Byambo Bikwabo bya mu Mutanchi wa Kupwila kwa Bwikalo ne Mwingilo
© 2024 Watch Tower Bible and Tract Society of Pennsylvania
NOVEMBER 4-10
BYA BUNEME BIJI MU MAMBO A LESA SALAMO 105
“Vulukainga Lulayañano Lwanji Myaka ne Myaka”
Twakonsha Kukosesha Byepi Lwitabilo Lwetu mu Mulaye wa Yehoba wa Kuleta Ntanda Ipya?
11 Akilangulukai pa bintu Yehoba byo alayile bantu banji kala, byamwekele nobe kechi bikamweka ne. Walayile Abalahama ne Sala kuba’mba bakasema mwana nangwa kya kuba bakotele. (Nte. 17:15-17) Kabiji wabuujile Abalahama amba baana banji ukebapa kyalo kya Kenana. Bena Isalela baana ba kwa Abalahama byo bajinga mu buzha myaka yavula mu Ijipita, bamwene nobe uno mulaye kechi ukafika ne. Bino wafikile. Kabiji Yehoba wabuujile Elisabeta kuba’mba ukekala na mwana nangwa kya kuba wajinga mukote. Kabiji wabuujile kisungu aye Maliya kuba’mba ye ukasema Mwananji. Kino kyafikizhe mulaye Yehoba ye aambijile jimo kala kene mu bujimi bwa Edena.—Nte. 3:15.
12 Umvwe saka tulanguluka pa milaye yonse yalayile Yehoba ne byo eifikizhe tuyuka’mba uji bingi na bulume. Kabiji lwitabilo lwetu mu mulaye wa kuba’mba Lesa ukalula ino ntanda ke ipya lukakosa. (Tangai Yoshua 23:14; Isaya 55:10, 11.) Kino kitulengela kwinengezha kukwasha bakwetu kuyuka’mba mulaye witulaya Lesa wa kuba’mba ino ntanda ikekala ke ipya ukafika kechi mañambilatu ne. Yehoba mwine waambilepo pa meulu apya ne ntanda ipya amba: “Bino byambo bya kishinka kabiji bya kine.”—Lum. 21:1, 5.
it-2 1201 jifu. 2
Mambo
Bilengwa bipema ne bibula kupema bitoota bulume bwa Lesa, kabiji wibingijisha kufikizha kyaswa muchima wanji. (Sl 103:20; 148:8) Byambo bya Lesa byaketekelwa mambo uvuluka kufikizha byo alaya. (Mpi 9:5; Sl 105:42-45) Byonkatu mwine byo amba’mba, byambo byanji “bikala myaka ne myaka”; kechi bibwela kwa kubula kufikizha kyaswa muchima wanji ne.—Is 40:8; 55:10, 11; 1Pe 1:25.
Bishinka Bikwabo Byanema
w86 11/1 19 jifu. 15
Anweba Banyike—Muji na Mwingilo wa Kukwasha Kisemi Kyenu Kwikala na Lusekelo ne Kukwatakana
15 “Bakashile (Yosefwa) maulu anji, Mweo wanji bamubikile mu minyololo; posotu ne byambo byanji byo byafikile, Byambo bya Yehoba byo byamutubwile.” (Masalamo 105:17-19) Yosefwa waikele muzha kabiji kaili pa myaka 13, kufikatu ne kimye milaye ya Yehoba po yafikile. Bintu byo apichilemo byamutubwile. Nangwa kya kuba Yehoba kechi ye waletelenga makatazho ne bino kuji kyamulengejile kwiaswisha kubewa. Nanchi Yosefwa wafwainwe kwikala na luketekelo mu “byambo bya Yehoba” nangwa kyakuba wapichilenga mu makatazho akatampe nyi? Nanchi wakonsesha kwikala na byubilo byawama nabiji kutekanya, kwipelula, ne kukosesha bulunda bwanji ne Lesa pa kuba’mba engile mwingilo wakatazha nyi? Byonkatu bikala ngolode yo batubula, Yosefwa watwajijile kwikala wa kishinka ne kunemekwa kwi Lesa kya kuba kulutwe wa mupele mingilo yavula bingi.—Ntendekelo 41:14, 38-41, 46; 42:6, 9.
NOVEMBER 11-17
BYA BUNEME BIJI MU MAMBO A LESA MASALAMO 106
“Bavulamine Lesa Mupulushi Wabo”
“Ñanyi uji ku Lubaji lwa Yehoba?”
13 Bena Isalela baumvwine bingi moyo pa kumona jikumbi jifita, kubesha kwa mvula ne biyukilo bikwabo byamwesheshe bulume bukatampe bwa Lesa. Onkao mambo, baambijile Mosesa kuba’mba aye na kwisamba ne Yehoba ku Mutumba wa Sinai. (Lupu. 20:18-21) Mosesa wayile pa mutumba peulu kabiji kechi wabwelele bukiji ne. Nanchi bena Isalela baikele mu kiselebwa kwa kubula ntangi wa ketekelwa nyi? Kyamweka lwitabilo lwabo lwaimenejile pa ntangi ye bamonanga na meso aye Mosesa. Baakaminwe kabiji baambijile Alona amba: “Tulengele lesa etutangijile, mambo kechi twayuka kintu kyamwekela uno Mosesa muntu witufumishe mu kyalo kya Ijipita ne.”—Lupu. 32:1, 2.
Bishinka Bikwabo Byanema
w06 7/15 13 jifu. 9
Bishinka Bikatampe Kufuma mu Buku wa Busatu ne wa Buna wa Masalamo
106:36, 37.Bino byepelo bimweshatu patoka’mba kupopwela bankishi kujitu pamo na kutapisha bitapisho ku bademona. Kino kimweshatu patoka amba muntu upopwela bankishi ko kuba’mba ubena kutangijilwa na bademona. Baibolo witukambizha amba: “Ilamai ku bankishi.”—1 Yoano 5:21.
NOVEMBER 18-24
BYA BUNEME BIJI MU MAMBO A LESA MASALAMO 107-108
“Musanchilai Yehoba, Mambo Wawama”
Lekai Kipwilo Kitotenga Yehoba
2 Kipwilo kechi ke jibumbatu ne. Kabiji kechi ke kimasamasa nangwa kabungwe ka bantu baji na kisho kimo nangwa batemwa bya kukayakaya bapwila pamo ne. Kipwilo kyaikelako kutota Yehoba Lesa. Ino yo ine nkebelo kufumatu ne kukala mambo ne buku wa Masalamo byo aamba. Mu Salamo 35:18 tutangamo’mba: “Amiwa nkemusanchila mu kipwilo kikatampe: Nkemutota mu bantu bavujisha.” Kabiji Salamo 107:31, 32 witutundaika’mba: “Kine, bantu bamutote Yehoba na mambo a lusa lwanji, ne na mambo a mingilo yanji ya kukumya yo ebengijila bantu! Ne mu kipwilo kya bantu namo bamutumbijike.”
