Yehoba ‘Unsendela Kisendwa Kyami pa Juba pa Juba’
Maretha du Raan
Nangwa kya kuba nji na kikola kyatama bingi, nemwena binkwasha Shetu wa mwiulu mu bwikalo bwami. Kabiji naingijila Yehoba na lusekelo mu mwingilo wa bupainiya kukila pa myaka 20.
Nasemenwe mu 1956 na longololo wabula kusambakana bulongo wandengejile kwikala na kikola kitelwa’mba spina bifida. Konaika kwa mishipa ya mu longololo kwandengela kubula kwenda kabiji kwandetela ne bikola bikwabo byatama bingi.
Saka nkyangye kusemwa, bamishonale Bakamonyi ba kwa Yehoba batendekele kufunjisha bansemi bami Baibolo. Byo nakijinga mwanyike, mu taunyi wa Usakos mo twaikalanga mu kyalo kya Namibia, mwajingatu basapwishi bacheche bajinga mu mapunzha apusana pusana. Na mambo a kuba kechi kwajinga kipwilo ne, twapwilangatu pa nzubo. Byo nafikizhe myaka itanu na ibiji, bantumbwile pa kuba’mba bambike kajitumbo mwakufumina nsonso. Byo nafikizhe myaka 14, natendekele kufwa kashita. Nakankelwe kupwisha sukulu, mambo a kuba kwajinga sukulu kwalepele bingi kabiji nakebewanga bansemi kunkwasha kimye kyonse.
Nangwa byonkabyo, nafuukwilepo kukosesha bulunda bwami ne Lesa. Pa kyokya kimye, mabuku etu a bwina Kilishitu kechi anembelwe mu mulaka wetu wa ki Afrikaans ne. Onkao mambo, nafunjile kutanga Kizungu pa kuba’mba ntangenga mabuku etu avula. Naikele musapwishi wa Bufumu kabiji nabatizhiwe saka nji na myaka 19. Pa myaka ina yalondejilepo, naikele na bikola byavula kabiji milanguluko yamvujilanga bingi. Kabiji kwikala mu kimasamasa mwajinga bantu bayukile byo najinga kwandengelanga kuchina bantu. Kino kyandengejile kukankalwa kwingila papela bulume bwami mu mwingilo wa kusapwila.
Byo najinga na myaka kukila pa 20, twafumine ku Namibia ne kuvilukila ku South Africa, kabiji kyo kyajinga kimye kitanshi kutanwapo ku kipwilo. Naumvwine bingi bulongo. Nangwa byonkabyo, bantumbwile jikwabo, pano luno bambikile kajitumbo mwakufumina malabishi.
Byo papichile kimye, naumvwine kalama wa mwanzo na kwamba pa mwingilo wa bupainiya. Byambo byo aambile byamfikile pa muchima. Nayukile kuba’mba kechi nji na butuntulu bwa mubiji bwawama kya kuba naingila bupainiya ne, pano bino, namwene Yehoba byo ankwashishenga mu makatazho ami. Onkao mambo, nanembeshe bupainiya bwa kimye kyonse. Nangwa byonkabyo, na mambo a kukolwa kwami, bakulumpe mu kipwilo bakankazhamine kwitabizha pepala wami wa kunembeshapo bupainiya.
Nangwa kyajinga bino, nafuukwilepo kwingila mwingilo wa kusapwila Bufumu papelela bulume bwami. Bamama ne bakwabotu bankwashishe kwingila maola a bupainiya kukila pa bañondo batanu na umo. Kino kyamwesheshe kuba’mba nakonsha kwingila bupainiya nangwa kya kuba najinga na kikola. Nanembeshe jikwabo bupainiya kabiji banswishishe. Onkao mambo, natendekele bupainiya bwa kimye kyonse pa 1 September, 1988.
Nemwena Yehoba byo ankwasha mu mwingilo wa bupainiya. Mu kifulo kya kuta muchima pa makatazho ami, kufunjisha bakatataka bukine kwanzhikijila ne kuntekenesha ne kunkwasha kukosesha bulunda bwami ne Yehoba. Kufunjisha bantu ne kumona byo bepana kwi Lesa ne kubatizhiwa kundetela bingi lusekelo.
Kikola kyami kechi kikapwa ne. Pano bino, Yehoba ‘unsendela kisendwa kyami pa juba pa juba.’ (Sala. 68:19) Lesa unkwasha pa kuba’mba nchinchike ne kwikala na lusekelo.