Mepuzho Kufuma Kubatanga

Mutumwa Paulo waambile’mba “bena Isalela bonse bakapuluka.” (Loma 11:26) Nanchi walumbulwilenga amba Bayudea bonse bakekala bena Kilishitu pa kimye kimo nyi?

Ine, Paulo kechi byo byo aambilenga ne. Mukoka yense wa baana ba kwa Abalahama bakaine kumwitabila Yesu amba ye Mesiasa. Kabiji myaka yalondejilepo panyuma ya lufu lwa kwa Yesu, kyamweshiwetu patoka amba Bayudea bonse kechi bafwainwe kwikala bena Kilishitu ne. Nangwa byonkabyo, byambo byaambile Paulo amba “bena Isalela bonse bakapuluka” byajinga bya kine. Mu ñanyi jishinda?

Yesu waambijile bantangi ba bupopweshi bwa Bayudea bajingako mu moba anji amba: “Bufumu bwa Lesa bakemwangatabo, bakebupana ku mukoka ukapanga bipangwa byabo.” (Mat. 21:43) Mukoka yense wa bena Isalela byo akaine Yesu, Yehoba wasalulwile mukoka mupya, wa ku mupashi. Paulo watelele uno mukoka amba, “bena Isalela ba Lesa.”—Nga. 6:16.

Bibaba bikwabo bya mu Binembelo bya bwina Kilishitu bya Kingiliki byaamba’mba, “bena Isalela ba Lesa” balenga ba 144,000, bena Kilishitu bashingwa na mupashi. (Loma 8:15-17; Lum. 7:4) Kabiji Lumwekesho 5:9, 10 waamba’mba jino jibumba jabikako ne bantu babula Bayudea, kino kimwesha’mba bena Kilishitu bashingwa ke “ba mu bisaka byonse, ne ba mu njimi yonse, ne ba mu mitundu yonse, ne ba mu mikoka yonse.” Bena Isalela ba ku mupashi basajilwe kwikala “ke bufumu ne bañanga; kabiji bakekala mu bufumu panopantanda.” Nangwa kya kuba Yehoba wakaine bena Isalela kwikala mukoka wanji wasalululwa, bantu bunke bunke bakonsheshe kwitabilwa kwi aye. Byo byo kyajinga ku batumwa ne bena Kilishitu batanshi bakwabo bavula. Byonkatu byajinga bantu bonse, bano Bayudea nabo bafwainwe kupotwa na mashi a kwa Yesu Kilishitu.—1 Timo. 2:5, 6; Hebe. 2:9; 1 Pe. 1:17-19.

Nangwa kya kuba Bayudea ba ku mubiji bavula ba mu myaka kitota kitanshi bataile jishuko jabo ja kulama pamo ne Yesu, kechi balengejile nkebelo ya Lesa kubula kufikizhiwa ne. Nkebelo ya Lesa kechi yakonsha kubula kufikizhiwa ne, mambo Yehoba waambile kupichila mwi ngauzhi wanji amba: “Byo bikekala ne byambo byami bilupuka mu kanwa kami; kechi bikabwelatu byatu kwi amiwa ne, poso kuba kyonkakya kyo nafukula, ne kulumbulukila mu kyonkakya kintu kyo nebitumijile.”—Isa. 55:11.

Byo byo kyajinga ne na nkebelo ya Lesa ya kwikajika ba 144,000 ba kulama pamo na Mwananji mwiulu. Baibolo waambamotu patoka amba, Lesa ukapana mupashi pa kibelengelo kyonse kya ba 144,000. Kafwako nangwa umo ukashalapo ne.—Lum. 14:1-5.

Paulo byo anembele’mba, “bena Isalela bonse bakapuluka,” kechi walumbulwilenga amba Bayudea bonse bakekala ke bena Kilishitu ne. Mu kifulo kya byobyo, watazhizhe mu kuba’mba nkebelo ya Lesa ya kwikala na bena Isalela ba ku mupashi bafika ku 144,000 bakalamanga pamo na Mwananji Yesu Kilishitu mwiulu ikafikizhiwa. Mu kimye kyatongolwa kya mwine Lesa, kibelengelo kyonse kya “bena Isalela bonse” kikazhikijilwa, kabiji kikapelako bakalamanga ke bamfumu ne bañanga mu Bufumu bwa Bumesiasa.—Efi. 2:8.

[Bipikichala pa peja 28]

Bashingwa ke ba “mu bisaka byonse, ne ba mu njimi yonse, ne ba mu mitundu yonse, ne ba mu mikoka yonse”