Twajijilai Kwikala Bakosa ku Mupashi Kimye kyo Mubena Kulama Mulongo Wenu Wabela

PANYUMA ya kumutana na bufwa (tumor) kwipi na longololo, Kamonyi wa jizhina ja Kim bamutaine na kikola kya kabe (cancer).a Mwatawanji wa jizhina ja Steve waambile amba: “Byo bamutumbwile buno bufwa ku kipatela, baingijishe mashinyi alupula mintetenga yakaba ne kumupa muchi wa kikola kya kabe. Na mambo a kushinta kwa uno muchi, mubiji wanji wakokele. Bulume bwa kwenda bwakepele.”

Steve wajinga bingi na bulanda pa kumona mulunda nanji byo akabakenenga na kikola kibula kubukwa. Kampe ne anweba mujipo na umo wa mu kisemi wabela kikola kibula kupwa nangwa bukote. (Sapwi. 12:1-7) Umvwe byo byo kiji, mwayuka amba pa kuba’mba mulame bulongo mulongo wenu wabela, mwafwainwa kwilama. Umvwe mwakoka ku mupashi, butuntulu bwenu bwa mu milanguluko ne mubiji byakonsha kumanaminamo kabiji kino kyakonsha kwimulengela kubula kukebela mulongo wenu byafwainwa. Mwakonsha kukosa byepi ku mupashi kimye kyo mubena kulama mulongo wenu wabela nangwa wakikulumpe? Abya pajipo byakonsha kuba bena Kilishitu mu kipwilo mu kukwasha boba babela nyi?

Twakonsha Kwikala Byepi Bakosa?

Pa kuba’mba mwikale bakosa ku mupashi ne kwikala batuntulu ku mubiji kimye kyo mubena kulama mulongo wenu wabela, mwafwainwa kuyuka mwakubila bintu ne kwingijisha bulongo kimye ne bulume bwenu. Byambo bya Mana 11:2 byaamba’mba: ‘Bepelula bo baji na maana.’ Mu bino byambo, kyambo kya kuba’mba ‘kwipelula’ kilumbulula kuyuka papelela bulume bwetu. Pa kuba’mba mushengamo bulume bwa kwingila mwafwainwa kumona biji mutanchi wenu ne mingilo.

Steve wamwesheshe maana ne kwipelula kupichila mu kumona byajinga mingilo yanji. Kununga pa mingilo yanji ya ku mubiji, waingijilenga mwingilo wa kukwatankanya mingilo ya jibumba ja bakulumpe kabiji ye wajinga kalama wa mwingilo mu kipwilo kya Bakamonyi ba kwa Yehoba mu kyalo kya Ireland. Kabiji wajinga ne mu kipamo kitala pa Kavoto ka Bambañana na ba Mingilo mu Bipatela mu mpunzha yabo. Steve waamba’mba: “Kim kechi wijizhañenyepo amba namulekelelanga na mambo a kutesha muchima ku ino mingilo ne. Pano nayukile amba nakizhizhemo kwingila.” Nga Steve waubilepo byepi pa luno lukatazho? Waamba’mba: “Panyuma ya kulangulukishapo na lulombelo, nalekele mwingilo wa kukwatankanya mingilo ya jibumba ja bakulumpe. Natwajijiletu kwikala mukulumpe mu kipwilo, pano byo naambijile balongo amba bengilenga mingilo imo yo naingilanga mu kipwilo, nashajileko na kimye kya kwikala ne Kim ne kumuta muchima.”

Mu kupita kwa kimye, Kim waumvwineko bulongo. Ba Steve ne Kim bamwene bwikalo bwabo byo bwajinga, kabiji na mambo a bukwasho bwa mukazhanji, Steve watendekele kwingila mingilo yo aingilangapo patanshi mu kipwilo. Steve walondolola amba: “Bonse bubiji bwetu twafunda bya kwingila kwesakana na kikola kijipo. Nsanta bingi kwi Yehoba pa bukwasho bwanji ne ku mukazhami pa kunkwasha kwakubula kwijizhanya nangwa kya kuba ubela.”

Kabiji monai ne byaubile Jerry, kalama wenda, pamo ne mukazhanji Maria. Bakebewenga kupimpula bikonkwanyi byabo pa kuba’mba balame bansemi babo bakote. Maria waamba’mba: “Amiwa ne balume bami twajinga na kikonkwanyi kya kwingila bumishonale mu kyalo kingi. Pano ba Jerry bo baana bunketu, kabiji bansemi babo bakebewenga wa kwibalama. Onkao mambo, twafuukwilepo kwikala mu kyalo kya Ireland kuba’mba twibalamenga. Kupichila mu kuba bino, twaikalangapo kimye kyonse bashabo ba ba Jerry inge bebabika mu mwanya mu kipatela saka bakyangye kufwa. Pano luno pa juba pa juba twatwajijila kumvwa bibena kwikala bainabo ba Jerry kabiji twibakwasha inge kebakebe bukwasho. Kipwilo muji bainabo ba Jerry kikwashañana bingi ne kutundaikañana, kino kitulengela kutwajijila mu mwingilo wa kufwakesha bipwilo.”

