Byambo Bikwabo bya mu Mutanchi wa Kupwila kwa Bwikalo ne Mwingilo
AUGUST 5-11
BYA BUNEME BIJI MU MAMBO A LESA | 2 TIMOTI 1-4
“Lesa Kechi Witupele Mupashi wa Moyo Ne”
Anweba Bakyanyike—Kuya Palutwe Kwenu Kumweke
9 Pa kuba’mba amukwashe Timoti, Paulo palutwe kacheche wamuvulwilemo amba: ‘Lesa kechi witupele mupashi wa moyo ne; poso wa bulume ne wa butemwe ne wa kwilama.’ (2 Timo. 1:7) “Kwilama” kwavwangamo kulanguluka ne kumona jishinda jawama kubilamo bintu. Kabiji kwavwangamo bulume bwa kuba bintu monkatu mo kyafwainwa, nangwa kya kuba muntu kechi byo byo abakebenga amba kikale ne. Bakyanyike bamo bakyangye kukoma ku mupashi bamwesha muchima wa kuchina ne kuchinuzhuka kulangulukanga pa bintu bimo kupichila mu kulaala kimye kyabaya nangwa kutamba malangalanga (TV), kwingijisha bizhima nangwa kutoma maalwa bibi, kutwajijila na kuba bya kisangajimbwe, ne kwitumpa mu bulalelale. Bena Kilishitu bebafunda amba: ‘Bakanenga bumbulwa kwakamwa Lesa ne bya lwiso lwa panopantanda, bekale batekanya, ne baoloka, ne ba kunemeka Lesa panopantanda.’—Titu. 2:12.
‘Kosai ne Kuchinchika!’
7 Paulo byo anembejile Timoti waambile’mba: “Lesa kechi witupele Mupashi wa moyo ne; poso wa bulume. . . . Byonkabyo obewa kechi wikubile bumvu kushimuna ko umushimuna Nkambo yetu ne.” (2 Timoti 1:7, 8; Mako 8:38) Panyuma yakuba twatanga bino byambo, twafwainwa kwishikisha amba: ‘Abya nanchi lwitabilo lwami nelubila bumvu nyi, inyi na kosa? Nanchi kunkito ko ñingila (nangwa kusukulu kongya) mbula bakwetu kuba’mba amiwa ne Kamonyi wa kwa Yehoba nyi, inyi nchina kwilumbulula? Nanchi ñumvwa bumvu kwikala muntu wapusanako na bakwetu, inyi nsangalala na mambo a bulunda bwami ne Yehoba?’ Umvwe muntu uchinachina kusapwila mambo awama nangwa kechi ukeba kuyukanyikisha lwitabilo lwanji ne, wafwainwa kuvuluka byambo bya kwa Yehoba kwi Yoshua: “Ukose ne kuchinchika bulongo.” Kange muvulame ne, bimumona bakwenu momwingijila nkito nangwa bakwenu momufunjila sukulu kechi kyo kyanema ne, kyanema ke Yehoba ne Yesu Kilishitu byo bemumona.—Ngalatiya 1:10.
Kukeba Bishinka Bikwabo Byanema
Kebainga Nsabo ya Kine
13 Timoti wajinga mwanamulume wa lwitabilo. Paulo byo atelele Timoti amba “mushilikale wawama wa kwa Kilishitu Yesu,” wamubuujile ne kuba’mba: “Kafwako mushilikale uba busulu ne, pa kuba’mba atalwe bulongo ku yewa wamutwezhezhe bushilikale.” (2 Timo. 2:3, 4) Baana ba bwanga ba kwa Yesu lelo jino, kubikakotu ne baji mu mwingilo wa kimye kyonse bakila pa 1 milyonyi, balondela lujimuno lwa kwa Paulo kwesakana na papelela bulume bwabo. Bebikako kukana kutwezhamo ne mutwe mu bintu bya mu ino ntanda, mambo bavuluka jifunde ja kuba’mba: “Ukongola wikala muzha ku yewa wamukongwesha.” (Maana 22:7) Kafwako bintu byawama bikeba Satana amba tubenga ne, aye ukebatu’mba twingijishenga kimye kyetu ne ngovu ku bya kutabataba bya mu ino ntanda. Bintu bimo byo tufuukulapo byakonsha kwitulengela kwitwezha mu nkongole ya kubwezha pa myaka yavula. Kukongola mali a kupotamo nzubo, kukongola mali a kuyila ku masukulu akatampe, kukongola mali a kupota motoka ufwa mali avula ne kukongola mali a masongola, bino byonse bilengela bantu kwikala na bijikila. Tumwesha’mba tuba bintu na maana inge twapezhako bwikalo bwetu, kukepeshako makongole, ne kwingijila Lesa na mukoyo kukila kwikala bazha ku bya kutabataba bya mu ino ntanda.—1 Timo. 6:10.
