Teshai Muchima ku Mingilo ya Kukumya ya kwa Lesa

¹ Pa moba asatu awamisha, twajinga pa Kupwila kwa Nkambi kwa “Ba Kuba Kyambo kya kwa Lesa.” Twavulamine bya kutabataba bya pa juba pa juba ne kutesha muchima ku mingilo ya kukumya ya kwa Yehoba. Pologalamu yakokozhewelwe kubaisha lwitabilo lwetu mwi Lesa ne mu Kyambo kyanji, kukosesha bulunda bwetu ne aye ne kubaisha kizaku kyetu mu butumwa. Nanchi tubena kumwenamo byepi mu bintu byo twafunjishiwe?—Yoa. 13:17.

² Anweba Bisemi Kokelai Kyambo kya kwa Lesa: Jashi ja kushilañana jajinga na mutwe wa kuba’mba “Kokelai Kyambo kya kwa Lesa” jitukwashishe kupengauka bwikalo bwa ku mupashi bwa bisemi byetu. Bana batemwa kufunda. Onkao mambo, bansemi bakamwa Lesa batundaikilwe kulenga jisambijilo ja Baibolo kwikala kitendekesho kya kukomesheshamo kisemi kyakosa lwa ku mupashi. Mitwe ya bisemi yavula ibena kwisambila pamo na bana babo ba bacheche mu buloshuwa mupya wa kuba’mba Mwakonsha Kwikala Balunda na Lesa! Kino kikebakwasha kunungulula bulunda bwa lusekelo na Yehoba, bulunda bwakosa ne kuketekelwa. Bansemi, funjishai bana benu byo bakonsha kutesha muchima ku biumvwa Lesa. Ikalai ba kumwesha byo mwamutemwa ne byo mwatemwa byanji byonse byawama. (Sala. 103:2) Ingijilai pamo mu kufika pa bikonkwanyi bya ku mupashi ne kwingijila Yehoba na muchima yense.

³ Kyambo kya kwa Lesa Kimunyika mu Jishinda Jetu: Twatemenwe bingi pa kutambwila buku mupya wa kuba’mba Ukusesema kwa kwa Esaya—Ulubuuto lwa Bantu Bonse I. Nanchi mwafika pepi mu kutanga uno buku mutanshi? Buku wa Isaya washimwina jimo malwa a luzhachisho akafikila mikoka ibula kwakamwa Lesa kabiji washimuna ne mapesho awama a Bufumu ku bantu ba kwa Lesa. (Isa. 34:2; 35:10) Kabiji uno buku utundaika kwikala na lwitabilo ne luketekelo mwi Yehoba ne mu jishinda jo obilamo bintu.—Isa. 12:2-5.

⁴ Pa kutanga buku wa Ukusesema kwa kwa Esaya I, bukiji-bukiji mwakonsha kumona Isaya byo asungijile bulumbuluke bwanji kwi Yehoba saka azhokolokwa na bubi. Isaya byo aichilwe kwikala muluwe wa kwa Lesa, wakumbwile’mba: “Amiwa bano! Ntumai amiwa.” (Isa. 6:8) Kulanguluka pa kwingila kwanji kwa kwitemenwa kukemutundaika kutwajijila kusapwila mambo awama, mwa “kwibashimwina ba mu mikoka yonse ya bantu.”—Mat. 24:14.

⁵ Kutesha muchima kwetu ku mingilo ya kwa Yehoba kukanemeka bukata bwanji. Onkao mambo shingikai jishuko ja kwikala ba kuba kyambo kya kwa Lesa!