Bakwabo byo Bakonsha Kukwashañana

Pa kwisamba pa bintu bya ku mubiji byo bafwainwa kukwasha bakikulumpe bafwilwa mu kipwilo, mutumwa Paulo wanembele amba: “Umvwe muntu wabula kwibamwena ba kwanji byafwainwa, kine ne ba mu nzubo yanji mwine bo bene, wilukana kala lwitabilo, wakila wabula kwitaba mu kutama.” Paulo wavulwilemo bena Kilishitu bakwabo amba pa kuba amba jishinda jo bobilamo bintu ‘jitabilwe ku meso a Lesa,’ bafwainwa kuta muchima bansemi babo ne bankambo yabo bakoma ku mubiji. (1 Timo. 5:4, 8) Nangwa byonkabyo, bakwabo mu kipwilo bakonsha kwibakwasha ku mubiji.

Akimonai kyaubiwe kwi ba Hakan ne ba Inger, bamulume ne mukazhi bakikulumpe bekala mu kyalo kya Sweden. Ba Hakan baamba amba: “Bakazhi bami byo bebataine na kikola kya kabe, kitupezhezhe bingi maana. Ba Inger bajinga na butuntulu bwa mubiji bwawama kimye kyonse. Pano twatendekele kukinkila ku kipatela kimye kyonse na kwibabuka, kabiji muchi ye bebapelenga wibaletejilenga bingi misongo. Pa kino kimye kyo bakolelwenga ba Inger baikalangatu pa nzubo kabiji ne amiwa naikalangatu pa nzubo na kwibalama.” Nga kipwilo mo bajinga kibakwashishe byepi ba Hakan ne ba Inger?

Bakulumpe mu kipwilo banengezhezhe kuba amba bano bamulume ne mukazhi batelekenga ku kupwila kwa bwina Kilishitu saka baji ku nzubo pa lamya. Kunungapo, balongo ne banyenga bebafwakeshanga ne kwibatumina malamya. Kabiji batumanga makalata ne bikachi po banembanga byambo. Ba Hakan baamba amba: “Balongo bonse betutele bingi muchima, kabiji Yehoba witukwasha bingi. Kino kitulengejile kukosa ku mupashi. Kusantatu ke kwakuba amba, ba Inger bakosa, kabiji twatendeka kutanwa jibiji ku kupwila kwa bwina Kilishitu ku Nzubo ya Bufumu.” Umvwe ba mu kipwilo baingila papelela bulume bwabo mu kukwasha babela ne bakikulumpe bo baji nabo, bamwesha amba ke ‘batemwe betemwa bimye byonse, kabiji balongo basemekelwa mambo a kimye kya kumona bya malwa.’—Mana 17:17.

Yehoba Wanemeka Bingi Mingilo Yenu

Kuta muchima mulongo ubena kubela kukebewa kwingila bingi na ngovu. Pano bino, Mfumu Davida wanembele amba: “Ye mwine walusekelo awa wamulanguluka muyanji,” nabiji muntu ukebewa bukwasho na mambo a kubela.—Sala. 41:1.

Mambo ka aba babena kubezha muntu nangwa kulama boba babena kuyanda kyo bakonsha kwikela balusekelo? Byambo bya mana 19:17 byaamba amba: “Awa wamubila lusa muyanji wamukongwesha Yehoba, kabiji aye ukamulubwila akya kyanji kyawama kyo aubile.” Lesa wakine wata bingi muchima bakalume banji bakishinka babena kubela kabiji upesha ne boba bebalama. Nyimbi wa masalamo Davida waimbile amba: “Yehoba ukamukwasha byo aji pa mwanya na misongo: Anweba mwamwanshikila mwanya wanji mu kikola kyanji.” (Sala. 41:3) Twakonsha kuketekela amba umvwe ubena kulama mulwazhi na butemwe ke apite mu makatazho, Yehoba wakonsha kumukwasha.

Byo kyawamapo kuyuka amba Yehoba Lesa umona kabiji utambwila byo tuba mu kukwasha balongo betu babena kubela! Nangwa kya kuba kukwashañana mu jino jishinda kukebewa kwingila na ngovu, Binembelo bitulaya kuba’mba “bitapisho bya byonka bino byo bimutokesha Lesa ku muchima.”—Hebe. 13:16.

[Tubyambo twa mushi]

[Bipikichala pa peja 18]

Twajijilai kukosa ku mupashi ne kutambwila bukwasho bwimukwasha bakwenu