Bantu ba Yehoba ‘Bafumako ku Bintu Byabula Koloka’
10 Mu ano moba mu kipwilo kya bantu ba Yehoba kechi javula jo tutana bantu basenduka mu lwitabilo ne. Nangwa byonkabyo, inge twaumvwa mafunjisho abula mu Baibolo aamba bantu basenduka mu lwitabilo, twafwainwa kwiakana. Kechi kyawama kwipachika na bantu basenduka mu lwitabilo nangwa kutendeka kutundaika byambo byo banemba ne byo bamba ne. Nangwa kya kuba tukeba kukwasha bantu, inge ketwisambe nabo ko kuba’mba kechi tubena kukokela Lesa ne. Bino byo tuji bantu ba Yehoba, tukana kupwanañana na bantu basenduka mu lwitabilo.
AUGUST 12-18
BYA BUNEME BIJI MU MAMBO A LESA | TITUSA 1–FILEMONYI
“Kutongola Bakulumpe mu Kipwilo”
Mepuzho Afuma ku Batanga
Nangwa kya kuba Binembelo kechi byalumbulula byonse byaubiwanga pa katongola balongo mu oa moba ne, bino bitukwasha kuyuka byo kyaubiwanga. Tutanga kuba’mba mutumwa Paulo ne Banabasa byo babwelelenga pa lwendo lwabo lutanshi lwa bumishonale “batongwele bakulumpe mu kipwilo kimo kimo. Bazhikijilwenga na nzala ne kulomba kabiji pa kuba bino, bebapaine kwi Yehoba yenka ye baitabijile.” (Byu. 14:23) Byo papichile myaka imo, Paulo wanembejile mukwabo mo baingijilanga aye Titusa amba: “Nakushile mu Keleta kuba amba olole bintu byayile munsunya ne kutongola bakulumpe mu mizhi yonse byonka byo nakukambizhe.” (Titu. 1:5) Kyamweka ne Timoti waendanga ne Paulo naye bamupele luno luusa. (1 Timo. 5:22) Onkao mambo, kyamwekeshatu patoka kuba’mba bakalama benda pa kyokya kimye bo batongolanga balongo, kechi batumwa nangwa bakulumpe mu Yelusalema ne.
Na mambo a bino bishinka byo twaambapo bya mu Baibolo, Jibumba Jitangijila ja Bakamonyi ba kwa Yehoba japimpula jishinda ja kutongwelamo bakulumpe ne bankwasho mu bipwilo. Kutendeka pa 1 September, 2014, balongo batongolwanga bino: Kalama wa mwanzo ukapitulukanga mu byo banemba pa balongo bo babena kukeba kutongola mu mwanzo mo engijila. Kimye kyo akafwakeshanga bipwilo, ukakebeshanga kuyuka bobo balongo bo babena kukeba kutongola ne kwingila nabo mu mwingilo inge kyakonsheka. Panyuma ya kwisamba na jibumba ja bakulumpe mu kipwilo pa balongo bo babena kukeba kutongola, kalama wa mwanzo ukatongolanga bakulumpe ne bankwasho mu bipwilo bya mu mwanzo mo engijila. Mu jino jishinda, luno lunengezho lwipasha bingi na byo baubanga mu myaka kitota kitanshi.
Pano bañanyi baingilanga mingilo ikwabo yapusana pusana? Kufumatu ne kala, “kalume wakishinka kabiji wa maana” uji na mwingilo wa kujisha bantu ba ku nzubo. (Mat. 24:45-47) Kuba bino kwavwangamo kupesapesa Binembelo na bukwasho bwa mupashi wazhila pa kuba’mba batangijilenga mu bya kulondela mafunde a mu Baibolo mu bipwilo byonse mwaya ntanda. Kalume wa kishinka ye utongola bakalama benda ne ba mu Kavoto ka Musampi. Kabiji musampi yense wibakwasha kumona kuba’mba lutangijilo lwabo lubena kulondelwa. Mabumba a bakulumpe onse aji na mwingilo wa kupitulukamo bulongo mu bikebewa byatongolwa mu Binembelo pa kwisamba pa balongo bo babena kukeba kuba’mba batongolwe kwikala bakulumpe mu kipwilo kya Lesa. Kalama wa mwanzo uji na mwingilo wabaya bingi wa kulangulukapo bulongo ne kulombapo pa byanemba bakulumpe mu kipwilo pa balongo bo babena kukeba kutongola, kabiji ne kutongola banabalume bafikilamo kwikala bakulumpe ne bankwasho.
