Mwakonsha Kwikala Myaka ne Myaka

BANTU bavula baji mu bupopweshi mwaya ntanda bakeba bingi kwikala na bumi bwa myaka ne myaka. Bintu byo bafunda byaenda kupusana kwesakana na bupopweshi, pano bino bonse baketekela kwikala mutende kwa kubula kufwa ne. Nanchi ne anweba bino kechi byo byo mukeba nenyi? Nga ano mafunjisho akonsha kulumbululwa byepi? Nanchi kukekala bumi bwa myaka ne myaka nyi?

Binembelo bimwesha’mba kufumatu kimye Mulenga kyo alengele ba mulume ne mukazhi batanshi, walengela bantu kukeba kwikala bumi bwa myaka ne myaka. Baibolo waamba’mba: “[Lesa] walengela bantu kulanguluka bya kala ne bya kulutwe bya muyayaya.”—Musapwishi 3:11.

Nangwa byonkabyo, pa kuba’mba bamulume ne mukazhi batanshi bekale myaka ne myaka bafwainwe kulondela lutangijilo lwa Lesa lwa kuyuka byawama ne byatama. Umvwe baji balondejile bibabujile Lesa, inge Yehoba wibatongwejile kwikala na bumi bwa “myaka ne myaka” mu muzhi ye ebanengezhejile wa bujimi bwa Edena.—Ntendekelo 2:8; 3:22.

Balekele Kwikala na Bumi bwa Myaka ne Myaka

Jishimikila ja mu Baibolo jishimuna’mba Lesa wameneshe “kichi kya kuyuka byawama ne byatama,” kino kyo kichi kyo akanyishe ba Adama ne Evwa kujako, kuchina bakafwa. (Ntendekelo 2:9, 17) Umvwe ba Adama ne Evwa baji babujile kuja kyokya kipangwa bakonsheshe kumwesha Lesa amba ye ubena kwibalama. Kabiji kuja ku kyokya kichi kwamwesheshe’mba bakana lutangijilo lwa Lesa. Ba Adama ne Evwa basatukijile mizhilo ya Lesa ne kulondela Satana, kilengwa wa mupashi yenka wasatukijile Lesa. Kyafuminemo, Lesa wamwene kuba’mba ba Adama ne Evwa kechi bafwainwe kwikala myaka ne myaka ne.—Ntendekelo 3:1-6.

Lesa wamwesheshe bumi ne lufu, kwikalako ne kubula kwikalako. Kyafuminemo mu bunsatuki bwabo ke lufu, ko kuba’mba kubula kwikalako jibiji ne. Kechi kyakonshekele ba Adama ne Evwa nangwa mwanabo uji yense kutwajijila kwikalako panyuma ya kufwa ne.a

Baana bonse ba kwa Adama bayanjilenga na mambo a bunsatuki bwa kwa Adama. Mutumwa Paulo walondolwele byafuminemo. Wanembele’mba: “Bundengamambo byo bwatwelele panopantanda ku muntu umo, ne lufu nalo lwatwelele na bundengamambo, kabiji byonkabyo ne lufu lwakumbene ku bantu bonse, mambo bonse balengele mambo.”—Loma 5:12.

Bumi bwa Myaka ne Myaka Bukekalako Jibiji

Mutumwa Paulo waesakenye bwikalo bwa baana ba kwa Adama ku byonka byo kyaikalanga ku muzha mu kitota kya myaka kitanshi. Na mambo a bundengamambo bo baswaine, baana ba kwa Adama ne Evwa baikele ke “bazha ba bundengamambo,” batongwejilwe lufu. (Loma 5:12; 6:16, 17) Yehoba wakujile baana ba kwa Adama ne Evwa ku bundengamambo mambo abo bene kechi bajinga na bulume bwa kuba bino ne. Paulo walondolwele’mba: “Byo lwaishile luzhachisho ku bantu bonse mu muzhilulwila wa umo [wa kwa Adama], kabiji byonkabyo ne lubingisho luleta bumi nalo lwaishile ku bantu bonse mu bololoke bwa umo.” Alwa “lubingisho” lwalengejile Yesu kupana kitapisho kya bumi bwanji bwaoloka kwikala “kya kwibakula bonse.” Yehoba wayukile bukuzhi byo buji na bulume bwa kukula bantu ku “buchibamambo” bwa “luzhachisho.”—Loma 5:16, 18, 19; 1 Timoti 2:5, 6.

O ene mambo basayansi o babujila kuyuka kabiji kechi bakayuka kyakonsha kulengela muntu kwikala myaka ne myaka ne. Mukumbu ko aji. Baibolo waamba’mba, bantu bafwa na mambo a kubula lukokelo, kechi amba balengelwe’mba bafwenga ne. Kitapisho kya kwa Yesu kyo kyakebewenga pa kuba’mba kukekale bumi bwa myaka ne myaka. Kabiji kimwesha bololoke bwa Lesa ne butemwe bwanji bubula kwaluka. Pano bañanyi bakamwenamo mu bukuzhi ne kwikala myaka ne myaka?

