Yehoba Kyo Kyetu Kya Kwikalamo

‘Anweba Yehoba, mo mwi anweba mo twaikala myaka yonse pe ne pe.’—SALA. 90:1.

MUSAKUKUMBULA’MBA KA?

Yehoba wajinga byepi ‘kya kwikalamo’ bantu banji bakishinka bajingako kala?

Twakonsha kufunjilako ka ku bukishinka bwa kwa Abalahama?

Twakonsha kumwesha byepi kuba’mba Yehoba kyo ‘kya kwikalamo’ kyetu?

1, 2. Bapopweshi ba Lesa beumvwa byepi mu ino ntanda, kabiji mu ñanyi jishinda mobaikela na nzubo mwa kwikala?

NANCHI mwakasuluka kwikala mu ino ntanda nyi? Inge kechi mwakasuluka ne, ko kuba’mba muji ku lubaji lwawama. Pa myaka yavula yapitapo, batemwa Yehoba kya kine beumvwa bwenyi nangwa nobe bakañenda mu ino ntanda. Kya kumwenako, bapopweshi bakishinka ba kwa Lesa byo bavilaukilenga mu ntanda ya Kenana “beyukanyikishe amba bo benyi bajinga pa lwendo mu ntanda mo baikelenga.”—Hebe. 11:13.

² Kyo kimotu ne baana ba bwanga ba kwa Yesu bashingwa bakekala ‘bangikazhi ba mwiulu,’ nabo bayuka’mba “benyi kabiji bakañenda mu ino ntanda.” (Fili. 3:20; 1 Pe. 2:11) “Mikooko ikwabo” ya kwa Kilishitu nabo “kechi bo ba pano pa ntanda ne, byonka [Yesu byo abujile] kwikala wa pano pa ntanda.” (Yoa. 10:16; 17:16) Nangwa byonkabyo, bantu ba Lesa kechi babula “nzubo” mwa kwikala ne. Atweba tuji na mwa kwikala mumwekatu na meso a lwitabilo muji luzhikijilo ne butemwe bukatampe. Mosesa wanembele’mba: ‘Anweba Yehoba, mo mwi anweba mo twaikala myaka yonse pe ne pe.’a (Sala. 90:1) Yehoba wajinga byepi ‘kya kwikalamo’ bakalume banji bakishinka ba kala? Kabiji Yehoba waikala byepi ‘kya kwikalamo’ bantu banji lelo jino? Nga kulutwe ukekala byepi kya kwikalamo kyetu kya kwituzhikijila?

YEHOBA WAJINGA ‘KYA KWIKALAMO’ BAKALUME BANJI BA KALA

3. Yehoba bamupashañanya ku ka mu Salamo 90:1, kabiji mambo ka?

³ Byonka bijitu ñambilo ikwabo ya kifwanyikizho iji mu Baibolo, ne mu Salamo 90:1 namo muji kyo babena kwambapo, kintu kyo babena kupashañanyako ne kwipasha kujipo. Yehoba ye ye babena kwambapo. Kintu kyo babena kumupashañanyako ke kya kwikalamo, nangwa’mba nzubo. Yehoba ujitu nobe kya kwikalamo, mambo uzhikijila bantu banji. Kino kyakwatankana na kishinka kya kuba’mba Lesa butemwe. (1 Yoa. 4:8) Kabiji ke Lesa wa mutende, ulengela bantu banji bakishinka ‘kwikala bulongo.’ (Sala. 4:8) Akilangulukai pa byo aubile na bashakulu bakishinka, kutendekela pe Abalahama.

4, 5. Lesa wajinga byepi ‘kya kwikalamo’ Abalahama?

⁴ Akifwanyikizhai byo kyajinga kwi Abalahama, saka akitelwa’mba Abalama kimye Yehoba kyo amwambijile’mba: “Fuma mu kyalo kyobe, ne ku balongo bobe . . . uye ku kyalo kyo nkakubula.” Inge kya kuba Abalahama wajinga na kijikila, ko kuba’mba byambo bikwabo byamwambijile Yehoba byamutekeneshe bingi. Wamwambijile’mba: “Nkakwalula ke mukoka mukatampe, kabiji nkakupesha ne kulenga jizhina jobe ke jatumbalala . . . Kabiji nkapesha boba bakakupesha obewa, ne kufinga nkamufinga awa ukakufinga obewa.”—Nte. 12:1-3.