Kukeba Bishinka Bikwabo Byanema
w89 5/15 ji. 31 jifu. 5
Mepuzho Afuma ku Batanga
Kechi waswilenga byambo byatama byamwesheshenga misalululo byo baambijilenga bena Keleta ne. Akino kishinka, mambo Paulo wayukile’mba mu Keleta mwajinga bena Kilishitu baakamwanga Lesa bo bashingile na mupashi wazhila. (Byubilo 2:5, 11, 33) Mwajinga bena Kilishitu bavula bingi bafwainwe kulenga bipwilo mu “mizhi yonse.” Nangwa kya kuba bano bena Kilishitu bajinga bambulwakulumbuluka, bino bachinuzhukanga kwamba bubela ne kwikala bankope bakebatu kuja, mambo kuba bino kwafwainwe kufichisha Yehoba ku muchima. (Filipai 3:18, 19; Lumwekesho 21:8) Byonkatu byo kiji ne lelo jino, kyamweka mu Keleta mwajinga bantu bajinga na michima ya bukishinka bashikilwe bintu byatama byaubanga bantu kabiji batambwijile mambo awama.—Ezikyo 9:4; esakanyaiko Byubilo 13:48.
Bishinka Bikatampe Kufuma mu Makalata Anembejilwe Titusa, Filemonyi ne Bahebelu
15, 16—Mambo ka Paulo kyo abujile kwambila Filemonyi amba Onesimusa mumuleke eendelenga? Mwingilo wa kwa Paulo wajinga wa ‘kusapwila mambo a bufumu bwa Lesa, ne kufunjisha bya mwi Nkambo Yesu Kilishitu.’ Onkao mambo, kechi wakebelenga kwivwangamo mu ano mambo a buzha ne.—Byu. 28:31.
AUGUST 19-25
BYA BUNEME BIJI MU MAMBO A LESA | BAHEBELU 1-3
‘Temwai Bololoke ne Kushikwa Bubi’
Totai Kilishitu, Mfumu wa Lukumo!
8 Mu 1914, Yehoba wabikile Mwananji pa Bufumu bwa Bumesiasa mwiulu. ‘Ndondo ya bufumu bwanji yo ndondo ya bololoke,’ ko kuba’mba ukalamanga bantu mu bololoke kwa kubula misalululo. Uji na luusa lwa kwikala Mfumu, mambo ‘jitanda janji ja Lesa,’ ko kuba’mba Yehoba ye wamutongwele kwikala mfumu. Kabiji jitanda ja bufumu ja kwa Yesu “jo ja myaka ne myaka.” Byo kituletelapo lusekelo kwingijila Yehoba mu bukalama bwa Mfumu wabulume ye atongola!
Totai Kilishitu, Mfumu wa Lukumo!
7 Tangai Salamo 45:6, 7. Na mambo a kuba Yesu watemenwe bololoke ne kushikwa bintu byonse byakonsheshe kuleta bumvu pe Shanji, Yehoba wamushingile kuba’mba ekale Mfumu wa Bufumu bwa Bumesiasa. Yesu bamushingile “manyi a [kumutumbijika]” ‘kukila bakwabo,’ ko kuba’mba bamfumu ba mu Yuda, ba mu kisemi kya Davida. Mu ñanyi jishinda? Mambo Yesu bamushingile ku mwine Yehoba. Kabiji Yehoba wamutongwele kwikala Mfumu ne Ñanga Mukatampe. (Sala. 2:2; Hebe. 5:5, 6) Kikwabo, Yesu kechi bamushingile manyi ne, aye bamushingile na mupashi wazhila, kabiji bufumu bwanji kechi bwa pano pa ntanda ne, bwa mwiulu.
Kukeba Bishinka Bikwabo Byanema
it-1 1185 jifu. 1
Kipasha
Nanchi Yesu kimye kyonse wamweshanga kipasha kya Shanji nyi?
