MUTWE WA PA NKUPIKO | NANCHI LESA WANEMA MU BWIKALO BWETU NYI

Ene Mambo Lesa o Anemena mu Bwikalo Bwetu

Bashayuka batala pa butuntulu bwa bantu, bamba’mba pa kuba amba bantu bekale na lusekelo bakebewa bintu bikwabo. Tumona kino mambo bantu bakeba kuba bintu mwakonsha kufuma byawama, kufikizha bikonkwanyi nangwa kwingijila muntu ye bamona kuba’mba wanema. Pa kuba bino, bamo bengijisha kimye kyabo na kutamba bilengwa na Lesa, byakulengalenga ne kwimba nyimbo ne bikwabotu. Nangwa kya kuba boba bino, kechi bekala na lusekelo ne.

Byo kiji kuba’mba bantu baji na kisemwa kya kukeba kufunda pe Lesa, kino kilengela batanga Baibolo kubula kukumya. Bitango bitanshi bya mu Ntendekelo bimwesha kuba’mba panyuma ya kulenga bantu batanshi, Lesa wisambanga nabo javula kabiji kino kyalengejile bulunda bwabo ne aye kukosa. (Ntendekelo 3:8-10) Lesa kechi walengele bantu kuba’mba belamenga abo bene ne; bino amba batangijilwenga na Mulenga wabo. Baibolo wamba pa kino javula.

Kyakumwenako, Yesu waambile’mba: “Bo bene balusekelo baji na muchima wa kukeba kuyuka Lesa, mambo Bufumu bwa mwiulu bo bwabo.” (Mateo 5:3) Bino byambo bitumwesha amba, pa kuba’mba twikale bwikalo bwa lusekelo twafwainwa kuyuka Lesa. Twakonsha kuba byepi bino? Byambo byaambile Yesu byakumbula buno bwipuzho amba: “Muntu kechi ukamwena bumi mu kajo konkatu ne, poso ne mu byambo bifuma mu kanwa ka Yehoba.” (Mateo 4:4) Mu ñanyi mashinda byambo byaambile Lesa ko kuba’mba mafunde anji atanwa mu Baibolo mo akonsha kwitukwashisha kwikala na lusekelo? Twayai twisambe pa bintu bisatu byanema.

Tukeba Lutangijilo Lwawama

Lelo jino, kuji bashayuka bavula bingi bakwasha bantu pa bulunda, butemwe, bya kwikala mu kisemi, bya kupwisha lutobo, kwikala ba lusekelo ne nkebelo ya bumi. Ñanyi wakonsha kupana lutangijilo lwawama mu bino bintu kwakubula Mulenga wa bantu aye Yehoba Lesa?

Kyakumwenako: Umvwe mwapota kiñambañamba kimo, nabiji kamela nangwa kompyuta, muketekela kutanamo kabuku mwanembwa byo mwafwainwa kwingijisha kyo kyo kiñambañamba kyo mwapota. Twakonsha kwesakanya Baibolo ku kano kabuku. Ke buku Lesa mo anemba mizhilo ya kulondela bantu. Uno “buku” ulumbulula byo twafwainwa kuba ne byo twakonsha ku mwingijisha mu bwikalo bwetu pa kuba’mba tukekale bulongo.

Byonka bikalatu buku ye banembamo mizhilo ya kulondela, Baibolo ujimuna bamutanga ku byubilo byakonsha kwibalengela kulama bulongo kino “kipe”, ko kuba’mba bumi bwetu. Byambo bitubula bantu byakonsha kumweka nobe byakonsha kukwasha, bino tukamwenamo byawama ne kuchinuzhuka makatazho umvwe twalondela bitubula Mulenga.

Nangwa kya kuba Yehoba Lesa witupa mikambizho, kechi witukanjikizha kwiilondela ne. Na mambo a kuba’mba witutemwa kabiji ukeba kwitukwasha, wamba’mba: “Amiwa ne Yehoba Lesa wenu, yenka wimufunjisha’mba mukamwenemo byawama, kabiji wimutangijila mu jishinda jo mwafwainwa kuyamo. Mama! inge mwakokejile mikambizho yami, inge mutende wenu waikajile nobe mukola, kabiji inge bololoke bwenu bwaikajile nobe manyaki a pa kalunga ka mema.” (Isaya 48:17, 18) Umvwe kya kuba’mba ke tukokele mizhilo ya Lesa tukamwenamo byawama. Mu jishinda jikwabo, pa kuba’mba twikalenga bulongo ne kwikala na lusekelo, tukeba Lesa.