⁵ Kupichila mu bino byambo, Yehoba wamwesheshe kuba’mba ukekala kya kufyamamo Abalahama ne kisemi kyanji. (Nte. 26:1-6) Yehoba wafikizhe mulaye wanji. Kya kumwenako, wakainye Felo mwina Ijipita ne Mfumu Abimeleki wa ku Gelala kwangata Sala ne kwipaya Abalahama. Kabiji byo byo azhikijile ne Izaka ne Libeka. (Nte. 12:14-20; 20:1-14; 26:6-11) Tutanga’mba: “[Yehoba] kechi walekele nangwa muntu umo kwiboba kibi ne; ee kine, wibalengulwile bamfumu pa mambo a abo, amba, kechi mukwateko ku bami bashingwa manyi ne, ne kwiboba kibi bañambi bami ne.”—Sala. 105:14, 15.

6. Izaka waambijile Yakoba kuba ka, kabiji Yakoba wafwainwa waumvwine byepi?

⁶ Pa bano bañambi pajinga ne Yakoba munkana Abalahama. Byo kyafikile kimye kya kuba’mba Yakoba asongole, shanji aye Izaka wamwambijile’mba: ‘Kechi usongole mwanamukazhi wa mu bena Kenana ne. Imana, uyenga ku Padana-alama ukafike ku nzubo ya nkambo yobe Betwela; ko ko ukasongola umo wa mu baana ba mwisho wobe Labanyi.’ (Nte. 28:1, 2) Yakoba waumvwijile bya mubujile bashanji. Washile kisemi kyanji mu Kenana ne kwenda museke walepa bingi kuya ku Halana bunke bwanji. (Nte. 28:10) Kampe walangulukilenga amba: ‘Nkekalako moba anga? Kana bamwisho bakantambwila bulongo ne kumpa mwanamukazhi wakamwa Lesa nyi?’ Inge Yakoba wajinga na bino bijikila, kwa kubula nangwa kuzhinaukatu ne, byapwile byo afikile ku Luza, kwalepele makilomita 100 kufuma ku Belesheba. Ki ka kyamwekele ku Luza?

7. Kupichila mu kiloto, Yakoba bamulayile’mba ka kwi Lesa?

⁷ Ku Luza, Yehoba wamwekele kwi Yakoba mu kiloto ne kumwambila’mba: ‘Umvwa, amiwa nji nobe, nkakulama ne konse konse ko ukaya, kabiji nkakubwezha jibiji ku yonka ino ntanda; mambo kechi nkakusha ne, kana nauba byonse byo nakulaya.’ (Nte. 28:15) Bino byambo byafwainwa byamutekeneshe bingi Yakoba ne kumukosesha. Abya mwakonsha kufwanyikizha Yakoba byo apimpaukilenga, saka abena kukebesha kumona Lesa byo akafikizha mulaye wanji nyi? Inge mwasha kisemi, kampe mwaya na kwingijila ku kyalo kingi, mwafwainwa mwayuka byaumvwinenga Yakoba. Kwa kubula nangwa kuzhinaukatu ne, mwafwainwa mwimwena Yehoba byo emuta muchima.

8, 9. Mu ñanyi mashinda Yehoba mo aikejile ‘kya kwikalamo’ Yakoba, kabiji twafwainwa kufunjilako ka?