Mwana Lesa mubeji, waishile pano pa ntanda aye Yesu ye kipasha kya Shanji. (2Ko 4:4) Kyamweka uno ye Mwana ye aambijilenga bino byambo bya kuba’mba: “Tulenge muntu mu kipasha kyetu.” Uno Mwana wamwesheshe kipasha kya Shanji, Mulenga kufumatu kimye kyo bamulengele. (Nt 1:26; Yoa 1:1-3; Kol 1:15, 16) Byo ajinga muntu walumbuluka pano pa ntanda, wamwesheshe byubilo bya Shanji. O ene mambo o aambijile’mba “awa wammona, wamona ne Batata.” (Yoa 14:9; 5:17, 19, 30, 36; 8:28, 38, 42) Yesu wamwesheshe bino byubilo kikatakata kimye kyo bamusangwile ne kumupa mubiji wa mupashi ne byo bamupele “luusa lonse . . . lwa mwiulu ne pano pa ntanda” kwi Shanji aye Yehoba Lesa. (1Pe 3:18; Mat 28:18) Lesa byo atumbijikile Yesu kupichila mu kumupa “kifulo kikatampe,” kino kyalengejile Mwana Lesa kumwesha lukumo lwa Shanji kukila byo ajinga mwiulu saka akyangye kwiya pano pa ntanda. (Fp 2:9; Heb 2:9) Aluno ‘ye kipasha kya Lesa.’—Heb 1:2-4.
it-1 1063 jifu. 7
Mwiulu
Byambo biji pa Salamo 102:25, 26 byaamba pe Yehoba Lesa. Nangwa byonkabyo, mutumwa Paulo wibingijishe pa kwamba pe Yesu Kilishitu. Waubile bino mambo uno mwana wa Lesa yenkawa umotu, ye ye aingijishe pa kulenga bintu byonse. Paulo walumbulwile’mba uno Mwana wikala myaka ne myaka kukila bilengwa bikwabo byalengele Lesa byo akonsha ‘kuvunga nobe munkukumba’ ne konaika.—Heb 1:1, 2, 8, 10-12; esakanyaiko 1Pe 2:3, tubyambo twa panshi.
AUGUST 26–SEPTEMBER 1
BYA BUNEME BIJI MU MAMBO A LESA | BAHEBELU 4-6
“Ibikaiko pa Kuba’mba Mukatwele mwa Kukokolokela mwa Lesa”
Kukokoloka kwa Lesa ko ku Ka?
3 Kuji bishinka bibiji bitulengela kuyuka’mba juba ja butanu na bubiji jatwajijile ne mu myaka kitota kitanshi C.E. Kishinka kitanshi, akimonai byambo Yesu byo aambijile bakajimbuluzhi bamukatezhenga pa kubuka bantu pa juba ja Sabado, jo bamonanga’mba ke juba ja kubula kwingila. Nkambo wibambijile’mba: ‘Batata ne luno bakingila, ne amiwa nkingila.’ (Yoa. 5:16, 17) Kishinka ka kyo aambilengapo? Yesu bamupelemo mambo a kwingila pa juba ja Sabado. Yesu wibakumbwile’mba: ‘Batata ne luno bakingila,’ kumwesha’mba byo aubilenga byajingatu bulongo. Mu jishinda jikwabo, Yesu waambijilenga bakajimbuluzhi amba: ‘Batata ne amiwa twingila mwingilo umotu. Byo kiji amba Batata ne lunotu bakingila, ne amiwa kyaswishiwa kutwajijila kwingila, nangwatu pa juba ja Sabado.’ Onkao mambo, Yesu walumbulwilenga’mba, juba jikatampe ja Sabado ja kukokolokelamo Lesa kechi japwile mu moba a kwa Yesu ne.
4 Kishinka kya bubiji ke kyokya kyaambapo mutumwa Paulo. Kwamba pa byambo byaambiwapo kala mu Ntendekelo 2:2 pa mambo a kukokoloka kwa Lesa, Paulo wanembele’mba: ‘Atweba tuji na lwitabilo tutwela mwakukokolokela.’ (Hebe. 4:3, 4, 6, 9) Kino kibena kulumbulula’mba juba ja butanu na bubiji jatwajijile ne mu moba a kwa Paulo. Jino juba ja kukokoloka jafwainwe kutwajijila pa kimye kyalepa byepi?