Musanchilainga Yehoba pa Kuba’mba Emupeshe
4 Pa kuba’mba tutwajijile kwikala na muchima wa kusanta twafwainwa kulangulukanga pa bintu byawama bitupa Yehoba ne pa butemwe bwanji bubula kwaluka. Bino byo byaubile nyimbi wa masalamo, kabiji wakuminye bingi pa bintu byawama byamubijile Yehoba.—Tangai Salamo 40:5; 107:43.
Bishinka Bikwabo Byanema
it-2 420 jifu. 4
Moabu
Davida byo aikele Mfumu, kwaikele nkondo pakachi kabena Isalela ne bena Moabu. Bena Moabu bebashinjile kabiji batendekela kupana milambo kwi Davida. Nkondo byo yapwilenga banabalume bena Moabu bebepayile. Kyamweka Davida wibalaajikile panshi ne kwibapima na ntambo kabiji bo apimine na ntambo ibiji wibepayile ne bo apimine na lutambo umo kechi wibepayile ne. (2Sa 8:2, 11, 12; 1Mo 18:2, 11) Kabiji mu ino nkondo Benaya mwana wa kwa Yehoyada “Watapile baana babiji ba kwa Aliela mwina Moabu.” (2Sa 23:20; 1Mo 11:22) Davida byo aipayile bena Moabu wafikizhe bungauzhi waambijile jimo Balamu saka papita ne myaka kukila pa 400 kuba’mba: “Kabangabanga kakafuma mwi Yakoba, Kabiji ndondo ikafuma mu Isalela. Kabiji aye ukalalaula kilungi kya kwa Moabu ne kulalaula mitwe ya baana ba kiwowo bonse.” (Ba 24:17) Kabiji kwesakana na bino byambo nyimbi wa masalamo waambile pe Lesa kuba’mba Moabu ye “shomeka wa kowelamo.”—Sl 60:8; 108:9.
TAIKO MUCHIMA KU MWINGILO WA KUSAPWILA
Nakonsha Kuchinuzhuka Byepi Ndangulukilo Yatama?
ijwyp 90
Mwimona byepi anweba bene?
Mambo ka o kyanemena?
Byo mwafwainwa kuba
Funjilaipo bishinka bikwabo
Byambapo bakwenu banyike
Mwimona byepi anweba bene
Kubula kwakamwa
“Nebikako kwikala na lusekelo ne kubula kwakamwa. Mambo ka o nafwainwa kubula kumwemwesela pa juba ne pa juba?”—Valerie.
Kwakamwa
“Inge kwamweka kintu kyawama nalangulukanga amba kechi kya kine ne, nangwa amba kyamapusotu.”—Rebecca.
Kwikala na mweno yawama
“Kubula kwakamwa kwakonsha kwitulengela kulefulwa, kabiji kwakamwa kulengela muntu kwikala bwikalo bwatama. Bino kwikala na mweno yawama kwitukwasha kumona bintu byonka byo biji.”—Anna.
Mambo ka o kyanemena?
Baibolo waamba’mba “pakuba awa uji na muchima wa lusekelo utwajijilatu na kusangalala nobe uji na kijiilo.” (Byambo bya Maana 15:15) Bantu bachinuzhuka kwikala na ndangulukilo yatama ne kwikala na mweno yawama pa bintu bekala na lusekelo. Kabiji bekala na balunda bavula. Kafwako wakonsha kutemwa kwikala na muntu wazhingila ne.
Nangwa byonkabyo, kuji bintu byotupitamo atweba bonse bilengela ne bantu babula kwakamwa nabo kwakamwa. Bintu nabiji:
Kumvwa ku sawakya ubena kwamba pa nkondo, bambanzhi ne bukapondo.
Kwikala na makatazho mu kisemi kyenu.
Bintu byomukankalwa kuba ne kwikala na milanguluko yatama.
Mulunda nenu wimukozha ku muchima.
Kwikala na mweno yawama kukemukwasha kubula kukizhamo kwakamwa nangwa kulanguluka amba byonse bijitu bulongo. Kabiji kukemukwasha kubula kwikala na milanguluko yatama ne kuchinchika makatazho kwakubula kwakamwa.
Byo mwafwainwa kuba
Ikalai na ndangulukilo yawama ya bintu byomulubankanya.
Baibolo waamba’mba: “Pano pa ntanda kafwapo muntu waoloka ubatu byawama byonka kwa kubula kulubankanyapo ne.” (Musapwishi 7:20, Good News Translation) Bintu byomulubankanya bimwesha amba mwi bambulwakulumbuluka kechi mubilamotu ne.
Bya kwikala na mweno yawama: Ingijilainga pa bintu byo mubula kuba bulongo bino kange mulangulukenga amba mwaoloka ne. Nsongwalume aye Caleb waambile’mba “Nebikako kubula kukizhamo kulanguluka pa bintu byondubankanya. Pakuba, nebikako kufujilako ku byonalubankenye pa kuba amba ngwamisheko mo mbena kubula kuba bulongo.”
Kwiesakanyanga ku bakwenu ne
Baibolo waamba’mba: “Kange twikale ba kwitota kwatu, kwikyombesha ne kwiubila kichima ne.” (Ngalatiya 5:26) Kutala pa bipikichala biji pa intaneti a bijiilo byo babujile kwimwitako, kwakonsha kwimulengela kumvwa kutama ku muchima. Kikemulengela kumona balunda nenu nobe balwanyi benu.
Bya kwikala na mweno yawama: Kange muketekelenga kuba’mba bakonsha kwimwita ku bijiilo byonse ne. Kabiji bipikichala bya pa intaneti kechi bilumbulula bintu byonse byamwekele ne. Nsongwalume wa aye Alexis waambile’mba: “Bipikichila bya pa intaneti kechi byamba bya kine pa bwikalo bwa bantu ne. Bantu kechi babikapo bishinka byonse ne.”
Tundaikainga mutende—kikatakata mu kisemi kyenu.
Baibolo waamba’mba: “Umvwe kyakonsheka, monka mwayila bulume bwenu, ikalainga mu mutende.” (Loma 12:18) Kechi mwakonsha kukanya byonse byuba bakwenu ne, bino mwakonsha kwikanya anweba babene. Mwakonsha kufukulapo kutundaika mutende.
Bya kwikala na mweno yawama: Ibikaiko kutundaikanga mutende mu kisemi byonkatu byo mwakonsha kuba na bantu bonse. Nsongwakaszhi aye Melinda waambile’mba “Kafwako muntu waoloka ne, kabiji atweba bonse tutuntwisha bakwetu kimye kyonse. Twafwainwatu kufukulapo bya kuba pa kuba’mba tulenga mutende.”
