Nanchi Kupwañana kwa Bwina Kilishitu Kwanema Byepi?
1 “Kafwako muntu wikala bunke ne.” Ino ñambilo yaambile munembeshi wa nsansawilo wajiko mu kitota-myaka kya bu 17, yo ñambilo imo yaamba Baibolo pa mambo a kintu kikeba bantu—kupwañana pamo na bakwetu. (Mana. 18:1) Kupwañana na bena Kilishitu bakwetu kwitufweta. Mu ñanyi mashinda?
2 Mu Mwingilo: Mfweto ikatampe yotutanamo, ke jishinda jitukosesheshamo balongo betu ne kwitutundaika mu mwingilo wetu. Yesu watumine baana banji ba bwanga “babiji, babiji” kuya na kusapwila. (Mako 6:7; Luka 10:1) Mu kwingijisha jino jishinda, byo twingijila pamo na bakwetu mu mwingilo wa mu bujimi, tumona bukine bwa byambo biji pa Musapwishi 4:9, 10. Byo twingila mwingilo na bakwetu, lwitabilo, lukokelo ne butemwe bwabo bwitutundaika ne kukosesha kizaku kyetu.
3 Kwitukwasha: Balongo betu betukosesha ne kwitubulako byotwakonsha kuchinchika ku makatazho ne kushinda meseko. Bakwetu bena Kilishitu bakonsha kwitubulako binembelo byaamba pa lukatazho lo tujimo. Bakonsha ne kwitulombelako byonka byo tuba netuwa kwi abo. (2 Ko. 1:11) Kabiji kumwena kwi abo nako kwitukosesha ne kwitutundaika kwingila mingilo yawama.
4 Ku Kupwila: Twakonsha kwiyowa buwame bwa kupwañana na bena Kilishitu bakwetu umvwe ketutanwe ku kupwila kimye kyonse. (Hebe. 10:24, 25) Kwikala mafunjisho avula a ku mupashi kabiji kutanwako kwitupwanya pamo na bakwetu baitabila. Kuno kupwila kwitupa jishuko ja kuteleka ku balongo ne banyenga yetu byo babena kulumbulula lwitabilo lwabo, kikale pa pulatifomu nangwa mu luonde. (Loma 1:12) Kupwañena kwetu pamo kukoselako byo twisamba kimye kya kupwila saka kikyangye kutendeka ne panyuma ya kupwila. Bimye bya uno mutundu byo byo tushimikizhamo ku bakwetu byo twapitamo byakonsha kukosesha lwitabilo lwabo. Bumuntu bwetu buwaminako byo tupwañana na bantu ba Yehoba batemwa Byambo byanji ne mwingilo wanji.—Fili. 2:1, 2.
5 Tukeba bakwetu bena Kilishitu. Kwakubula abo, kyakonsha kwitushupa bingi kwenda mu jishinda jakatazha jiya ku bumi. Bino, na mambo a butemwe bwabo ne kwitukosesha, twakonsha kutwajijila kwendamo kufikatu ne byo tukatwela mu ntanda ipya ya Yehoba ya bololoke.—Mat. 7:14.