5 Pa kuba’mba tukumbule buno bwipuzho, twafwainwa kuyuka nkebelo ya juba ja butanu na bubiji. Ntendekelo 2:3 yalumbulula ine nkebelo amba: “Lesa wapesheshe juba ja butanu na bubiji ne kwijizhijika.” Jino juba, aye mwine Yehoba ‘wijizhijikile’ nangwa’mba kwijipatula ku moba akwabo kuba’mba afikizhe nkebelo yanji. Ino nkebelo ke ya kuba’mba bantu bonse balukokelo banabalume ne banabakazhi bakekale mu ntanda, kulama bulongo byonse bijimo ne kwiiwamisha. (Nte. 1:28) Ke na mambo a ino nkebelo Yehoba Lesa ne Nkambo wa sabado, aye Kilishitu o bakitwajijila ‘kwingila ne luno.’ (Mat. 12:8) Juba ja kukokolokelamo Lesa jikatwajijila kufikatu ne kimye nkebelo ya jino juba jo ikafika ku mpelo ya Kulama kwa Kilishitu kwa Myaka Kiumbi Kimo.
Kukokoloka kwa Lesa ko ku Ka?
6 Lesa wibalondolwejile bulongo ba Adama ne Evwa nkebelo yanji, pano bino kechi beilondejile ne. Ba Adama na Evwa bo bajinga bantu batanshi kusatukila Lesa. Kufumatu kyokyo kimye, bantu bavula bingi basatuka. Nangwatu bena Isalela bajinga bantu ba Lesa, nabo baponejile monka mu musango umo wa bunsatuki. Kabiji, Paulo wajimwineko bena Kilishitu mu myaka kitota kitanshi kuba’mba nabo bakonsha kuponena mu kakose kamo kaponejilemo bena Isalela. Wanembele’mba: ‘Onkao mambo, twayai tuteshekotu muchima tutwele monkamwa mwakukokolokela, kuchina’mba, muntu nangwa umo wakaponena monka mu musango umo wa bunsatuki.’ (Hebe. 4:11) Akimonai Paulo byo amwesha bunsatuki amba bulengela muntu kukankalwa kutwela mu kukokoloka kwa Lesa. Kino kyalumbulula ka kwi atweba? Umvwe twasatukila Lesa pa mambo a nkebelo yanji, nanchi ne atweba twakonsha kukankalwa kutwela mu kukokoloka kwa Lesa nyi? Kya kine, mukumbu ku buno bwipuzho bwanema bingi kwi atweba kabiji tusakwisambapo kyabaya bingi. Nangwa byonkabyo, pa kino kimye twayai tumone byo twakonsha kufunda pa mambo a kutwela mu kukokoloka kwa Lesa kupichila mu kwisamba pa bintu byatama byaubile bena Isalela.
Kukokoloka kwa Lesa ko ku Ka?
16 Lelo jino, bena Kilishitu bacheche bo batwajijila kulondela Mizhilo ya Mosesa kuba’mba bakapuluke. Byambo bya kwa Paulo ku bena Efisesa byalumbulula bingi bulongo amba: ‘Kupichila mu luno lusa lwa Lesa bemupulusha na mambo a lwitabilo lwenu; kechi mwapuluka na mambo a kukeba kwenu ne. Ke bupetu bwa Lesa. Kabiji kechi na mambo a mingilo yenu ne, kuchina’mba muntu nangwa umo waketota.’ (Efi. 2:8, 9) Nga kutwela mwakukokolokela Lesa kulumbulula ka ku bena Kilishitu? Yehoba wasajile juba ja butanu na bubiji—juba janji ja kukokolokelamo pa kuba’mba afikizhe nkebelo yanji pa mambo a ino ntanda. Twakonsha kutwela mwakukokolokela Yehoba nangwa kukokolokela pamo nanji kupichila mu kwikala balukokelo mu kwingila mingilo mwayila nkebelo yanji yo etusolwela kupichila mu jibumba janji.
17 Pano bino, umvwe ketubule kulondela lujimuno luji mu Baibolo lo tutambwila kufuma ku jibumba ja kalume wakishinka kabiji wa maana ne kukeba kwitangijila atwe bene, ko kuba’mba tukeletela atwe bene makatazho ne kupusenamo na nkebelo ya Lesa. Kino kyakonsha kwitulengela kubula kwikala na bulunda bwawama ne Yehoba. Mu kibaba kyalondelapo, tukesamba pa bintu bimo byubiwa javula byakonsha kulengela bantu ba Lesa kubula kukokela kabiji tukesamba ne pa bintu byo tufuukulapo, kikale byobya bimwesha lukokelo nangwa bimwesha muchima wa kwitolwela, byo byakonsha kumwesha umvwe kya kuba twatwela mu kukokoloka kwa Lesa nangwa ne.