Tukeba Kuyuka Kintu Kine Kilengela Makatazho

Bamo balanguluka amba kechi bakeba Lesa ne na mambo a makatazho o bapitamo mu bwikalo, ebalengela kumona Lesa nobe wakanama. Kyakumwenako, bakonsha kwipuzha amba: ‘Mambo ka bantu bawama o bayanjila?’ ‘Mambo ka baana babula kuyukapotu nangwa kimo o basemenwa bilema?’ ‘Nanchi mu bwikalo mwavujila ka buyanji?’ Ano mepuzho anema bingi, kabiji kutana mikumbu ya ano mepuzho kwakonsha kulengela bumi bwetu kuwama. Mu kifulo kya kupamo Lesa mambo pa ano makatazho, twayai tumone Baibolo, Mambo a Lesa byo asakwitukwasha kuyuka bishinka pa kino.

Mu kitango kya busatu mu buku wa Ntendekelo, muji jishimikila jaamba pe Satana awo waingijishe mulolo kujimbaika bantu batanshi kubula kumvwina mukambizho wa Yehoba Lesa wa kubula kuja ku kichi kya kuyuka byawama ne byatama. Satana wabujile Evwa kuba’mba “kechi mukafwa ne. Mambo Lesa wayuka’mba mu juba jo mukajako, meso enu akalaba; kabiji mukekala pamo nobe Lesa mwine ne kuyuka byawama ne byatama.”—Ntendekelo 2:16, 17; 3:4, 5.

Kwingijisha bino byambo, Satana kechi waambilengatu amba Lesa uji na bubela ne, bino ne kuba’mba jishinda jo alaminamo bantu kechi jawama ne. Diabola waambile’mba umvwe kya kuba’mba bantu balondejile byo ebabujilenga inge bintu bibawamijile. Ano makatazho akonsha kupwa byepi? Yehoba wafuukwilepo kuba’mba papite kimye pa kuba’mba bantu bonse bakayuke amba byo bamubepeshenga byajinga bya bubela. Kiji nobe Lesa wapelenga Satana ne boba bamulondela kimye kya kumwesha umvwe bakonsha kwilama kwakubula Lesa.

Nanchi mulangulukapo amba ka pa byaambile Satana? Nanchi bantu bakonsha kwilama abo bene kwa kubula Lesa nyi? Buyanji, nshiji, bikola, lufu, kutama kwa byubilo, makondo ne makatazhotu akwabo apitamo bantu bimwesha kuba’mba bantu kechi bakonsha kwitangijila abo bene kwakubula Lesa ne. Mu kifulo kya kwamba’mba Lesa ye ulengela ano makatazho, Baibolo waamba pa kine kintu kyalengela bino byonse amba: “Muntu umo byo oba bunkambo pa muntu mukwabo mu kumuyanjisha.”—Musapwishi 8:9.

Na mambo abino byonse byaambiwapo, nanchi kechi twakonsha kuketekela mwi Lesa kuba’mba ukapwisha makatazho abena kupitamo bantu ne nyi? Nanchi Lesa ukoba byepi pa kupwisha ano makatazho?

Tukeba Lesa Kwitukwasha

Bantu kufumatu ne kala bakeba wa kwibamunako ku bikola, kukota ne lufu. Bebikako bingi ne kutaya mali avula pa kubatu amba bapwishe bino bintu, bino bapulwilamotu mabula. Bamo baketekela amba bakonsha kupwisha bino kupichila mu kutoma michi yapusana pusana yakonsha kwibalengela kubula kukota. Mu kuba bino, kafwamo byo bamwenamo ne.

Lesa ukeba bantu kwikala balusekelo. Byobyo akebelenga kimye kyo alengele bantu kabiji kechi walubamo ne. (Ntendekelo 1:27, 28; Isaya 45:18) Yehoba Lesa witulaya kuba’mba ukafikizha milaye yanji kabiji kechi ukakankalwa ne. (Isaya 55:10, 11) Baibolo witubula mulaye wa Lesa wa kubwezha Paladisa waelele ba Adama ne Evwa. Mu buku wapelako wa mu Baibolo, tutanamo byambo byaamba’mba: “Aye [Yehoba Lesa] ukashimuna mipolo yonse ku meso abo; ne lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne: Bintu bitanshi byapichijila.” (Lumwekesho 21:4) Nanchi Lesa ukoba byepi pa kuleta bino bintu byawama kabiji twakonsha kumwenamo byepi mu uno mulaye?

