Bino Bintu Bikwashañana Bingi

KUPOPWELA KWA KISEMI ne lufunjisho lwa Baibolo byanema bingi pa kuba amba baana ‘mwibafunjishe ne kwibajimuna monka mwaswila aye Nkambo.’ (Efi. 6:4) Pano inge kya kuba mwi bansemi, mwayuka amba baana benu kechi babanda kumvwa mukose ne. Mwakonsha kwibakwasha byepi kwikala na muchima wa kuteleka? Aki umvwai byaubapo bansemi bamo.

Ba George, bekala mu California, U.S.A. baambile amba: “Baana betu byo bakijinga banyike, amiwa ne bakazhi bami twaesekeshanga kulengela lufunjisho lwa Baibolo lwa kisemi kwikala lwawama. Kimye kimo bonse twavwalanga bivwalo bya bantu banembwa mu Baibolo ne kufwanyikizha byo baubanga kwesakana na jishimikila ja mu Buku Wami wa Mashimikila a mu Baibolo. Twalengele ne bintu nabiji mapoko, tumama, bilukwa ne bintutu bikwabo. Kabiji twakayanga ne bisela bya mu Baibolo bya kwiipuzha mepuzho nabiji bwipuzho bwa kuba amba, ‘yami ñanyi?’ kabiji ne kwiipuzha mepuzho apeela ne akosa. Kabiji twipele ne mingilo ya kwingila nabiji kufiika bwato bwa kwa Nowa nangwa kuyuka ndonda ya myaka ya bintu byanembwa mu Baibolo. Kimo kimye twaikalanga ne na kimye kya kulenga bantu baambiwapo mu Baibolo nangwa mashimikila. Pano luno tubena kulanguluka kulenga kivwalo kya nkondo ya ku mupashi kyaambiwapo mu Efisesa 6:11-17, kabiji bonse pa muntu pa muntu tukalumbululanga mwatala mbaji ya kino kivwalo. Ano mashinda etulengela kumwenamo bingi mu lufunjisho lwa kisemi.”

Inetu wikala mu Michigan, U.S.A., wa jizhina ja Debi washimikizha amba: “Amiwa ne bamwatawami kitukatazhanga bingi kufika pa muchima mwanetu wamukazhi kimye kyo ajinga na myaka ya kusemwa nobe isatu. Pano juba jimo byo natangilenga jishimikila ja kwa Izaka ne Libeka mu Buku Wami wa Mashimikila a mu Baibolo, natolele tudoli tubiji ne kumumwesha nobe to twaambilenga kwesakana na mashimikila. Kino kyamulengejile kutako muchima. Mu bañondo balondejilepo, twaingijishenga tudoli twavula kwimenako bantu ba mu Baibolo. Twaubanga inge twatanga jishimikila, mwanetu wamukazhi wayanga na kukeba tudoli mu nzubo nangwa bintutu bikwabo byakwingijisha pa kufwanyikizha bantu ba mu mashimikila. Kyajingatu pamo nobe kukeba bya buneme. Kabokoshi mo twabikanga makwabilo kaimenangako nzubo ya kwa Lehaba kabiji ne jiponda jichila jaimenangako joja jiponda jajinga pa nzubo ya kwa Lehaba. Kilubi kya muloolo kyalepele mamita 1.5 kyo twapombele ku kichi kyaimenejilengako muloolo wa lubemba wanembwa pa Kubala 21:4-9. Bintu byonse bya kwingijisha mu kifwanyikizho twibilaminanga mu kyola kikatampe. Kituletelanga bingi lusekelo pa kumona mwanetu wamukazhi byo aikalanga mu kibamba mwakukokolokela kasa avwangaula mu ‘kyola mwajinga bintu bya kufwanyikizhako mashimikila a mu Baibolo.’ Twatemwanga bingi byo afwanyikizhanga mashimikila mu jishinda ja mupelejile.”

Kukomesha baana kechi kwapela ne, mambo mwavwangwa byavula kechi kwibafunjishatu mulungu ne mulungu pa kuba amba mwibakwashe kwikala na kizaku kya kwingijila Yehoba ne. Pano bino, kupopwela kwa kisemi ne lufunjisho lwa Baibolo byakonsha kwibakwasha kufunda bintu bikwabo bya ku mupashi. Kwakubula nangwa kuzhinaukatu ne, bino bintu bikwashañana bingi!