Santainga.
Baibolo waamba’mba: “Kabiji saka musanta.” (Kolose 3:15) Kwikala na muchima wa kusanta kukemulengela kutatu muchima pa bintu byawama ne kubula kuta muchima pa bintu byatama.
Bya kwikala na mweno yawama: Yukai’mba mukapitanga mu makatazho, bino kange muleke emulengele kubula kumona bintu byawama bimweka mu bwikalo bwenu ne. Nsongwakazhi aye Rebecca waambile’mba: “Pa juba pa juba, nemba bintu byawama byamweka mu bwikalo bwami,”. Nevululamo kuba’mba kimye kyonse ngikala na bintu byawama bya kulangulukapo.”
Salai balunda bawama.
Baibolo waamba’mba: “Kupwanañana na babi konauna byubilo byawama.” (1 Kolinda 15:33) Inge kyakuba balunda bomupwanañana nabo betolwela, bazhingila bukiji, yukai kuba’mba ne anweba bino byubilo mukekala nabyo.
Bya kwikala na mweno yawama: Balunda nenu nabo bapita mu makatazho mu bwikalo bwabo ne kwijizhañanya pa byo babena kupitamo. Bakwashainga, bino kange mukizhengamo kwakamwa pa makatazho apitamo bakwenu ne. Nsongwakazhi umo aye Michelle waambile’mba “Bantu bakamwa pa bintu kechi bo bonkatu bo twafwainwa kupwanañana nabo ne. “Munsamushi inge wavwanga pamo manambala abiji akepa ukekala na nambala icheche.”
Funjilaipo bishinka bikwabo
Twikala mu bimye Baibolo byo yaamba’mba “bimye byakatazha.” (2 Timoti 3:1) Nanchi kimukatazha kwikala na mweno yawama mu ino ntanda bintu mo byakatazha nyi? Tangai mutwe wa kuba’mba “Mambo ka Buyanji o Bwavujila?”
Musakukumbula amba ka: Nakonsha kuchinuzhuka byepi ndangulukilo yatama?
Ikalai na ndangulukilo yawama ya bintu byomulubankanya. Ingijilainga pa bintu byo mubula kuba bulongo bino kange mulangulukenga amba mwaoloka ne.
Kwiesakanyanga ku bakwenu ne. Kange muzhingilenga inge babula kwimwita ku kijiilo ne.
Tundaikainga mutende—kikatakata mu kisemi kyenu. Kange mubenga bintu byakonsha kunungapo makatazho ne, ibikaingako kwikala mu mutende.
Santainga. Kwikala na muchima wa kusanta kukemulengela kutatu muchima pa bintu byawama ne kubula kuta muchima pa bintu byatama.
Salai balunda bawama. Salai balunda bakemulengelanga kubula kukizhamo kwakamwa pa makatazho o mupitamo.
NOVEMBER 25–DECEMBER 1
BYA BUNEME BIJI MU MAMBO A LESA MASALAMO 109-112
Tundaikainga Mfumu, aye Yesu!
Bishinka Bikatampe Kufuma mu Buku wa Butanu wa Masalamo
110:1, 2—“Nkambo [yanji Davida],” aye Yesu Kilishitu, waubilepo ka byo aikajile ku kuboko kwa Lesa kwa kilujo? Yesu byo asangwilwe waile mwiulu ne kupembelela ku kuboko kwa Lesa kwa kilujo poso mu 1914 kimye kyo aikajile Mfumu ne kutendeka kulama. Pa kyokya kimye, Yesu walaminenga baana banji ba bwanga bashingwa, kwibatangijila mu mwingilo wabo wa kusapwila ne kulenga baana ba bwanga kabiji wibalengejile kwinengezha kwikala bakulama pamo nanji mu Bufumu.—Mateo 24:14; 28:18-20; Luka 22:28-30.
w00 4/1 18 jifu. 3
Bantu Balwa ne Yehoba Kechi Bakashinda ne!
3 Kutendeka mu mwaka wa bu kitota kya bu 20 bantu ba Yehoba bebamanyika bingi, bantu baji na byubilo byatama bakebesha bingi kukaya mwingilo wa kusapwila mambo aamba pa Bufumu bwa Lesa. Babena kwibatangijila ku mulwanyi wetu aye Diabola, “upitañana nobe bokwe ubuluma ubena kukeba wa kuja.” (1 Petelo 5:8) Kabiji “bimye byatongolwa bya bisaka bya bantu” byapwile 1914, Lesa watongwele mwananji kwikala Mfumu wa pano pa ntanda, na mukambizho wa kuba’mba: “Yanga na kushinda balwanyi bobe.” (Luka 21:24; Masalamo 110:2) Yesu waingijishe bulume bwanji kushinda Satana mwiulu ne kumutaya pano pa ntanda. Byo ayuka kuba’mba washalatu na ka kimye kacheche Satana wazhingijila Bena Kilishitu bashingwa ne balunda nabo. (Lumwekesho 12:9, 17) Pano ñanyi bintu bifumamo inge balwanyi ba Yehoba ke balwa ne aye?
Komenaingako ne Kuyilako Palutwe
Kwingijisha kya bupe kyenu kukebewa anweba yenka kwikala batanshi kuba bintu. Nanchi mwambila bakwenu kuba’mba mukengileko nabo mu mwingilo wa mu bujimi nyi? Nanchi mukebapo bimye bya kukwashishamo balongo benu ba mu kipwilo bakatataka, bakyanyike, nangwa bakolwakolwa nyi? Abya mwipana kuwamisha Nzubo ya Bufumu nangwa kukwashako mu mingilo yapusana pusana pa kushonkena kwa nkambi ne pa kubuñana kwa mwanzo nyi? Nanchi mwakonsha pa kimye pa kimye kunembeshako bupainiya bwa kukwasha nyi? Abya mwakonsha kwingilako bupainiya bwa kimye kyonse nangwa kukwashako kipwilo kyakajilwa pakatampe nyi? Umvwe mwi mulongo, nanchi mubena kukanamina kufikizha bikebewa bya mu Binembelo bya kwikala nkwasho nangwa mukulumpe mu kipwilo nyi? Kwipana kwenu kwa kukeba kukwasha ne kuswa kwingila mingilo, ke kiyukilo kya kuyilako palutwe.—Sala. 110:3.