⁸ Yakoba byo afikile ku Halana, bamwisho wanji bamutambwijile bingi bulongo kabiji bamupele Liya ne Lechela kwikala bakazhi banji. Mu kuya kwa moba, Labana wakebele kujiila Yakoba makusu pa mutwe kupichila mu kwalula mfweto yanji bimye jikumi. (Nte. 31:41, 42) Bino Yakoba wachinchikile ino nshiji yonse, mambo waketekejile kuba’mba Yehoba usakutwajijila kumulama kabiji byobyo kyajinga. Ne kya kine Lesa byo amwambijile kubwela ku Kenana, Yakoba wajinga na “matanga akatampe a banyama, ne na bakalume banji ba bakazhi ne ba balume, ne na bangamela ne na bambongolo.” (Nte. 30:43) Yakoba pa kusanta kufuma panshi ya muchima wanji walombele’mba: “Amiwa kechi ne muntu wafwainwa kutambula bibusa byenu ne bya bukishinka bwenu byo mwamwesha kwi amiwa kalume wenu nangwa kachechetu ne, mambo naabukile uno mukola Yodano na mukombo wami yenka, pakuba pano talai, naikala ke bipanyi bibiji.”—Nte. 32:10.

⁹ Bino byamwekele bibena kumwesha bukine bwa lulombelo lwa kwa Mosesa lwa kuba’mba: ‘Anweba Yehoba, mo mwi anweba mo twaikala Myaka yonse pe ne pe.’ (Sala. 90:1) Bino byambo bingila ne ano moba, mambo Yehoba “ubula kwaluka byaluka kimvule,” watwajijila kwikala kya kwikalamo bantu banji bakishinka. (Yako. 1:17) Twayai twisambe pa ene mambo o kyaikela bino.

YEHOBA KYO ‘KYA KWIKALAMO’ KYETU LELO JINO

10. Mambo ka o twafwainwa kuketekela kuba’mba Yehoba watwajijila kwikala kya kwikalamo bakalume banji?

¹⁰ Fwanyikizhai kuba’mba mwaimana mu kije na kushinawina kipamo kya ntanda yonse kya bantuntwamishinko. Ntangi wa kino kipamo wajimuka bingi, uji na bulume bukatampe, shabubela kabiji mbanzhi. Mwakonsha kumvwa byepi pa kufuma mu kije? Abya mwakonsha kukasuluka nyi? Kwalepeshatu! Kine, mwakonsha kwikala na bishinka bya kwimulengela kulomba luzhikijilo. Kino kya kumwenako kibena kumweshatu patoka biji bwikalo bwa bakalume ba Yehoba bamubingisha, bashinawina mulwanyi wanji mukatampe, wakanama bingi aye Satana kwa kubula moyo. (Tangai Lumwekesho 12:17.) Abya Satana walekesha bantu ba Lesa kuba bino nyi? Ine. Twatwajijila kusapwila, kino kibena kumwesha kuba’mba: Yehoba kyo kyetu kya kufyamamo kabiji kyo ‘kya kwikalamo’ kyetu, kikatakata mu ano moba apelako. (Tangai Isaya 54:14, 17.) Nangwa byonkabyo, Yehoba kuba watwajijila kwikala kya kufyamamo kyetu umvwe twaleka Satana witujimbaika ne kwitufumya mu kya kwikalamo kyetu ne.

11. Twakonsha kufunjilako ka kwi Abalahama, Izaka ne Yakoba?

¹¹ Kabiji twayai tufunjileko kikwabo kwi Abalahama, Izaka ne Yakoba. Nangwa kya kuba baikelenga mu ntanda ya Kenana, batwajijile kwipatula ku bantu ba mu yoya ntanda ne kushikwa byubilo byabo bincha. (Nte. 27:46) Bano banabalume balondelanga mafunde kechi mizhilotu ya kwibabula kyawama ne kyatama ne. Bayukile bintu byatemwa Yehoba ne byo ashikwa. Na mambo a kuba wajinga kya kwikalamo kyabo, kechi bakebanga kwipapika na bantu ba mu yoya ntanda ne. Bachinuzhukanga yoya ntanda. Bano ke bantu bawama bingi kulondela. Nanchi mwibikako kulondela byajinga bano bashakulu bakishinka pa kusala balunda ne bya kisangajimbwe nyi? Kyatamakotu ke kya kuba’mba, bamo mu kipwilo kya bena Kilishitu kimo kimye bomvwa bulongo kwikala mu ino ntanda ya kwa Satana. Inge byobyo mumvwa, mwafwainwa kulombapo. Vulukainga kuba’mba ino ntanda ya kwa Satana. Satana witemwa aye mwine kabiji witushikwa bingi.—2 Ko. 4:4; Efi. 2:1, 2.

