakwimukanjikizhane, mambo mwifuukwijile anwe bene. Abya mwasakisha kuba kyaswa muchima wenu kwesakana nakyaswa muchima wa Lesa mubwikalo bwenu bonsenyi? Mwalombele kwi Lesa amba emupe muchima ubula kwimuzhachisha kabiji mwabatizwe kumwesha kwipana kwenu kwiaye. Sungai uno muchima ubula kwimuzhachisha kupichila mukwikala mwayila kwipana kwenu, nemapesho a Yehoba akekala peanweba.—Byambo bya Mana 10:22.

Kyaswa Muchima Wenu Nakyo Kingila

12, 13. Kyaswa muchima wetu kyakwatankana byepi nakwipana nelubatizhilo?

¹² Kwipana nelubatizhilo byaletela bantu bavula mapesho panopantanda ponse. Byotumwesha kwipana kwetu kwi Lesa kupichila mukubatizwa mumema, tufwatu kubyubilo byetu byakala mubwikalo bino kechi tusankilapo kyaswa muchima wetune. Byotuji baitabila bafunjishiwa bulongo, twaubile kyaswa muchima wetu kimye kyotwipainenga kwi Yehoba mululombelo nekubatizwa. Saka tukyangye kwipana nekubatizwa, patanshi twafwainwa kuyuka kyaswa muchima wa Lesa binopa ketwikyube. (Efisesa 5:17) Mujino jishinda tulonda Yesu waubile kyaswa muchima wanji kimye kyoalekele mwingilo wa bukalipentala, wabatizwa, nekwipana namuchima yense kuba kyaswa muchima wa Shanji wamwiulu.—Masalamo 40:7, 8; Yoano 6:38-40.

¹³ Yehoba Lesa wakebele’mba Mwananji ‘akalumbulukile mu bya kumanama.’ Mujino jishinda, Yesu waubilenga kyaswa muchima wanji pakuba’mba achinchike kulumanamo mubukishinka. Pakuba’mba obe kino, ‘walombelenga milombelo ne misashijilo na kujijisha kukatampe ne mipolo . . . kabiji waumvwanyikile mambo a kwakamwa Lesa kwanji.’ (Bahebelu 2:10, 18; 5:7, 8) Neatweba umvwe twaikala nauno moyo mukatampe wakwakamwa Lesa wakonsha ‘kwitumvwa,’ kabiji twakonsha kuketekela’mba Yehoba uketukosesha byotuji Bakamonyi banji bepana kwiaye.—Isaya 43:10.

Mwakonsha Kwikala Namuchima Wata Kumo Konka

14. Mamboka otwafwainwa kutangilanga Baibolo moba onse?

¹⁴ Kika kyakonsha kwimukwasha kwikala namuchima wata kumo konka kuba’mba mwikale mwayila kwipana kwenu kwi Lesa? Namulanguluko wakukeba kufunda maana a Byambo bya Lesa abena kuya nakuvujilakotu kikupu, tangainga Baibolo moba onse. Kino kyokintu kyoabena kwitutundaika kuba kimye kyonse ‘kalume wa kishinka ne wa maana.’ Babena kwitupa luno lujimuno mambo akuba kwikala mwayila kwipana kwetu kukebewa kutwajijila kwenda mubukine bwa Lesa. Umvwe jibumba ja Yehoba janembanga mafunjisho abubela, kuba kejibule Bakamonyi bakwa Yehoba nangwa boba bobasapwilako kuba’mba batangenga Baibolo ne.

15. (a) Kika kyafwainwa kulangulukwapo pakufuukula kuba kintu? (b) Mamboka okyaambiwa’mba mwingilo wabwina Kilishitu yemutanshi kukila nkito yakumubiji?

¹⁵ Pakufuukula kuba kintu, kimye kyonse kasa mulanguluka byokisa kuba nakwikala mwayila kwipana kwenu kwi Yehoba. Kino kyakonsha kwikala nkito yenu yakumubiji. Nanchi mwiimona’mba imukwashe kutwajilamo bupopweshi bwakine palutwe nyi? Nangwa kyakuba bena makito bonse batana kuba’mba bena Kilishitu bepana baketekelwa kabiji bengila bingi bulongo, bamona nekuba’mba Bakamonyi bakwa Yehoba kechi bekala namuchima wakukeba bifulo bikatampe byakutumbalelamone, nangwa kwibekya nabakwabo kwikala pabifulo byakufolelapo mali avulane. Kino kemambo akuba Bakamonyi bakwa Yehoba kechi baimana pakukeba bunonshi, kutumbalala, kwikala pabifulo bikatampe, nangwa pabuntangine. Kuboba babena kukeba kwikala mwayila kwipana kwabo kwi Lesa, kuba kyaswa muchima wa Lesa kyokintu kikatampe kobaji. Nkito yakumubiji ibakwashakotu kutainamo bikebewa mubwikalo, kechi ikala kintu kikatampe mubwikalo bwabone. Byonka byajinga mutumwa Paulo, nkito yabo ikatampe keyoya yamwingilo wabwina Kilishitu. (Byubilo 18:3, 4; 2 Tesalonika 3:7, 8; 1 Timoti 5:8) Nanchi mubika bintu bya Bufumu palutwe mubwikalo bwenunyi?—Mateo 6:25-33.