Bupe bwa Kwikala Myaka ne Myaka

Yehoba Lesa ye “wa kala ne kala ne kufika ku myaka ya pe.” Kechi ufwa ne. (Masalamo 90:2) Muntu mutanshi Yehoba ye apele bupe bwa kwikala myaka ne myaka wajinga Yesu Kilishitu. Mutumwa Paulo waambile’mba: “Kilishitu, byo asangulwa mu bafu, kechi ukafwa jibiji ne; lufu pano kechi lumube ke nkambo yanji ne.” (Loma 6:9) Ee, Paulo byo amupusenye Yesu ku bakalama ba ino ntanda, waambile’mba, aye ye yenka mu bano bantu ubula kufwa. Yesu ukatwajijila ‘kwikala myaka.’ Bumi bwanji ‘kechi bupwa ne.’—Bahebelu 7:15-17, 23-25; 1 Timoti 6:15, 16.

Yesu kechi ye yenkatu watambula buno bupe ne. Bena Kilishitu bashingwa na mupashi basalululwa kwikala bamfumu mu lukumo lwa mwiulu nabo basangulwa byonka byasangwilwe Yesu. (Loma 6:5) Mutumwa Yoano waambile’mba buno bupe bwapanwa ku ba 144,000 umo umo. (Lumwekesho 14:1) Nabo basangulwa ne kwikala bambulwa kufwa. Paulo waambile pa lusanguko lwabo amba: “Mibiji ya nyama ne mashi kechi yayuka kuswana bufumu bwa Lesa ne . . . Ntolompita ikavuma, ne bafu bakasangulwa ke babula kuyuka kubola, ne atweba tukalulwa. Mambo uno ubola wafwainwa kuvwala ubula kubola, ne uno wa lufu wafwainwa kuvwala ubula kufwa.” Lufu kechi lujipo nangwa na kimo ku boba basangulwa ne.—1 Kolinda 15:50-53; Lumwekesho 20:6.

Bino ke byambo byawama bingi byafuma kwi Lesa. Bamalaika nabo nangwa kya kuba bilengwa bya mupashi, kechi bilengwa bibula kufwa ne. Mambo abya bilengwa bya mupashi byasatukijile pamo na Satana bikepaiwa. (Mateo 25:41) Pakuba aba bakalama pamo ne Yesu, abo bekala na bumi bwa myaka ne myaka, kino kimwesha amba Yehoba wibaketekela mambo a bukishinka bwabo.

Nanchi kino kilumbulula’mba ba 144,000, kibelengelo kichechetu bo bonkatu bakekala myaka ne myaka nyi? Ine. Twayai tumone ene mambo.

Bumi bwa Myaka ne Myaka mu Paladisa Panopantanda

Buku wa Lumwekesho waamba’mba kuji jibumba ja kukankalwa kubala jikekala na bumi bwa myaka mu paladisa panopantanda. Bakekala pamo na boba bakasangulwa ne kwikala na butuntulu bwa mubiji bwawama ne bulume. (Lumwekesho 7:9; 20:12, 13; 21:3, 4) Bakekala ku “mukola wa mema a bumi, a kilola nobe kilishitala, kasa afuma mu jitanda ja Lesa.” Kunsa ya uno mukola kuji “kichi kya bumi . . . , ne mabula akyo o a kubuka mikoka ya bantu.” Yehoba Lesa na mambo a lusa lwanji waitañana amba: “Aye waumvwa kilaka, naye eye: ne aye wasaka naye atambule mema a bumi a bupetu.”—Lumwekesho 22:1, 2, 17.

Abino bichi ne mema kechi bipana bumi mu jishinda ja kukumya kwesakana na bilanguluka bantu bapesa bya kupesapesa kwaubiwa pa myaka yavula ne. Bino bintu bimenako bupe bwa Lesa bo apana kupichila mwi Yesu Kilishitu mu kuba’mba bantu bakekale baoloka byonka byo kyajinga ku ntendekelo.

Nkebelo ya Lesa ya kupana bumi bwa myaka ne myaka ku bantu balukokelo kechi yapimpulwa ne. Ino nkebelo ikafikizhiwa, mambo Yehoba wakishinka. Masalamo 37:29 aamba’mba: “Baoloka bakaswana ntanda, ne kwikalamo myaka ne myaka.” Uno mulaye witulengela atweba pamo na boba bo bapa bumi bwa myaka ne myaka mwiulu kwamba’mba: “Anweba Nkambo Lesa, Wa bulume bonse, mingilo yenu yo ikatampe ne ya kukumya; ne anweba Mfumu wa myaka mashinda enu aoloka ne a kine. Nkambo, ñanyi ukabula kwakamwa ne kutumbijika jizhina jenu? mambo anweba yenka mwazhila.”—Lumwekesho 15:3, 4.

Nanchi mukomoka kwikala na bumi bwa myaka ne myaka nyi? Umvwe ibyo, mwafwainwa kumwesha’mba mwi bakishinka, ne kukokela “Mfumu wa myaka.” Mwafwainwa kumuyuka Yehoba ne Yesu Kilishitu mo tumwena bumi bwa myaka. Ku boba bonse bakeba kulondela mizhilo ya Lesa ya kuyuka byawama ne byatama bakapewa “bumi bwa myaka.”—Yoano 17:3.

[Tubyambo twa mushi]