Nanchi Mwaitabila mu Milaye ya Yehoba na Muchima Yense Nyi?

Yoshua ne Solomone bashiinwe’mba byonse byalayile Yehoba byafikile. (Yos 23:14; 1Mf 8:56) Byambo byaambile bano banabalume baketekelwa bingi bitulengela kwikala na lwitabilo lwakosa.—2Ko 13:1; Tit 1:2.

Yehoba wafikizhe byepi byo alayile mu moba a kwa Yoshua? Tambai pamo na kisemi kyenu vidyo wa kuba’mba, “Kafwako Nangwa Kimo Kyabula Kumweka Ne.” Isambai pa ano mepuzho: (1) Twakonsha kwikala byepi na lwitabilo lwajingapo ne Lehaba? (Heb 11:31; Ya 2:24-26) (2) Kyamwekejile Akana kimwesha byepi amba kusatukila Lesa kyanshiji mufuma byatama? (3) Mambo ka bena Gibeona o babepejile Yoshua ne kulayañana lulayañano lwa mutende na bena Isalela nangwa kya kuba nabo bajinga bashilikale? (4) Byambo bya Yehoba byafikile byepi kimye bamfumu batanu ba bena Amoli kyo balukukile bena Isalela? (Yos 10:5-14) (5) Yehoba wimukwasha byepi byo mwatwajijila kutangizhako Bufumu bwa Lesa ne bololoke bwanji mu bwikalo bwenu?—Mat 6:33.

Kulanguluka pa bintu Yehoba byo aubile kala, byo abena kuba luno ne byo akoba kulutwe kukosesha lwitabilo lwetu mu milaye yanji—Lo 8:31, 32.