12. (a) Ñanyi bintu Yehoba byo anengezhezha bakalume banji? (b) Mumvwa byepi pa bino bintu byo betunengezhezha?

¹² Pa kuba’mba tubule kongolwa na bya bujimuku bya kwa Satana, twafwainwa kwingijishanga bintu Yehoba byo abena kunengezhezha bakalume banji. Bino bintu byavwangamo kupwila kwa bwina Kilishitu, kupopwela kwa kisemi, ne ‘bya bupe mu bantu,’ ko kuba’mba bakafunga bo batongola kwi Lesa kuba’mba betutekeneshenga ne kwitukwasha byo tubena kupita mu makatazho a mu bwikalo. (Efi. 4:8-12) Mulongo George Gangas wajinga mu Jibumba Jitangijila pa myaka yavula, wanembele’mba: “Umvwe nji pa [bantu ba Lesa] nkasuluka bingi, ubatu nobe nji na balongo bo nasemwa nabo.” Nanchi ne anweba byobyo mumvwa nyi?

13. Ñanyi kintu kyanema kyo twakonsha kufunda kufuma mu Bahebelu 11:13?

¹³ Kintu kikwabo kyo twafwainwa kufunjilako ku bano banabalume ke kwikala bapusanako na bantu betuzhokoloka. Byonka byo kyakwambiwapo mu jifuka 1, bano bantu paragraph 1 “beyukanyikishe amba bo benyi bajinga pa lwendo mu ntanda mo baikelenga.” (Hebe. 11:13) Nanchi ne anweba mwafuukulapo kwikala bapusanako na bantu ba mu ino ntanda nyi? Pano bino, kuba bino kechi kwapela ne. Bino Lesa ne bena Kilishitu bakwetu bakonsha kwitukwasha kuba bino. Vulukai kuba’mba kechi muji bunke ne. Bonse bakeba kwingijila Yehoba baji mu buno bulwi. (Efi. 6:12) Nangwa byonkabyo, ino ke nkondo yo twakonsha kushindatu inge twaketekela mwi Yehoba kuba’mba kyo kya kwikalamo kyetu.

14. Ñanyi “muzhi” watengejilenga bakalume ba kwa Yehoba?

¹⁴ Kintu kikwabo kyanema ke kino: Ikalai byonka byajinga Abalahama kupichila mu kuzanza meso enu pa mfweto. (2 Ko. 4:18) Mutumwa Paulo wanembele’mba Abalahama “watengejilenga muzhi uji na bitendekesho bya kine, sendwe mwine ne ntungi ye Lesa.” (Hebe. 11:10) Uno “muzhi” wajinga Bufumu bwa Bumesiasa. Abalahama wafwainwe kutengela uno “muzhi.” Pakuba atweba kechi tutengela uno muzhi ne. Mambo buno Bufumu bubena kulama mwiulu. Kabiji bishiino bibena kumwesha kuba’mba katatakatu bukalamenga ino ntanda. Nanchi mwashiinwa’mba buno Bufumu kobuji nyi? Nanchi mutangizhako buno Bufumu mu bwikalo bwenu ne kutwajijila kupusanako na bantu ba mu ino ntanda nyi?—Tangai 2 Petelo 3:11, 12.

‘KYA KWIKALAMO KYETU’ MPELO BYO IBENA KUFWENYA PEPI

15. Ñanyi bintu bikamwekela bantu baketekela mu ino ntanda?

¹⁵ Mpelo ya ino ntanda ya kwa Satana ijitu pepi, kabiji “bisanso” bikakilamo ne kukilamo. (Mat. 24:7, 8) Bintu bikatama bingi kimye kya malwa akatampe. Bintu byavula bikonaika kabiji bantu bakapapalangatu na moyo. (Ha. 3:16, 17) Na mambo a kupelelwa, kikekalatu nobe babena kuya na kufyama “mu mayengo ne mu mabwe akatampe a mu mitumba.” (Lum. 6:15-17) Pano bino, mayengo nangwa bipamo bya bumulwila ntanda ne bya bukomo biji nobe mitumba kechi bikebazhikijila ne.