Kukeba Bishinka Bikwabo Byanema
Mepuzho Afuma ku Batanga
“Mambo a Lesa” atongolwa pa Bahebelu 4:12 amba “o omi kabiji aji bingi na bulume” o aka?
Byambo byatendekelako bimwesha’mba mutumwa Paulo waambilenga pa byambo byaamba pa kyaswa muchima wa Lesa bitaanwa mu Baibolo.
Kinembelo kya Bahebelu 4:12, javula kitaanwa mu mabuku etu pa kumwesha’mba Baibolo uji na bulume bwa kupimpula bwikalo bwa bantu, kabiji kya kine byo byo oba. Nangwa byonkabyo, kyanema kuyuka mwatala byambo biji pa Bahebelu 4:12. Paulo watundaikilenga bena Kilishitu Bahebelu kubanga bikeba Lesa. Byavula byanembwa mu binembelo byazhila. Paulo waambile pa byaubile bena Isalela bo bapokolwele mu Ijipita. Bajinga na luketekelo lwa kutwela mu kyalo kya mulaye “kyavula mukaka ne buki” mo bafwainwe kukookoloka.—Lupu. 3:8; Mpitu. 12:9, 10.
Bino byo byakebelenga Lesa. Pano bino, bena Isalela bakoseshe michima yabo kabiji kechi bamwesheshe lwitabilo ne, kino kyalengejile bavula kukankalwa kutwela mwa kukookolokela. (Bala. 14:30; Yosh. 14:6-10) Nangwa byonkabyo, Paulo wanungilepo’mba “mulaye wa kutwela mwa kukokolokela [mwa Lesa]” watwajijile. (Hebe. 3:16-19; 4:1) Uno “mulaye” ke lubaji lwa kyaswa muchima wa Lesa. Byonka byaubile bena Kilishitu Bahebelu, twafwainwa kukookela uno mulaye. Pa kulumbulula bulongo uno mulaye waimena pa Binembelo, Paulo waingijishe byambo bimo biji pa Ntendekelo 2:2 ne Salamo 95:11.
Kitusangajika bingi pa kuyuka’mba ‘mulaye wa kutwela mwa kukookolokela mwa Lesa watwajijila.’ Twaketekela’mba twakonsha kutwela mwa kukookolokela mwa Lesa kwesakana na byaamba Baibolo kabiji twaubapo bimo pa kuba’mba tukatwelemo. Kechi twauba bino kupichila mu kulama Mizhilo ya Mosesa nangwa kwingila mingilo ikwabo pa kuba’mba tutalwe bulongo kwi Yehoba ne. Bino na mambo a lwitabilo, twaswa kuba kyaswa muchima wa Lesa. Kunungapo, byonka byo twaambapo ku ntendekelo, bantu bavula mwaya ntanda babena kufunda Baibolo ne kufunda kyaswa muchima wa Lesa. Bavula bapimpula bwikalo bwabo, kwikala na lwitabilo kabiji babatizhiwa ne kwikala bena Kilishitu. Kupimpula byubilo byabo kumwesha’mba kine “mambo a Lesa o omi kabiji aji bingi na bulume.” Kyaswa muchima wa Lesa kyanembwa mu Baibolo, kibena kupimpula bwikalo bwa bantu kabiji kikatwajijila na kupimpula bwikalo bwetu.
it-1 1139 jifu. 2
Luketekelo
Luno ke luketekelo lwa kukekala na bumi bwa myaka ne myaka mwiulu na mibiji ibula kubola lwa “bo baita kuya mwiulu” (Hebe. 3:1) lwa mu binembelo kabiji lwa kine. Lwaimena pa bintu bibiji byalaya Lesa ubula kubepa. Kitanshi, mulaye wanji ne luchipo lwa lulayañano. Kya bubiji, luno luketekelo lwaimena pe Kilishitu uji mwiulu ye bapa mubiji ubula kufwa. Onkao mambo, luno luketekelo belulumbulula kuba’mba luji nobe “kimiko kya mweo wetu, lwa kine kabiji lwakosa, kabiji lutwela mu kipembe, mo etutwelelako awa watangilako kala, aye Yesu waikala ñanga mwine mukatampe myaka ne myaka byonka byajinga Melekizedeke.”—Heb 6:17-20.