16. Twakonsha kuba byepi umvwe kijikila kikatampe kekitukatazhe kwikala mwayila kwipana kwetu kwi Lesa?

¹⁶ Kimye kimo bamo bajinga nabijikila bikatampe saka bakyangye kufunda bukine. Pano michima yabo yayula lusekelo, lusanchilo, nebutemwe kwi Lesa kufumatu kimye kyo batambwijile luketekelo lwa Bufumu. Kulanguluka pamfweto yobatana kufuma pakyokino kimye kwakonsha kwibakwasha kwikala mwayila kwipana kwabo kwi Yehoba. Pano ibyepi umvwe kyakuba kijikila kyakijishamo namambo amakatazho abavulemo mubuno bwikalo kekitatankanye “mambo a Lesa,” byonka miba byoitatankanya bijimwa bikiji bicheche kuba’mba bibule kukoma bulongo nekupanga bipangwa? (Luka 8:7, 11, 14; Mateo 13:22; Mako 4:18, 19) Inge mwamona’mba kino kyatendeka kwimumwekela anweba nangwa kisemi kyenu, tayai kijikila kyenu pe Yehoba nekulomba’mba emukwashe kukoma mubutemwe nemulusanchilo. Umvwe mwamutwika kisendwa kyenu, ukemukwasha nekwimupa bulume bwakwimukosesha kutwajijila nakumwingijila namuchima walusekelo wata kumo konka.—Masalamo 55:22; Filipai 4:6, 7; Lumwekesho 2:4.

17. Twakonsha byepi kuchinchika kumeseko akatampe?

¹⁷ Twajijilai kulomba kwi Yehoba Lesa kimye kyonse, byonka byomwalombelenga pakwipana kwenu kwiaye. (Masalamo 65:2) Umvwe mwaesekwa’mba mube kyatama nangwa muji mulweseko lukatampe, kebai lujimuno lwa Lesa nebukwasho bwanji kuba’mba mwilulondele. Vulukai buneme bwalwitabilo, mambo mwana wabwanga Yakoba wanembele’mba: ‘Umvwe mwi anweba muji umo wabula maana [mwakuchinchikila lweseko], epuzhe Lesa, upanapanatu ku bonse ne kushintauka ne; kabiji ukapewao. Kabiji epuzhe mu lwitabilo, ne kuzhinauka nangwa kacheche ne; mambo awa uzhinauka wapashañana pamo no jinyaki ja pa kalunga, jo batwala ku luvula ne kwijitayaika. Awo muntu kechi alanguluke’mba nkatambula kintu nangwa kimo kwi Nkambo ne; muntu wa michima ibiji ukankazhama mu mashinda anji onse.’ (Yakoba 1:5-8) Umvwe lweseko kelumweke kubaisha, twafwainwa kuketekela kino amba: “Kafwako lweseko lwimufikila lo babula kumona bantu bonse ne: mambo Lesa ye wa kishinka, kechi akemuleke’mba, mumone lweseko lwakila bulume bwenu ne: bino mulweseko ukemumwena ne jishinda ja kupulukilamo, amba mumone mwa kwilukonshesha.”—1 Kolinda 10:13.

18. Twafwainwa kuba byepi umvwe twafyapo mambo amo abena kwitubwezhezha panyuma mumfuukwilo yetu yakwikala mwayila kwipana kwetu kwi Yehoba?

¹⁸ Ibyepi umvwe mambo omwafya abena kukatazha jiwi jenu jamuchima nekubwezha panyuma mfuukwilo yenu yakwikala mwayila kwipana kwenu kwi Lesa? Umvwe mwalapila, mwakonsha kutekeneshiwa pakuyuka kuba’mba Yehoba ‘kechi ukamusula muchima walajika ne.’ (Masalamo 51:17) Lombai bakulumpe mukipwilo bemukwashe, samwayuka kuba’mba, byobalonda Yehoba kechi bakasula kusaka kwenu kwakubwezha bulunda bwenu jibiji ne Shenu wamwiulune. (Masalamo 103:10-14; Yakoba 5:13-15) Apa bino, byomwaikala jibiji nangovu yakumupashi nemuchima wata kumo konka, mukakonsha kolwela maulu enu jishinda nekukonsha kwikala mwayila kwipana kwenu kwi Lesa.—Bahebelu 12:12, 13.