Bishinka Bikwabo Byanema
it-1 524 jifu. 2
Lulayañano
Lulayañano lwakwikala ñanga nabiji Melekizedeke. Luno lulayañano luji pa Salamo 110:4, kabiji belunemba ne mu buku wa Bahebelu 7:1-3, 15-17 kwamba pe Kilishitu. Ke lulayañano Yehoba lo alayañene ne Yesu Kilishitu kwapwa. Yesu naye walayañene lulayañano lwa bufumu na bantu bamukookela. (Luk 22:29) Yehoba wachipile kwi Yesu Kilishitu, mwana Lesa mwiulu kuba’mba ukekala ñanga byonkatu byajinga Melekizedeke. Melekizedeke wajinga mfumu kabiji ñanga wa Lesa pano pa ntanda. Pano bino Yesu waikala Mfumu kabiji Ñanga mwine mukatampe mwiulu kechi pano pa ntanda ne. Waikanjikilwe pa Mfumu myaka ne myaka kimye kyo abwelele mwiulu. (Heb 6:20; 7:26, 28; 8:1) Luno lulayañano lwatwajijila kwikalako ne luno, Yesu byo aikala Mfumu kabiji Ñanga mwine mukatampe mu Bufumu bwa Lesa myaka ne myaka.—Heb 7:3.
DECEMBER 2-8
BYA BUNEME BIJI MU MAMBO A LESA MASALAMO 113-118
Twafwainwa Kusanchilanga Byepi Yehoba?
Ikomeshainga mu Butemwe
13 Byonka byaambile Yesu, kintu kitanshi pa byonse ke kutemwa Yehoba. Pano bino, butemwe bwa kutemwa Yehoba kechi tusemwa nabo ne. Ke kintu kyo twakonsha kukomesha atweba bene. Kimye kitanshi kyo twaumvwine’mba Yehoba koaji twakokelwe kwi aye mambo a byotwaumvwine. Pache-pache, twafunjile byo alengele ino ntanda’mba pekalenga bantu. (Ntendekelo 2:5-23) Kabiji twafunjile byo aingijile na bantu mu kimye kya kunyuma kwakubula kwitusankilapo kimye bundengamambo kyo bwatwelele ku bantu batanshi, kepo ne kwitumwena jishinda ja kwitukujilamo. (Ntendekelo 3:1-5, 15) Wibobijile lusa bonse bakishinka, kepo mu kupita kwa kimye wapaine Mwananji yenkawa umo mu kulekelwa kwa mambo etu. (Yoano 3:16, 36) Bino byonse byo twafunjile, byakomesha lusanchilo lwetu kwi Yehoba. (Isaya 25:1) Mfumu Davida waambile’mba watemenwe Yehoba mambo a ndamino Yanji ya butemwe. (Masalamo 116:1-9) Lelo jino, Yehoba witulama, witutangijila, witukosesha ne kwitutundaika. Byonkabyo umvwe twafunda byavula pe aye, butemwe bwetu bukakomenangakotu kikupu.—Masalamo 31:23; Zefwaniya 3:17; Loma 8: 28.
Tambwilainga na Lusekelo Panainga na Muchima Yense
Nyimbi wa masalamo waipwizhe’mba: “Lelo i kika kyo nkamupa Yehoba Na mambo a byanji byonse byawama byo angubila?” (Sala. 116:12) Mfweto ka yo atambwijile? Yehoba wamukwashishe mu bimye “byakatazha ne bulanda.” Kabiji Yehoba ‘wapokolwele muchima [wanji] ku lufu.’ Pano pa kino kimye, wakebelenga ‘kupapo’ Yehoba bintu bimo. Nanchi nyimbi wa masalamo wakonsheshe kuba ka? Waambile’mba: “Nkamubila Yehoba byo nachipile.” (Sala. 116:3, 4, 8, 10-14) Wafukwilepo kulama milaye yonse yo alaile kwi Yehoba ne kwiifikizha.
Ne anweba mwakonsha kuba bino. Mu ñanyi jishinda? Kupichila mu kwikala bwikalo bwakwatankana na mizhilo ne mafunde a Lesa kimye kyonse. Onkao mambo, monai kuba’mba kupopwela Yehoba kyo kintu kyakilamo kunema mu bumi bwenu ne kuleka mupashi wa Lesa kwimutangijila mu byonse byo muba. (Sapwi. 12:13; Nga. 5:16-18) Pano bino kwambatu kine, kechi mwakonsha kumubwezhezha Yehoba bintu byonse byawama byo emubila ne. Nangwa byonkabyo, ‘kimusangajika bingi Yehoba’ pa kumona kuba’mba mubena kwipana mu mwingilo wanji na muchima wenu yense. (Mana. 27:11) Byo jaikalapo jishuko kusangajika muchima wa Yehoba mu jino jishinda!
Byo Twakonsha Kufunjilako ku Buku wa Bena Levi
9 Lufunjisho lwa bubiji: Twingijila Yehoba mambo tumusanchila pa byo etubila. Tusakufunda luno lufunjisho lwanema byo tusakwisamba pa kintu kikwabo kyaubanga bena Isalela pa kupana kitapisho kya mutende. Mu buku wa Bena Levi, tufundamo kuba’mba mwina Isalela yense wafwainwe kupana kitapisho kya mutende pa “kumwesha kusanta.” (Levi 7:11-13, 16-18) Mwina Isalela wapananga kino kitapisho na mambo a kuba’mba kyo kyo akebanga kuba, kechi kya kumukanjikizha ne. Onkao mambo, kino kitapisho kyajinga kya kwifuukwila mwine muntu na mambo a kutemwa Lesa wanji, Yehoba. Mwine muntu wapana kitapisho, kisemi kyanji, ne bañanga bajanga nyama ya nyama wa mulambo. Bino kwajinga byako bimo bya nyama byo batapishanga kwi Yehoba. Ñanyi byako byonkabyo?
10 Lufunjisho lwa busatu: Tupa Yehoba bintu byawamisha mambo twamutemwa. Yehoba wamonanga mafuta a nyama kuba’mba kyo kintu kyawama bingi ku nyama. Kabiji waambile kuba’mba byako bimo bya nyama, nabiji mafyo byanemene bingi kwi aye. (Tangai Bena Levi 3:6, 12, 14-16.) Onkao mambo, Yehoba waumvwanga bingi bulongo inge mwina Isalela wifuukwila mwine kupana byako byawama bya banyama ne mafuta kwikala kitapisho kwi aye. Mwina Isalela inge wapana kino kitapisho, wamweshanga kuba’mba ukeba kupa Lesa bintu byawamisha. Yesu naye wifuukwijilepo mwine kupana kwi Yehoba kintu kyawamisha bingi kupichila mu kumwingijila na mweo wanji yense na mambo a kumutemwa. (Yoa. 14:31) Kuba kyaswa muchima wa Lesa kwamuletelanga bingi lusekelo Yesu, kabiji watemenwe bingi mizhilo ya Lesa. (Sala. 40:8) Yehoba waumvwine bingi bulongo pa kumona Yesu byo epaine kumwingijila.