16. Twafwainwa kumonanga byepi kupwila kwa bwina Kilishitu, kabiji mambo ka?

¹⁶ Nangwa byonkabyo, bantu ba Yehoba bakatwajijila kwikala bazhikijilwa mu ‘kya kwikalamo’ kyabo, ko kuba’mba Yehoba Lesa. Byonka byajinga ngauzhi Habakuka, ‘basekela mwi Yehoba’ ne “kumwena lusekelo mu yenkaye Lesa [wibapulusha].” (Ha. 3:18) Mu ñanyi mashinda Yehoba mo akekela ‘kya kwikalamo’ mu kimye kya malwa akatampe? Tukapembelela ne kumona byo kikekala. Pano bino, twafwainwa kuketekela kuba’mba, byonka byo kyajinga ku bena Isalela kimye kyo bafumine mu Ijipita, ne “jibumba jikatampe” najo jikatwajijila kukwatankana ne kutambula mikambizho kufuma kwi Lesa. (Lum. 7:9; tangai Kulupuka 13:18.) Yehoba ukapana byepi ino mikambizho? Kyamweka ukengijisha kipwilo kwitubula bya kuba. Umvwe kyaikala bino, ko kuba’mba bipwilo byavula kuzhokoloka ntanda yonse bikekala nobe ‘mazubo a mukachi’ a luzhikijilo aambijilwe jimo mu Isaya 26:20 (Tangai.) Nanchi mwanemeka kupwila kwa kipwilo nyi? Abya mumvwina bukiji mikambizho ipana Yehoba kupichila mu kipwilo nyi?—Hebe. 13:17.

17. Yehoba waikala byepi ‘kya kwikalamo’ bakalume banji bakishinka bafwa?

¹⁷ Nangwatu boba bakonsha kufwa saka baji bakishinka malwa akatampe saka akyangye kutendeka, bakatwajijila kuzhikijilwa kwi Yehoba mambo kyo ‘kya kwikalamo’ kyabo. Mu ñanyi jishinda? Byo papichile myaka yavula kufuma kimye kyafwile Abalahama, Izaka ne Yakoba, Yehoba waambijile Mosesa amba: “Amiwa ne Lesa wa . . . Abalahama, ne Lesa wa Izaka, ne Lesa wa Yakoba.” (Lupu. 3:6) Pa bino byambo Yesu wanungilepo amba: “Aye kechi ye Lesa wa bafu ne, ke wa bomi, mambo bonse kwi aye ke bomi.” (Luka 20:38) Kya kine, Yehoba umona bantu banji bakishinka bafwa amba bomi mambo ukebasangula.—Sapwi. 7:1.

18. Mu ntanda ipya, Yehoba ukekala byepi ‘kya kwikalamo’ bantu banji?

¹⁸ Mu ntanda ipya ibena kwiya, Yehoba ukekala ‘kya kwikalamo’ bantu banji mu jishinda jikwabo. Lumwekesho 21:3 waamba’mba: “Tala! Tente wa Lesa ukekala na bantu, ne aye ukekala nabo.” Patanshi, Yehoba ukekala na bantu kupichila mwi Kilishitu Yesu byo akalamanga ino ntanda. Ku mpelo ya myaka kiumbi, Yesu ukafikizha kyaswa muchima wa Lesa ku ino ntanda, apa bino akalubwile Bashanji Bufumu. (1 Ko. 15:28) Kepo bantu bakekala balumbuluka kabiji kechi bakakebewanga Yesu kwibambilako kwi Lesa ne, mambo mwine Yehoba ukalamanga. Kino kintu byo kikawamapo! Pa kino kimye, twayai twibikeko kwikala bakishinka byonka byajinga bakalume ba Lesa ba kala kupichila mu kuleka Yehoba kwikala ‘kya kwikalamo’ kyetu.

[Tubyambo twa mushi]

[Kipikichala pa peja 19]

[Kipikichala pa peja 20]

‘Kechi nkakusha ne’

[Kipikichala pa peja 22]

Bamalaika ba Lesa batundaika ne kuzhikijila bakalume banji