Kutana Lusekelo mu Mwingilo Wenu Wazhila

¹ Babwelele “na lusekelo.” Baibolo ishimuna byo beumvwine bana ba bwanga 70 kimye kyo babwelele kwi Yesu, pa nyuma ya lwendo lwa kusapwila mu mizhi yonse yo batuminweko. Bajinga bingi na lusekelo na mambo a kuba kyaswa muchima wa kwa Lesa. (Luka 10:17) Nanchi bika byakonsha kwimukwasha ne anweba kutana lusekelo lwatainepo bana ba bwanga mu mwingilo wenu wazhila?

² Byubilo Byawama: Muji na jishuko jimupa Lesa ja kusambijisha bantu nkebelo ikatampe ya kwa Yehoba. Kupichila mu kusapwila, mwakonsha kukwasha muntu kufuma ku byubilo byatama bya kino kyalo ne kumukasulula mu mfungwa ya bupopweshi bwa bubela. Mwakonsha kumwesha bantu luketekelo lwa bumi bwa myaka ne myaka mu ntanda yabulamo makondo ao o tuji nao lelo. Langulukai pa lusekelo lwikala ne Yehoba inge mwabyala bulongo nkunwa ya kine mu muchima wa muntu umvwa. Iketekelai pa kulomba mupashi wa kwa Lesa kunungulula mwi anweba kipangwa kya lusekelo byo mu bena kwingila butumwa na muchima wenu yense.

³ Kwibafunjisha Bya Kwingila: Kimye kya mikambizho Yesu kyo afunjishenga bana banji ba bwanga 70 kyapashañanyishiwa ku Kupwila kwa Mwingilo kwa moba a lelo. Wibafunjishe kuba’mba bakonshe kwingila bulongo butumwa bwabo. (Luka 10:1-16) Lelo jino Kupwila kwa Mwingilo kwimufunjisha mashinda akwambilamo na bantu, byo mwakonsha kutendeka misambo, ne kutangijila masambijilo a Baibolo. Kupichila mu kutako muchima ku luno lufunjisho ne kuwamishako busendwe bwa busapwishi bwenu, mukamona kuba’mba bumvu nangwa kupelelwa ko mwiumvwanga kala bikapwa kabiji mu kekala na luketekelo ne lusekelo.

⁴ Tai muchima ku Kimye kya Kulutwe: Yesu wataine lusekelo mu mwingilo wanji wazhila kechi na mambo a kumanyikwa koapichilengamo ne. Mambo ka? Mambo akuba wateshe muchima ku mapesho ne mashuko ajinga kulutwe yanji. (Hebe. 12:2) Nenuwa mwakonsha kuba kintutu kimo kupichila mu kuta muchima ne milangwe yenu pa jizhina ja kwa Yehoba ne pa mapesho akekala mu ntanda ipya ya kwa Lesa. Kino kikanungako lusekelo ne bipangwa mu butumwa.

⁵ Kwingijila Yehoba mwingilo wazhila ke jishuko jikatampe jo mwakonsha kwikala najo lelo jino. Onkao mambo, ambai kuba’mba: “Nsekela bingi mu kuba kyaswa muchima wenu, anweba Lesa wami.”—Sala. 40:8.