Tambulai Lufunjisho Lwawama Bingi

Juba ja pa Mulungu, August 6, 2006, jajinga juba bakulumpe ne bankwasho 24 jo bapwishishe Sukulu ya Lufunjisho lwa Mwingilo nambala 33.

Ino sukulu ipanako maana pa bya kutangijila mu mwingilo wa busapwishi, bya kwingila mwingilo wa kufunga jitanga ne bya kufunjisha mu kipwilo. Kimye kya uno sukulu wa milungu itanu na isatu, baana basukulu bachikamenamo bingi mu kufunda Baibolo. Bafunda mafunjisho avula bingi a mu Baibolo ne mingilotu ikwabo ya bukafunga ne mashinda mwa kupwishisha makatazho a mu bwikalo bwa bena Kilishitu. Kabiji bafunda ne pa Binembelo byo bifunjisha pa mambo a buntangi, bya kuchiba mambo ne bintu bikwabo bya mu jibumba jetu. Bebafunjisha bya kwamba pa mvula bantu ne kwibakwasha pa muntu pa muntu kuyilako palutwe ku mupashi.

Kimye kya kupwila kukatampe, bakulumpe ba makambi basambakana na bakulumpe ne bankwasho mu kipwilo bakatanda baji na myaka ya kusemwa pakachi ka 23 ne 50 kabiji abo bakeba kufunjishiwa kwi Yehoba pa kimye kya bañondo babiji. (Mika 4:1, 2) Na lulombelo langulukishaipo pa uno mutwe umvwe kya kuba mwakonsha kutambula luno lufunjisho lwawama bingi kuba’mba mwikale na “lujimi wa bafunda” awo ukalengela bantu kumwenamo.—Isa. 50:4.

Kimye kyanembelwenga uno Mwingilo Wetu wa Bufumu, kalasi nambala 34 ya Sukulu ya Lufunjisho lwa Mwingilo po po yatendekeletu.