Nanchi Bantu Bafwa Bakekala Na Bumi Jibiji Nyi?

Kafwako wakonsha kunyema lufu ne, bino nanchi muntu inge wafwa ko kuba’mba kyapwa kechi ukekalapo na bumi jibiji nenyi? Nanchi bantu bafwa, Lesa wibalubako nyi? Abya nanchi bakonsha kusangulwa nyi?

BAIBOLO WAAMBA’MBA:

LESA KECHI WALUBAKO BANTU BAFWA NE

“Aba bonse baji mu bilende . . . bakomvwa jiwi janji ne kufumamo.”—Yoano 5:28, 29.

Lesa uvuluka bantu bafwa; kabiji aba bonse baji mu kivuluko kyanji bakekala bomi jibiji.

KUKEKALA LUSANGUKO PANO PA NTANDA

“Kukekala lusanguko lwa baoloka ne babula koloka.”—Byubilo 24:15.

Bantu bavula bafwa bakebasangula, kabiji bakekala na luketekelo lwa kwikala myaka ne myaka mu ntanda ya mutende.

MWAKONSHA KUKETEKELA MU MULAYE WA LUSANGUKO

“[Lesa] ubala tubangabanga; witutela tonse pa mazhina ato.”—Salamo 147:4.

Inge kya kuba Lesa wakonsha kutela tubangabanga tonse pa mazhina, ko kuba’mba wakonsha kuvuluka bantu bonse bo akeba kusangula.