MUTWE WA PA NKUPIKO | NANCHI LESA WANEMA MU BWIKALO BWETU NYI

Mambo ka Bamo o Balangulukila Amba Lesa Kechi Wanema mu Bwikalo Bwabo Ne?

Jibumba ja bantu babula kwitabila mwi Lesa banembele byambo pa kipabi bya kuba’mba, “Nanchi Lesa wanema mu bwikalo bwenu nyi? Bavula kechi baketekela mwi Lesa ne.” Bino byambo bimwesha kuba’mba bano bantu bamona amba Lesa kechi wanema mu bwikalo bwabo ne.

Bakwabo nabo bamba’mba aba baitabila mwi Lesa bafuukula bintu bimwesha kuba’mba kechi baitabila mwi aye ne. Bishopu wa Kikatolika aye Salvatore Fisichella, waambile pa bantu ba mu chechi yanji amba: “Na mambo a byubilo byetu byatama, bilengela bantu kukankalwa kwitupusanyako na babula kwikala bena Kilishitu.”

Bamo na mambo a kupayankana kechi balanguluka ne pe Lesa ne. Balanguluka amba uji kwalepa kabiji amba kechi wakonsha kwibakwasha mu bwikalo bwabo ne. Bano bantu balombatu kwi Lesa umvwe kya kuba baikala na makatazho nangwa inge pabiji byo bakajilwa.

Bamo kechi balondela byo bafunda ku bupopweshi bwabo ne, kampe na mambo a kulanguluka amba kechi byanema ne. Kwambakotu pa kimo kyamwekele, ba Katolika bavula mu kyalo kya Germany balanguluka amba kijitu bulongo wamulume ne wamukazhi kwikala pamo saka bakyangye kwisongola. Luno lufunjisho lwapusana na byo bafunjisha mu chechi yabo ne byamba Baibolo. (1 Kolinda 6:18; Bahebelu 13: 4) Nangwa kya kuba bantu ba mu bupopweshi bwavula bamba’mba bapopwela Lesa, bino kechi balondela byo akeba ne. Bantangi ba bupopweshi bavula bamba’mba bantu baya ku chechi, bwikalo bwabo bujitu nobe bantu babula kuya ne ku chechi.

Na mambo a bino byaambiwapo, bantu bepuzha amba: Nanchi Lesa wanema mu bwikalo bwetu nyi? Kechi twakonsha kukumya pa buno bwipuzho ne. Mambo uno mutwe wanembwa ne mu mabuku akutendekelapo mu Baibolo. Pa kuba’mba tukumbule buno bwipuzho, twayai twisambe pa mitwe yanembwa mu buku wa mu Baibolo wa Ntendekelo.