MEPUZHO AFUMA KU BATANGA

Ñanyi bintu byataana bashayuka ba bya kupoyapoya bimwesha’mba kine muzhi wa Yeliko bamukundwile mu kimye kichechetu?

Yoshua 6:10-15, 20 waamba’mba bashilikale bena Isalela bazhokolokelenga muzhi wa Yeliko jimo pa juba pa juba pa moba atanu na jimo. Pa juba ja butanu na bubiji, bazhokolokele muzhi bimye bitanu na bibiji. Kepo Lesa alengejile masakwa akosa a Yeliko kukunduka, ne bena Isalela bashinjile uno muzhi. Nanchi bashayuka ba bya kupoyapoya bataanapo bishiino bimwesha’mba muzhi wa Yeliko bamuzhokolokele pa moba achechetu, byonka byaamba Baibolo nyi?

Mu moba a kala, muzhi bamuzhokolokanga ku bashilikale pangye ya nsakwa yanji, saka benengezha kumulukuka. Inge muzhi bamuzhokoloka pa moba avula, bantu bajimo bajanga kajo kavula ko balama. Inge kimye kya kulukuka yewo muzhi kyafika, bashilikale basendanga byonse byo bakeba, kuvwangakotu ne kajo kashalangamo. O ene mambo bashayuka ba bya kupoyapoya o babujila kutaanamo kajo mu mizhi yonse ya mu Pelisitina yo balukukile mu jino jishinda. Bino byo balukukile muzhi wa Yeliko byapuseneko. Magazini umo waamba’mba: “Bintu byavula byo bataaine mu bikulukulu bya uno muzhi byajinga bipe bya buchimba ne kajo ka mapeke kavula.” Wanungapo’mba: “Kutaana kajo ka mapeke kavula bibye mu muzhi ye balukuka ke kintu kya kukumya bingi.”—Biblical Archaeology Review.

Baibolo waamba’mba bena Isalela kechi basendelemo kajo nangwa kamo mu muzhi wa Yeliko ne, mambo Yehoba wibakainye. (Yoshua 6:17, 18) Waamba ne kuba’mba bena Isalela balukukile muzhi wa Yeliko mu kimye kya kisalo, mu muzhi saka muji kajo kavula ko balamine mambo po po bapwishishetu kunowa. (Yoshua 3:15-17; 5:10) Onkao mambo, byo bataainemo kajo kavula mu muzhi wa Yeliko panyuma ya kumulukuka, kyo kishiino kimwesha’mba bamuzhokolokeletu pa moba acheche, byonka byaamba Baibolo.