Twajijilai Kwingila Namuchima Wata Kumo Konka

19, 20. Mamboka okyanemena kutwajijila kwikala mwayila kwipana kwetu?

¹⁹ Mubino bimye byakatazha, twafwainwa kwibikako kwikala mwayila kwipana kwetu nekutwajijila kwingijila Lesa namuchima wata kumo konka. Yesu waambile’mba: “Wakoselamo ne ku mpelo, ye ukapuluka.” (Mateo 24:13) Byotubena kwikala mu ‘moba apelako,’ mpelo yakonsha kwiya kimye kiji kyonse. (2 Timoti 3:1) Kabiji kafwako nangwa umo mwiatweba uyuka’mba kesha ukekala mumine. (Yakoba 4:13, 14) Onkao mambo, kibena kukebewa bingi kutwajijila kwikala mwayila kwipana kwetu lonka luno!

²⁰ Mutumwa Petelo wakonkomwejile kino munkalata yanji yakibiji. Waambile kuba’mba byonka byafwile bantu babulanga kwakamwa Lesa mu Muyulo, neino ntanda yakifwanyikizho, nangwa’mba bantu babi, bakafwa mu “juba ja Yehoba.” Onkao mambo Petelo waambile’mba: “Mwafwainwa kwikala bantu ba byepi mu bwikalo bwazhila ne bwa kunemeka Lesa”! Kabiji wibakambizhe’mba: “Anweba bakwetu, byo mwayukila jimo bino bintu, jimukai, mwakapona ku kukosa kwenu pa kutwalwa mungi na [bafunjishi babubela ne bantu babula kwakamwa Lesa].” (2 Petelo 3:5-17) Byokyakonsha kwikalapo kyabulanda umvwe muntu wabatizwa watwalwa mungi nekumpelo yabumi bwanji waikala nobe muntu wabujile kusunga muchima wanji wata kumo konka!

21, 22. Byambo bya Masalamo 57:7 byaikala byepi byakine kwi Davida nekubena Kilishitu bakine?

²¹ Mfuukwilo yenu yakwikala mwayila kwipana kwenu kwi Lesa yakonsha kukoselangako umvwe kemuvuluke juba jenu jalusekelo jomwabatizwe nekulombanga Lesa amba emukwashe kuba’mba byambo, nebyubilo byenu bilengele muchima wanji kusangalala. (Byambo bya Mana 27:11) Yehoba kechi ulengesha bantu banji bumvune, neatweba twafwainwa kwikala bakishinka kwiaye. (Masalamo 94:14) Wamwesheshe lusa byoakainye milanguluko yabalwanyi nekumupokolola Davida. Pakusanchila kino, Davida wasapwijile kukosa, nekushikimana kwa butemwe bwanji ku Mupokolweshi wanji. Nalusekelo lukatampe waimbile’mba: “Muchima wami wata kumo konka, anweba Lesa, muchima wami wata kumo konka; nkembanga, ee kine, nkembanga ya kutota.”—Masalamo 57:7.

²² Byonka byajinga Davida, bena Kilishitu bakine kechi batelengela mukwipana kwabo kwi Lesa ne. Namichima yata kumo konka, balanguluka kuba’mba bukuzhi neluzhikijilo lwabo bifuma kwi Yehoba, yebembila nalusekelo yakumutota. Umvwe muchima wenu wata kumo konka, ukaketekela mwi Lesa, kabiji nabukwasho bwanji mukakonsha kwikala mwayila kwipana kwenu. Ee, mwakonsha kwikala nobe “mololoke” yeaimbile nyimbi wamasalamo amba: “Kechi ukachina pa kumvwa jiwi ja byatama ne: muchima wanji wata kumo konka saka aketekela Yehoba.” (Masalamo 112:6, 7) Naluketekelo lonse mwi Lesa nekukinka manungo moaji, mwakonsha kwikala mwayila kwipana kwenu nekutwajijila nakumwingijila namuchima wata kumo konka.

Mukivulukanyi?

• Mamboka otwafwainwa kutwajijila nakufunda maana alumbuluka amu Baibolo?

• Mamboka otwafwainwa kuvulukilanga lulapilo lwetu nebyotwapimpuka?

• Tumwenamo byepi mukuvuluka kwipana kwetu nelubatizhilo?

• Kika kiketukwasha kutwajijila kwingijila Yehoba namuchima wata kumo konka?

[Kipikichala pa peja 28]

Abya mubena kusunga butuntulu bwenu bwakumupashi moba onse kupichila mukutanga Byambo bya Lesa nyi?

[Bipikichala pa peja 28]

Kulenga mwingilo wabwina Kilishitu kwikala mukatampe kwitukwasha kutwajijila kwingijila Yehoba namuchima wata kumo konka