11 Kwipana kwetu kwingijila Yehoba kujitu byonka byajinga bitapisho bya mulambo wa mutende, mambo kumwesha byo twamutemwa. Twingijila Yehoba papelela bulume bwetu, kabiji tuba bino mambo twamutemwa na muchima wetu yense. Yehoba umvwa bingi bulongo pa kumona bapopweshi banji bavula byo bepana kumwingijila na mambo a kumutemwa kya kine ne kutemwa mizhilo yanji. Kitutekenesha bingi pa kuyuka’mba Yehoba umona ne kunemeka byo tumwingijila ne kitulengela kumwingijila. Inge mwakota kabiji kechi mwingila kwesakana na byo mukeba ne, shiinwai kuba’mba Yehoba umona byo mwibikako kumwingijila. Kampe mwakonsha kulanguluka’mba kechi mwakonsha kwingijila Lesa pakatampe ne, bino yukai kuba’mba Yehoba umona butemwe bo mwamutemwa bwimulengela kukeba kumwingijila. Usanta bingi pa byo mwibikako kumwingijila papelela bulume bwenu.
Bishinka Bikwabo Byanema
Mepuzho Afuma Ku Batanga
Nyimbi wa masalamo watangijilwe na mupashi kwimba’mba: “Lufu lwa bazhijikwa [bakishinka] banji lo lwa buneme ku meso a Yehoba.” (Sala. 116:15) Bumi bwa mupopweshi yense wa Yehoba bwanema bingi kwi aye. Nangwa byonkabyo, byambo biji mu Salamo 116 kechi bibena kulumbulula lufu lwa muntu umo ne.
Pa kwamba jashi ja kijilo kya mwina Kilishitu, kechi kyawama kwingijisha Salamo 116:15 kwamba pa wafwa nangwa kya kuba awo wafwa wajinga kalume wakishinka wa Yehoba ne. Mambo ka? Mambo bino byambo bya nyimbi wa masalamo kechi bibena kwamba pa muntu umo ne. Kino kibena kulumbulula’mba Lesa kechi uswisha jibumba ja bantu banji bakishinka bonse kufwa ne, mambo banema bingi kwi aye.—Monai Salamo 72:14; 116:8.
DECEMBER 9-15
BYA BUNEME BIJI MU MAMBO A LESA MASALAMO 119:1-56
“Mwanyike Wakonsha Kulengela Byepi Bwikalo Bwanji Kuwama?”
w87 11/1 18 jifu. 10
Nanchi Mwibikako Kwikala Bakishinka mu Bintu Byonse Nyi?
10 Pa Efisesa 5:5 Paulo witujimwineko amba: “Mambo mwayukishatu bulongo kino anwe bene amba, kafwako muntu uba bulalelale nangwa watama nangwa wa lunkumbwa, ko kuba’mba upopwela bankishi ukaswana Bufumu bwa Kilishitu ne bwa Lesa ne.” Nangwa byonkabyo, pa mwaka pa mwaka bantu bavula bebakajipila nangwa kwibapanga mu kipwilo na mambo a bulalelale ne—‘kulenga mambo mibiji yabo abo bene.’ (1 Kolinda 6:18) Javula kilengela bino bintu kubiwa ke na mambo a ‘kubula kwilama ne kubula kubila bintu monka mwayila byambo [Lesa] byanji.’ (Salamo 119:9) Balongo ne banyenga bavula bakankalwa kukookela mafunde a Yehoba inge baya na kufwakasha. Baleka kupwanañana na bakwabo bena Kilishitu ne kutendeka kupwanañana na bantu ba mu ino ntanda. Na mambo a kuba’mba bano bena Kilishitu balanguluka amba ‘abe bantu bantu bajitu bulongo’, ne abo batendeka kuba bintu byatama. Kabiji bakwabo nabo bapwañana na bantu bobengila nabo. Mukulumpe mu kipwilo umo wapwanañananga na mwanamukazhi ye aingilanga nanji kyakuba washile kisemi kyanji ne kutendeka kwikala nanji. Kyafuminemo bamupangile mu kipwilo. Baibolo waamba kine kuba’mba, “Kupwanañana na babi konauna byubilo byawama”.—1 Kolinda 15:33.
w06 6/15 25 jifu. 1
‘Milaye Yenu Intokesha Ku Muchima’
YEHOBA upana milaye ku bantu banji ya kwibakwasha mu bwikalo. Milaye imo twiyumvwa kimye kyo tutanga Baibolo, kabiji ikwabo nayo twiyumvwa mu byambo byambiwa kimye kya kupwila kwa bwina Kilishitu. Bintu bimo byo tutanga nangwa kumvwa twibiyukila jimo. Kampe kimye kimo twibifunjilepo kunyuma. Pano bino mambo a kuba’mba tulubamo, kimye kyonse kikebewa kupitulukamo mu milaye, mizhilo, ne mafunde a Yehoba. Twafwainwa kutemwa milaye ya Lesa. Itulengela kwikala bashikimanatu ku mupashi ne kwikala bwikalo butokesha Lesa ku muchima. Nyimbi wa masalamo waambile’mba: ‘Milaye yenu intokesha ku muchima.’—Masalamo 119:24.
Fumyai Meso Enu ku Bintu Byatu!
2 Nangwa byonkabyo, bintu byo tumona byakonsha ne kwituletela makatazho. Lukwatankano luji pakachi ka kumona ne milanguluko yetu lwakosa bingi kya kuba bintu byo tumona byakonsha kulubankanya milanguluko yetu ne byo tusaka mu michima yetu. Kabiji na mambo a kuba tubena kwikala mu ntanda ibena kulamwa ne Satana Diabola muji bantu batama kabiji bakebatu kwisangajika bene, bintu byo tutamba ne byambo bya bubela byambiwa byakonsha kwitutwala mungi, nangwa kya kuba twatambakotu pacheche. (1 Yoa. 5:19) O ene mambo nyimbi wa masalamo o asashijile Lesa amba: “Mufumyeko meso ami kechi atale ku byatu ne, Bansangule mu mashinda enu.”—Sala. 119:37.
Bishinka Bikwabo Byanema
w05 4/15 10 jifu. 2
Ketekelai Mu Byambo Bya Yehoba
2 Kishina kya Salamo 119 kyaimena pa buneme bwa mambo nangwa amba byambo bya Lesa. Pa kuba’mba balabijile bino byambo bulongo, nembi wanembele uno lwimbo wa mavesi 176 mu ndonda, kulondela bisopelo bya mafumutulume bya Kihebelu. Mu Kihebelu kine kitanshi, bibaba byonse 22 bya Salamo biji na mikuku ya byambo 8. Kabiji mikuku ya byambo mu kibaba kimo kimo yatatula na kisopelo kya mutundutu umo mu Kihebelu. Uno salamo waamba pa byambo bya Lesa, mizhilo, milaye, mashinda, byatongolwa, mikambizho, mafunde, ne malamuna. Mu uno mutwe ne walondelapo, Salamo 119 waambiwapo monka mwayila byambo bya mu Baibolo bya Kihebelu. Kulanguluka languluka pa bintu byapichilengamo bakalume ba Yehoba ba kala ne ba ano moba kwitulengela kumvwisha uno lwimbo wanembeshiwa na Lesa ne kutwajijila na kusanta pa Baibolo, byambo bya Lesa.
