Bapwishishenga Sukulu Wa Gileada Wa Nambala 126

Bya Kwikala Mishonale Wawama

JIBUMBA ja bantu basangalala japwijile pamo pa Watchtower Educational Center mu Patterson, mu muzhi wa New York. Pa kibelushi pa 14 March, 2009 kwajinga kupwisha Sukulu wa Gileada wa nambala 126. Bano bapwishishe sukulu kimye kyafikile kya kwibatuma mu byalo 22 na kusapwila mambo awama a Bufumu bwa Lesa.—Mateo 24:14.

Bapwishishe sukulu wa kufunda Baibolo mu bañondo batanu ye banengezhezhe kwibakwasha kwikala bena Kilishitu bamishonale bawaina. Juba ja kupwisha sukulu jo japeleleko kwibafunda ne kwibajimunako pa kuba’mba bakakonshenga kwingila bulongo.

Ba Anthony Morris ba mu jibumba jitangijila ja Bakamonyi ba kwa Yehoba bajinga bakumupando pa uno mutanchi baambile’mba Sukulu wa Gileada watendekele kufunjisha balongo kwikala bamishonale mu 1943. Kufuma kyokya kimye bapwisha sukulu bengila pakatampe mu mwingilo wa kusapwila mwaya ntanda.

Nangwa kya kuba banembeshi ne Bafaliseo balengulwile batumwa ba kwa Yesu amba “kechi bafunjile ne, bantutu,” ñambi waambile’mba bakajimbulushi bafwainwe kuyuka’mba batumwa baambilenga na kuchinchika mambo bapwanañananga pamo ne Yesu. (Byubilo 4:13) Lufunjisho lupitamo baana basukulu lwibalengela kwamba na kuchinchika.

“Kechi Utala ku Bilungi bya Bantu Ne” kyo kishina kyaambilepo ba Robert Ciranko, bankwasho mu Kavoto ka Kunemba ka Jibumba Jitangijila. Baambile’mba baana basukulu katatakatu bakatane bantu ba bisho ne miteeto yapusana pusana. Bino kwibasapwila kechi kukakatazha ne, umvwe baana basukulu baikala na byubilo bijipo ne Yehoba. Kwesakana na ntuntulwilo imo ya Byubilo 10:34, “Lesa kechi utala ku bilungi bya bantu ne,” ko kuba’mba kechi wanemeka bamo kukila bakwabo ne. “Lesa kechi uji na misalululo ne.” (Byubilo 10:35) Mulongo Ciranko waambile’mba “kupichila mu kwikala na byubilo bijipo ne Lesa ne kumona yense mu mwingilo wa kusapwila amba waitabilwa kwi Lesa, kukemulengela kwingila bulongo bumishonale.”

“Mwafunda bya Kwingila”

Ba Samuel Herd ba mu Jibumba Jitangijila baambila’mba, “bamo bamona’mba ngamela umweka kutama bino walengwa kwikala bulongo mu kiselebwa.” Kyo kimotu ne ku bamishonale bapwisha sukulu bafunda bya kwingila mu manyaunda mo bebatuma. Bintu bitanu bikebakwasha.

1. Kutemwa Yehoba. (Mateo 22:37, 38) Baana basukulu bamwesha kukebesha kwabo kwa kwingijila Yehoba.

2. Kulama Mambo a Lesa. Ngamela ulama kajo mu ntunda yanji. Nangwa kya kuba kajo kavula kechi uleka kuja ne, kabiji wingijisha kajo ko alama umvwe bintu byakatazha. Bamishonale nabo kechi bafwainwatu kukinka manungo mu byo bafunda mu Sukulu wa Gileada byonka ne, bino bafwainwa kutwajijila kukosesha bumupashi bwabo kupichila mu kutanga Baibolo kikupu.

