Nanchi Bupopweshi Bwafwainwa Kukanjikizha Bantu Kupana Mali Nyi?
Estellea kechi washalanga ku chechi ne. Wayanga na baana banji bonse batanu na babiji. Waambile’mba “Na bujile ntangi wa bupopweshi kuba’mba nakebelenga kufunda Baibolo.” Pano bino kechi waswile kumfunjisha ne. Kyapeleleko, walekele kuya ku chechi. Watwajijila kwamba’mba: “Bantangi ba chechi bambujile kuba’mba umvwe kya kuba nabula kuya ku chechi, nafwainwa kutumatu mali. Natendekele kulanguluka kuba’mba ‘nanchi nangwa mbule kuya ku chechi, bano bantu kyo bakebakotu ke mali’.”
Angelina watemwa bingi kupwila waambile’mba: “Mu chechi mo ngya, bapishangamo muchiba jisatu kimye kyo tuji mu chechi pa kuba’mba tupane mali. Jonse bakebanga mali. Natendekele kulanguluka amba, ‘Bano bantu kechi baji na Lesa ne.’”
Nanchi bipwilo biji mu mpunzha yo mwikalamo nabo bakanjikizha bantu kwibapa mali nyi? Nanchi kuba bino byo bifunjisha Baibolo nyi?
BAIBOLO UFUNJISHA AMBA KA?
Yesu watatwile bwina Kilishitu waambile’mba: “Mwatambwiletu byatu, ne anweba panaitu kyatu.” (Mateo 10:8) Byambo biji mu Baibolo kechi bya kupota na mali ne kabiji byafwainwa kwikala na muntu uji yensetu.
Nga bena Kilishitu batanshi baubanga byepi pa kupana mali mu kipwilo?
‘Bonse pa muntu pa muntu bapananga monka mo bafuukwila mu michima yabo, kechi kupana na bulanda nangwa na mambo a kwibakanjikizha ne, mambo Lesa watemwa muntu upana na lusekelo.’ (2 Kolinda 9:7) Mutumwa Paulo waambile’mba: “Twaingijilenga bufuku ne mute kuchina amba twakemukatazha pa kwitumwena mwa kwikela kimye kyo twimusapwijilenga mambo awama a Lesa.” (1 Tesalonika 2:9) Paulo waingilanga mwingilo wa kulenga matente pa kuba’mba ekwashishengamo mu mwingilo wa kusapwila.—Byubilo 18:2, 3.
NANCHI BAKAMONYI BA KWA YEHOBA BOBA BYEPI MU KINO?
Bakamonyi ba kwa Yehoba bapwila mu mazubo awama o batela’mba Mazubo a Bufumu. Bafumya kwepi mali a kushimikila ano mazubo? Kechi bapishamo muchiba nangwa kutuma makalata na kukanjikizha bantu kuba’mba babikemo mali ne. Bino, bonse bamwesha lusanchilo pa mwingilo ye bengila wa kukwasha bantu kufunda bukine, batayamo mali mu kabokoshi ka mubingu pa Nzubo ya Bufumu.
Pataiwa mali avula pa uno magazini pa kuba’mba bapulinte ne kuleta kuno. Pano bino, kechi mukamonapo balamika bipepala bya kulomba mali ne. Batatu muchima pa kusampanya bukine bwa mu Baibolo.
Nanchi mwalanguluka kuba’mba byo bengijisha mali byakwatankana na byambo byaambile Yesu ne byaubanga bena Kilishitu batanshi nyi?
[Tubyambo twa mushi]
a Mazhina amo mu bino bibaba apimpulwa.
[Mabulañano pa peja 4]
Kipwilo kyafwainwa kutana byepi mali?