TAIKO MUCHIMA KU MWINGILO WA KUSAPWILA
Nakonsha Kushinda Byepi Meseko?
ijwyp 83
Mutumwa Paulo wanembele’mba: “Byo nkeba kuba kyaoloka, kyatama kyo kinkosela.” (Loma 7:21) Nanchi mwakyumvwapo bino nyi? Inge ibyo, ko kuba’mba kino kibaaba kisakimukwasha kuchinuzhuka kuba bintu byatama inge mwaesekwa.
Byo mwafwainwa kuyuka
Byo mwafwainwa kuba
Byaamba bakwenu
Byo mwafwainwa kuyuka
Lweseko javula lwiya inge bakwetu ke betukanjikizhe kuba bintu byatama. Baibolo waamba’mba: “kupwanañana na babi konauna byubilo byawama.” (1 Kolinda 15:33, tubyambo twa panshi) Kwitukanjikizha ku bakwetu nangwa byambo bya pa intaneti byakonsha kwitongola muchima ne kwitulengela kuba bintu byatama. Kabiji bakonsha ne kwitulengela “kulondela jibumba mu kuba bubi.”—Kulupuka 23:2.
“Kukeba bakwenu kukutemwa kwakonsha kukulengela kuba byonse byo bakeba na mambo a kuba’mba bakutote.”—Jeremy.
Bya kulangulukapo: Mambo ka lweseko kyo lukatezha kushinda inge watesha muchima ku bibena kulanguluka bakwenu?—Byambo bya Maana 29:25.
Kishinka: Kechi wafwainwa kuleka bakwenu kukulengela kuba byatama ne.
Byo mwafwainwa kuba
Shiinwai na byo mwaitabilamo. Inge kechi mwayuka bulongo byo mwaitabilamo ne, mukekala bakitabilambijinga balondelatu bakwabo. Kyanema bingi kulondela lujimuno lwa mu Baibolo lwa kuba’mba: “Monai’mba bintu byonse bijitu bulongo; kakachilai ku kyawama.” (1 Tesalonika 5:21) Kuyuka bulongo byo mwaitabilamo kukemulengela kushiinwa kabiji kukemukwashanga kushinda meseko.
Bya kulangulukapo: Mambo ka o mwashiinwa kuba’mba mizhilo ya Lesa imukwasha bingi?
“Namona kuba’mba inge nalondela bintu byo naitabilamo ne kushinda meseko, bakwetu banemeka bingi.”—Kimberly.
Wanembwa mu Baibolo ye tufunjilako: Danyela. Kyamweka saka akijitu nsongwalume, Danyela “wafuukwilepo mu muchima wanji” kuba’mba ukakokelanga mizhilo ya Lesa.—Danyela 1:8.
Yukai bukoke bwenu. Baibolo waamba pa “bya kusakasaka bya bwanyike”—ko kuba’mba bintu byo tukebesha bingi inge tukiji banyike. (2 Timoti 2:22) Bino bintu kechi kilaka kya kukeba kwilaala kyonkatu ne, bino byavwangamo ne bintu nabiji kukeba kubako bibena kuba bakwenu ne kukeba kwiikela saka ukyangye kufikilamo.
Bya kulangulukapo: Baibolo waamba’mba “muntu yense wesekwa kupichila mu kumukoka ne kumujimbaika ku bya kusakasaka byanji mwine.” (Yakoba 1:14) Ñanyi lweseko lukatampe lo mubena kupitamo?
“Yukai meseko akatampe o mupitamo. Kebai bishinka byakonsha kwimukwasha kushinda oo meseko. Kabiji nembai bishinka byo mwakonsha kwingijisha. Kuba bino kukemukwasha kuyuka bya kushinda lolo lweseko inge mwatalañana nalo jikwabo.”—Sylvia.
Wanembwa mu Baibolo ye tufunjilako: Davida. Pa bimye bimo waongwele na bakwabo nangwa na bisakasaka muchima wanji. Bino Davida wafunjilangako ku byo alubankanyanga ne kwibikako kubula kubwezhapo. Walombele kwi Yehoba amba “lengai mwi amiwa muchima watoka, kabiji bikai mwi amiwa milanguluko ipya, yashikimana.”—Salamo 51:10.
Yukainga bya kuba. Baibolo waamba’mba: “Kange muleke bubi bwimushindenga ne.” (Loma 12:21) Kino kibena kulumbulula’mba kechi mwafwainwa kubanga byatama inge mwaesekwa ne. Mwafwainwa kufuukulapo kubanga byawama.
Bya kulangulukapo: Mwakonsha kuba byepi inge mwaesekwa kuba byatama saka mwayuka bintu byatama bikafumamo?
“Ndanguluka pa byo nkomvwa ku muchima inge naponena mu lolo lweseko. Nanchi nkomvwa bulongo nyi? Bino pa kakimye kachechetu. Nanchi kikandengela kwikala na lusekelo pa kimye kyabaya nyi? Ine, kisakundengelatu kwilangulusha. Nanchi kuba bino kwanema nyi? Ine!”—Sophia.
Wanembwa mu Baibolo ye tufunjilako: Paulo. Nangwa kya kuba wayukile kuba’mba muchima wanji wakebanga kuba byatama, bino Paulo wikanyanga. Wanembele’mba “bino nkanya mubiji wami.”—1 Kolinda 9:27, tubyambo twa panshi.
Kishinka: Anweba bene yenu mufuukulapo byo mwafwainwa kuba na lweseko.
Vulukainga kuba’mba meseko a pa kakimyetu kacheche. Melissa uji na myaka 20 waambile’mba, “Bintu byajinga lweseko lukatampe byo nakijinga ku sukulu luno kechi byanema ne kunematu ne. Kulanguluka bino kundengela kushiinwa kuba’mba nangwatu meseko o mbena kupitamo luno akapita, kabiji kulutwe nkavulukanga kuba’mba naubile bulongo kuchinchika.”
DECEMBER 16-22
BYA BUNEME BIJI MU MAMBO A LESA MASALAMO 119:57-120
Bya Kuchinchika Inge Tubena Kumanama
w06 6/15 20 jifu. 2
“Kine Buku Wenu Wa Mizhilo Byo Namutemwisha!”