3. Kutemwa bantu. (Mateo 22:39) Baana basukulu bobila lusa bantu.

4. Muchima wa kwipana. (Salamo 110:3) Kukekalanga bimye bimo bamishonale byo bakabula ngovu, pano bino Yehoba ukebakoseshanga.—Isaya 40:29.

5. Bulume bwa mu bwanyike. Byonka ngamela byo asenda muntu mu kiselebwa, ne bamishonale nabo bakonsha “kusendanga” bakwabo bena Kilishitu baji na lukatazho ku mupashi. Pa kuba’mba mube bino mwafwainwa kwikala na ngovu, bino bamishonale baji na bulume bwa mu bwanyike bwabo.

Majashi Akwabo

Michael Burnett, mufunjishi wa Sukulu wa Gileada waambile’mba Yakoba watumine bupe bwa bipangwa byawamisha bya amonde ku mfumu wa bena Ijipita. (Ntendekelo 43:11) Kipangwa kya amonde ke kajo kawama bingi ku mubiji. Baana basukulu baja bipangwa bya amonde bya ku mupashi byavula bingi mu lufunjisho lo bapitamo. Bamishonale bafwainwa kukavulukanga ko bakaya na kwingijilanga, buneme bwa luno lufunjisho lwa kusekela mu bintu bikebapanga Yehoba kabiji ne kufunda kutemwa bwikalo bo bakatana.

Mark Noumair mufunjishi wa Sukulu wa Gileada waambile’mba mu Mambo a Lesa mo muji ‘maana.’ (Yoba 28:18) Twafwainwa kuzhikula mu Baibolo ne kwingijisha bijimo. Inge mwingilo wa bumishonale wabula kwikala byonka baana basukulu byo baketekejilenga, bafwainwa kuvuluka mutumwa Paulo. Baana ba bwanga ba kwa Yesu, bamutumine kwabo ko akengijile pa myaka itanu na ina. Mu kifulo kya kulanguluka’mba ne ‘kintu kyasalululwa’ nafwainwa kwingijilanga ku mpunzha ikwabo, Paulo waingilanga bingi na ngovu konse ko ayanga. (Byubilo 9:15, 28-30) Kunemeka kyasalulula Yehoba kimye kimo kwakonsha kukatazha. Mukwabo waubile bino ke Yonafwanyi. Byo ayukile kuba’mba Davida wajinga mfumu wasalwa kwi Yehoba, Yonafwanyi wamunemekele ne kumukwasha.

Jashi ja kuba’mba “Bamwingilo ba Lesa Bamba na Kuchinchika,” jo jalondejilepo panyuma ya jashi ja Mulongo Noumair, amo baana basukulu mo bamwesheshe bimwesho bya bintu byawama byo batainenga mu mwingilo wa busapwishi kimye kyo bajinga pa sukulu. Bavula batatwile mafunjisho a Baibolo. Mu jashi jalondejilepo ja kuba’mba “Bafundwa na Jibumba ja Yehoba,” mo mo baipwizhe bamishonale babanda basatu. Yense washimikizhe byo afunda kukokela jibumba ja Lesa.

“Ikalai Bamishonale Balusekelo”

Ba Gerrit Lösch ba mu Jibumba Jitangijila baambile jashi jikatampe ja kuba’mba “Ikalai Bamishonale Balusekelo.” Baambile’mba byavula bya “kisangajimbwe” kechi bileta lusekelo lwa kine ne. (Byambo bya Mana 14:13; Musapwishi 2:10, 11) Lusekelo lwa kine kine luji mu kuba kyaswa muchima wa Lesa, nangwa kya kuba javula kechi kyapela ne. Nangwa kya kuba Sukulu wa Gileada wakosele bino wibaletejile lusekelo lukatampe.

Bintu byavula bingi bilengela bena Kilishitu bakine kwikala balusekelo. Bapopwela Lesa wa lusekelo. (Salamo 33:12; 1 Timoti 1:11) Bekala mu paladisa wa ku mupashi, kabiji Baibolo walaya amba katatakatu akalule ino ntanda ke paladisa. Bayuka nkebelo ya bumi, ko kuba’mba kwingijila Yehoba ne kumutota. Kunungapo Yehoba ne Yesu bebatemwa bingi.

