‘Nanchi Nafwainwa Kuba Byepi?’
1 ‘Nanchi nafwainwa kuba byepi?’ Kwakubula nangwa kuzhinaukatune, jino jipuzho jajinga mu milanguluko ya kajibumba kacheche ka binungwa bya basambi ba Baibolo, kanengezhiwe na Charles Taze Russell mu myaka ya ba 1870. Basambi batanshi ba Baibolo byo banungulukile kuya palutwe mu kumvwisha kyaswa muchima wa Lesa, beipwizhenga pa byo bafwainwe kuba pakuba’mba bakwashe bantu bakwabo kufunda bikeba Lesa. Pakuba’mba basapwile ku bantu pano pa ntanda ponse buyuke bwa Baibolo bobafunjilenga wajinga mwingilo mukatampe bingi.
2 Ke kya lusekelo bingi ko tuji pakuba bakonsheshe kushinda alo lukatazho. Mu ñanyi jishinda? Muntu pa muntu yense waubile lubaji lwanji lucheche, kya kuba lelo, Bakamonyi ba kwa Yehoba babayukanyikwe bingi pano pa ntanda ponse—jibumba jiji na bakataya mbila bafika pepi na mamilyoni 6 baji mu bipwilo byafika ku 90,000 mu byalo ne makuji 234!—Isa. 60:22
3 Panai Bukwasho Bwenu Bwawaina: Ke kintu kyanema bingi kwi atweba pa muntu pa muntu kwikalamo na lubaji mu uno mwingilo mukatampe Yesu ye aambijile jimo kuba’mba ukengijiwa mu ano moba apelako. (Mako 13:10) Kya kine uno mwingilo kechi wakulekelatu bakulumpe bunkene; nangwa kumulekela mu maboko a bapainiyatu bunke bwabone. Kine kine, mwina Kilishitu yense wipana uji na lubaji lukatampe mu uno mwingilo. Atweba bonse twafwainwa kwikalako na jishinda jimo ja kusapwilamo. (1 Timo. 1:12) Kwibikako kwetu konse kotuba mu uno mwingilo, twinonkesha atwe bene ne bantu bakwabo.—1 Timo. 4:16.
4 Muntu yense wakonsha kukwasha kutundaika bwanabwankazhi bwetu bwa bwina Kilishitu mu mashinda akwabo anema. Twakonsha kutundaika kupwila kwa kipwilo kupichila mu kutanwako kimye kyonse ne kwivwangamo na kizaku. (Sala. 122:1, 8, 9) Twafwainwa kwingila lubaji lwetu lwa kwikala na byubilo byawama kuba’mba kipwilo kibule kaneneno. Twafwainwa kupanako bukwasho bwa mali a kutundaika mwingilo wa ntanda yonse kwesakana na byonse byo tuji nabyo. Kabiji twafwainwa kwikalamo na lubaji mu kuwamisha Nzubo ya Bufumu. Yense wafwainwa kutundaika mupashi wa butemwe ne buumo mu kipwilo kupichila mu kukwasha bapya, bana babacheche, ne bakote pamo.—Ko. 3:12, 14.
5 Pano mwakonsha kwipuzha kuba’mba, ‘Nanchi nafwainwa kuba byepi?’ Nangwa kya kuba’mba kwingila kwenu kwa na ngovu kwakonsha kumweka kukepa, kupichila mu kwingila lubaji lwenu, mukalengela kipwilo kwikala kyakosa, kyabambakana, kabiji kituntulu. Mu jojo jishinda atweba bonse tuji na lubaji lukatampe lwa kunemeka jizhina ja Yehoba!