2 Mwakonsha kushikisha’mba, “Nga mizhilo ya Lesa yamutekeneshe byepi nyimbi wa masalamo?” Yamutekeneshe mambo waketekejile kuba’mba Yehoba wamutemwa bingi. Kwingijisha mizhilo ya Lesa ko kwamusangajikile nyimbi wa masalamo, nangwa kya kuba balwanyi banji bamumanyikilenga. Wayukile amba Yehoba wamuta bingi muchima. Kwingijisha mizhilo ya Lesa kwamulengejile nyimbi wa masalamo kwikala na maana kukila balwanyi banji kabiji mizhilo ya Lesa yamulamawizhanga. Kukokela mizhilo kwamulengejile kwikala mutende kabiji wajinga na jiwi ja mu muchima jibula kumuzhachisha.—Masalamo 119:1, 9, 65, 93, 98, 165.
w00 12/1 14 jifu. 3
Nanchi Mwatemwa Byakuvululako bya Yehoba na Muchima Yense Nyi?
3 Byakuvululamo bya Yehoba byanemene bingi ku nyimbi wa masalamo waimbile amba: “Mpelawizha kabiji kechi ntaya kimye Kulama mikambizho yenu ne. Mizhinge ya babi yampombakanya, bino kechi mvulama mizhilo yenu ne.” (Salamo 119:60, 61) Byakuvululako bya Yehoba bitukwasha kuchinchika makatazho mambo twayuka amba Shetu wa mwiulu ukafumyapo makatazho onse aleta balwanyi betu pa kimye kyafwainwa. Pa kino kimye, Yehoba ufumyapo mikiika pa kuba’mba twingilenga bulongo mwingilo wa kusapwila.—Mako 13:10.
Bishinka Bikatampe Kufuma mu Buku wa Butanu wa Masalamo
119:71—Buwame ka bwakonsha kufuma mu kumanama? Lumanamo lwakonsha kwitufunjisha kuketekela mwi Yehoba, kulomba kwi aye na mukoyo, kufunda Baibolo ne kwingijisha byo aamba. Byo twakonsha kubapo umvwe ke tumaname byakonsha kusolola bilubo byetu abyo byakonsha kololwa. Kabiji lumanamo kechi lwafwainwa kwitulengela kuzhingila umvwe twaleka’mba lwitolole ne.
“Jijilainga Pamo na Boba Bajila”
3 Kwa kubula nangwa kuzhinaukatu ne, Shetu wa mwiulu uji na kifyele aye Yehoba ye mwine witutekenesha. (Tangai 2 Kolinda 1:3, 4.) Yehoba uji bingi na lusa, kabiji walaya bantu banji amba: “Amiwa yami mbena kwimutekenesha.”—Isa. 51:12; Sala. 119:50, 52, 76.
5 Twafwainwa kuketekela kuba’mba Yehoba uketukwasha. Onkao mambo, kechi twafwainwa kukankazhama kumubuula bulanda bo tuji nabo ne. Kitutekenesha bingi kuyuka’mba Yehoba wayuka bulanda bo twikala nabo kabiji witutekenesha pa kimye kyafwainwa. Witutekenesha byepi?
Bishinka Bikwabo Byanema
Bishinka Bikatampe Kufuma mu Buku wa Butanu wa Masalamo
119:96—Nanchi byambo bya kuba’mba, “ko bukapela bulumbuluke bonse” byatala mwepi? Nyimbi wa masalamo walumbulwila bulumbuluke monka mulangulukila bantu. Kampe wajinga na mulanguluko wa kuba’mba bulumbuluke bwa bantu bupelelela. Bino, mikambizho ya Lesa kechi byo iji ne. Ayo ingila mu mbaji yonse ya bwikalo.
DECEMBER 23-29
BYA BUNEME BIJI MU MAMBO A LESA MASALAMO 119:121-176
Bya Kuchinuzhuka Bintu Bikozha ku Muchima
Funjishainga Jiwi Jenu ja mu Muchima na Mizhilo ne Mafunde a Lesa
5 Pa kuba’mba tumwenemo mu mizhilo ya Lesa, kechi twafwainwa kupelelatu pa kwiitanga nangwa kwiilabijila ne. Twafwainwa kwiitemwa ne kwiinemeka. Mambo a Lesa aamba’mba: “Shikwai byatama, temwaiko byawama.” (Amo. 5:15) Pano twakonsha kuba byepi? Twafwainwa kufunda kumonanga bintu byonka Yehoba byo ebimona. Fwanyikizhai’mba muji na lukatazho lwa kubula kulaala. Dokotala wimubuula mutanchi wakonsha kwimukwasha. Wimubuula ne kajo ko mwafwainwa kuja, makayo a kukosesha mubiji ne kupimpulako bintu bimo. Na mambo a kulondela uno mutanchi, lukatazho lwa kubula kulaala lwapwa. Mwafwainwa kusanchila uno dokotala pa kwimukwasha kupimpulako bwikalo bwenu.
6 Mulenga wetu naye witupa mizhilo yakonsha kwituzhikijila ku bintu byatama bifuma mu bundengamambo kabiji itukwasha kwikala bwikalo bwawama. Baibolo witufunjisha’mba kechi twafwainwa kwikala na bubela, bujimbijimbi, bwivi, kuba bulalelale, bumbanzhi ne bingelekezha ne. (Tangai Byambo bya Maana 6:16-19; Lum. 21:8) Inge twimwena mapesho afumamo mu kulondela mashinda a Yehoba, kitulengela kutemwa Yehoba na muchima yense, ne kutemwa mizhilo yanji.
w93 4/15 17 jifu. 12
Anweba Banyike—Ñanyi Bintu Byomukeba Kuba mu Bwikalo Bwenu?
12 Kyakila pa byonse bufundai kushikwa bintu byonse byatama. (Masalamo 97:10) Mwakonsha kushikwa byepi kintu kyo mwatemwa bingi? Inge ke mulanguluke pa bintu byatama byakonsha kufumamo kabiji “Kange mujimbaikwe ne: Lesa kechi ukosamikwa ne. Mambo kyonka muntu kyo abyala, kyo kyo akanowa; Mambo yense ubyala ku mubiji ukanowa bubole konka ku mubiji.” (Ngalatiya 6:7, 8) Inge mwaesekwa kuba bintu byatama langulukainga pa bintu byatama byakonsha kufumamo kabiji ne byo byakonsha kufichisha Yehoba Lesa ku muchima. (Esakanyaiko Salamo 78:41.) Langulukai ne pa byakonsha kufumamo nabiji kwikala na jimi nangwa kusambula kikola nabiji AIDS. Kabiji langulukai ne pa bikemumonanga bakwenu ne jiwi ja mu muchima byo jikemuzhachishanga. Kabiji ne pa bikapimpula bwikalo bwenu. Mwanamukazhi mwina Kilishitu umo waambile’mba: “Amiwa ne bamwatawami twaubile bulalelale saka tukyangye kwisongola. Nangwa kya kuba aluno twi bena Kilishitu, bintu byo twaubile bitulengela kubula kwiketekela mu masongola etu.” Kechi mwafwainwa kubanga bintu byafwainwa kwimulengela kwimutambula mingilo imo nangwa kwimulengela kwimupangwa mu kipwilo kya Bwina Kilishitu ne! (1 Kolinda 5:9-13) Nanchi mukena kwikala na lusekelo lwapaka kimye kachechetu nyi?