Ñambi wanungilepo ne kuba’mba “mukekala bamishonale balusekelo umvwe mwafunda kusekela mu byonka byo muji nabyo.” Kutemwa bantu ne abo kwimutemwa kyo kintu kikwabo kileta lusekelo. Onkao mambo kasa mulekelako bakwenu mambo mu kifulo kya kwambanga pa bilubo byabo. Kasa mubila bakwenu byawama, kukwasha bakoka ne kushimikizha bya kumwenako byawama. (Salamo 41:1, 2; Byubilo 20:35) Lusekelo lutanwa ne mu kwingilako kimye kyabaya mu mwingilo wa kusapwila.—Luka 11:28.

Mulongo Lösch wapezhezheko amba “byo mubena kuya mwikale bamishonale balusekelo, sa mwisangajika anweba bene bino mwafwainwa kutesha muchima pa kutota Yehoba Lesa wa lusekelo kabiji ne kulengela bakwenu bavula kwikala balusekelo.”

Mulongo Anthony Morris byo apwishishe kutanga byambo byafumine mu byalo byavula, watendekele kwibapa baana basukulu madipuloma. Panyuma ya bino, mwana wa sukulu waimenejilengako bapwishishe sukulu wa nambala 126 watangile nkalata yo banembejile Jibumba Jitangijila. Amo mo balumbulwile lusanchilo lwabo pa kutanwa ku Sukulu wa Gileada.

Mu byambo bya kupezhako, wakumupando waambile’mba “manungi ne bikupa bya nkekete” byakwatankanya mubiji bingila nobe lunengezho ‘kalume wa kishinka kabiji wa maana’ lo engijisha kutangijila ne kunengezhezhamo bantu ba Yehoba kajo ka mupashi. (Kolose 2:18, 19; Mateo 24:45) Umvwe babena kupwisha Sukulu wa Gileada bakwatankana pamo na bantu bemenako Lesa mu lutangijilo, kechi ‘bakaleka muntu nangwa umo akebalengele kubulwa mpasela ne,’ bino bakengilanga bulongo mwingilo wabo.—2 Timoti 4:5.

[Kitenguluzha pa peja 31]

BIBELENGELO BYA BAJINGA MU SUKULU

Bafumine mu byalo: 6

Bebatuma mu byalo: 22

Baana Basukulu bonse pamo bajinga: 56

Basongola: 28

Myaka ya kusemwa umvwe twiyabanya pa muntu pa muntu ke:32.8 Myaka yo baikala mu bukine umvwe twiyabanya pa muntu pa muntu ke: 17.9

Myaka yo baingila mu mwingilo wa kimye kyonse umvwe twiyabanya pa muntu pa muntu ke: 13.5

KO BEBATUMINE

Bapwisha sukulu bebatuma ku Benin, Bolivia, Bulgaria, Burkina Faso, Cameroon, Costa Rica, Ghana, Guatemala, Honduras, Kenya, Liberia, Madagascar, Mozambique, Nicaragua, Panama, Paraguay, Peru, Romania, Sierra Leone, South Africa, Togo, ne Uganda.

[Kipikichala pa peja 32]

Bapwishishenga Sukulu wa Gileada wa Nambala 126

Ndonda ya mazhina alondelapo ibena kubalwa kufuma panshi kuya peulu, ne mazhina nao alondankana kutatwila ku kipiko kuya ku kilujo mu munongo umo umo.

(1) Kirchhoff, K.; Nichols, C.; Guzmán, Y.; Coil, H.; Becker, O.; De Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte, A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard.; Lee, Y.; Titmas, L. (7) Boucher, M.; Coil, K.; Marsh, C.; Guzmán, J.; Jones, W.; Kambach, J. (8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.