Mwana Lesa aye Yesu Kilishitu wafunjishe baana banji ba bwanga bya kulomba kuba’mba kyaswa muchima wa Lesa kyubiwe. Bantu bavula bayuka luno lulombelo kabiji bamo baamba’mba Lulombelo lwa Nkambo, lwaamba’mba: “Tata wetu wa mwiulu, jizhina jenu jizhile. Bufumu bwenu bufike. Kyaswa muchima wenu kyubiwe pano pa ntanda, byonka byo kibena kubiwa mwiulu.” (Mateo 6:9, 10) Bufumu bwa Lesa jo jishinda Yehoba jo akengijisha kupwishishamo makatazho abena kufuma mu bukalama bwa bantu ne kuleta ntanda ipya yaoloka yo alayile.a (Danyela 2:44; 2 Petelo 3:13) Twakonsha kuba byepi pa kuba’mba tumwenemo mu mulaye wa Lesa?

Yesu Kilishitu witubula kintu kyo twafwainwa kuba amba: “Pa kuba amba bakekale na bumi bwa myaka, bafwainwa kwimuyuka anweba Lesa yenka wakine ne Yesu Kilishitu ye mwatumine.” (Yoano 17:3) Na mambo a bukwasho bwa Lesa, twakonsha kutambwila bumi bwa myaka ne myaka mu ntanda ipya ya mulaye. Uno mulaye wakonsha kwimulengela kushiinwa kuba’mba Lesa wanema mu bwikalo bwetu.

Kimye kya Kuketekela mwi Lesa

Papita ne myaka 2,000 kufuma Paulo po aambijile ku bena Atene pa Aleopagusa pe Lesa amba: “Mambo aye ye upa bantu bonse bumi, muya ne bintu byonse. Mambo Lesa ye ulengela amba twikale na bumi ne kwenda, byonkatu byaamba nsansawilo yenu amba, ‘Mambo ne atweba twi baana banji.’”—Byubilo 17:25, 28.

Byambo byaambile Paulo kubena Atene ne lunotu bingila. Mulenga wetu witupa mwela ye tupeema, kajo ko tuja ne mema o tutoma. Kechi twakonsha kwikala bomi kwakubula bintu byawama Yehoba byo etupa ne. Pano mambo ka Lesa o atwajijila kupa bantu bonse bino bintu nangwa kya kuba bamo kechi boba bimutokesha ku muchima ne? Paulo waambile’mba ‘Lesa wasaka bantu kumukeba, kumupampanta ne kumutana. Kabiji kechi uji kwalepa ne atweba ne.’—Byubilo 17:27.

Nanchi mwakonsha kutemwa kuyuka Lesa bulongo ko kuba’mba kufunda pa nkebelo yanji ne pa bintu byo etubula pa kuba’mba twikalenga bulongo nyi? Umvwe byobyo kiji, twimutundaika kubula muntu wimuletejile uno magazini nangwa kubula bamunemba. Bakatemwa bingi kwimukwasha.

[Tubyambo twa mushi]

[Kipikichala pa peja 5]

“Amiwa ne Yehoba Lesa wenu, yenka wimufunjisha’mba mukamwenemo byawama, kabiji wimutangijila mu jishinda jo mwafwainwa kuyamo. Mama! inge mwakokejile mikambizho yami, inge mutende wenu waikajile nobe mukola, kabiji inge bololoke bwenu bwaikajile nobe manyaki a pa kalunga ka mema.”—Isaya 48:17, 18.

[Kipikichala pa peja 4]

Byonka bijitu kabuku mwanembwa byakwingijisha kiñambañamba, Baibolo wakonsha kwitutangijila mu bwikalo

[Mabulañano pa peja 6]

Mu Baibolo, twakonsha kutanamo lutangijilo ne bukwasho bo tukeba

[Kipikichala pa peja 7]

Lesa ukeba bantu kwikala balusekelo pa kino kimye ne myaka yonsetu