Bishinka Bikwabo Byanema
‘Shiinwai Kuba’mba ‘Byambo bya Lesa bo Bukine’’
8 Bantu ba Yehoba bonse bashiinwa kuba’mba ye “Lesa wa bukine” kabiji wibobila bintu byawama. (Sala. 31:5; Isa. 48:17) Twayuka kuba’mba twafwainwa kuketekela Baibolo mambo “kishina kya byambo [bya Lesa] bo bukine.” (Tangai Salamo 119:160.) Twakonsha kuswa byanembele shayuka umo wa Baibolo amba: “Kafwako byambo byaambile Lesa byabujile kufika nangwa bikabula kufika ne. Bantu ba Lesa baketekela bintu byonse byaambile Lesa mambo baketekela mwine Lesa wibyambile.”
DECEMBER 30–JANUARY 5
BYA BUNEME BIJI MU MAMBO A LESA MASALAMO 120-126
Bakushile Nkunwa na Mipolo, Bino Banowele na Lusekelo
Batokwa ke Boba Bapa Lesa Lukumo
10 Umvwe twatambula kikonkoji kya kwikala mwana wa bwanga, ko kuba’mba tubena kumulwisha Satana. Yakoba 4:7 walaya’mba, ‘Diabola, mukanai, ne aye ukemunyema.’ Kino kechi kibena kulumbulula’mba kyapela kumukana Diabola ne. Kwingijila Lesa kukebewa kwibikako kya kine kine. (Luka 13:24) Bino Baibolo walaya bino byambo bitanwa mu Masalamo 126:5 amba: “Aba bakusa nkunwa na mipolo bakanowa na lusekelo.” Ee, kechi twingijila Lesa wabula lusanchilo ne. Aye “ye ufweta boba bamukebesha,” kabiji upesha boba bamupa lukumo.—Bahebelu 11:6.
Nanchi Lwitabilo Lwenu Lukatwajijila Kukosa Nyi?
17 Nanchi muji na bulanda na mambo a kufwisha mulongo wenu nyi? Ikalaingapo na kimye kya kukosesha lwitabilo lwenu mu luketekelo lwa lusanguko kupichila mu kutanga mashimikila a mu Baibolo a bantu bo basangwile. Nanchi muji na bulanda mambo mulongo wenu bamupanga mu kipwilo nyi? Fundai byaamba Baibolo pa kuba’mba muyuke’mba lujimuno lwa Lesa kimye kyonse lwawama. Lukatazho lonse lo mwakonsha kupitamo, lumonainga’mba kintu kyafwainwa kwimukwasha kukosesha lwitabilo lwenu. Mubuulai Yehoba byonse biji ku muchima wenu. Kange mwitolwele ne, bino pwanañanainga na balongo ne banyenga kimye kyonse. (Maana 18:1) Ubainga bintu bikemukwasha kuchinchika, nangwa kya kuba mwakonsha kujila umvwe mwavuluka bintu bimumwekela. (Sala. 126:5, 6) Twajijilai kupwila, kusapwila, ne kutanga Baibolo. Kabiji langulukainga pa bintu byawama bitunengezhezha Yehoba biji kulutwe. Umvwe kemumone Yehoba byo abena kwimukwasha, lwitabilo lwenu mwi aye lukakoselako.
w01 7/15 18-19 jifu. 13-14
Twajijilai na Kwingila Mwingilo wa Kunowa!
13 Pa Masalamo 126:5, 6 paji byambo bya lutekenesho ku ba mwingilo ba Lesa, kikatakata ku boba bamanyikwa. Paamba’mba: “Aba bakusa nkunwa na mipolo bakanowa na lusekelo. Awa ulupuka na kujila, kasa asenda nkunwa, kine ukabwela na kusangalala, kasa asenda bikuta byanji.” Bino byambo bya nyimbi wa masalamo bya kukusa ne kunowa bibena kumwesha Yehoba byo alamine ne kupesha boba bashajilepo babwelele kufuma mu buzha ku Babilona. Basangalele bingi kimye bebakasulwileko, pano bino kampe bajijile mipolo pa kubyala nkunwa yabo mu masala aikala pa myaka 70 yobajinga mu buzha. Nangwa byonkabyo, aba batwajijile na kukusa ne kwingila mingilo ya kushimika bamwene lusekelo mu mingilo ya maboko abo.
14 Kimo kimye twakonsha kujila mipolo umvwe tuji mu lweseko nangwa umvwe ketumaname pamo na bakwetu baitabila “na mambo a bololoke.” (1 Petelo 3:14) Pa kutatula mwingilo wetu wa kunowa, kyakonsha kwitukatazha bingi mambo a kuba kafwapo kyo twamonapo kya kumwesha’mba kyo kyafuma mu uno mwingilo ne. Pano umvwe twatwajijila na kukusa ne kutakezha, Lesa ukebikomesha kukila ne byo tulanguluka. (1 Kolinda 3:6) Kino kimweka mu byo tusampanya ma Baibolo ne mabuku akwabo alumbulula Binembelo.
Bishinka Bikwabo Byanema:
Bulume bwa Kuzhikijila—“Lesa Ye Kyetu kya Kufyamamo”
15 Patanshi akilangulukai pa mambo a luzhikijilo lwa ku mubiji. Byo tuji bapopweshi ba Yehoba, twakonsha kuketekela luno luzhikijilo lwa kwituzhikijila mu bujibumba jonse. Mambo inge ne, kyakonsha kumupelela bingi Satana kwituvizha. Akilangulukai kino: Satana aye “mfumu wa panopantanda,” ukebesha bingi kuchakulapo bupopweshi bwa kine. (Yoano 12:31; Lumwekesho 12:17) Makafulumende amo a ngovu panopantanda akanya mwingilo wetu wa kusapwila ne kweseka kwituvizhatu bonse pelu. Nangwa byonkabyo, bantu ba Yehoba bakosa kabiji batwajijila kusapwila kwa kubula moyo! Mambo ka byalo bya ngovu o byakankelwa kukanya mwingilo wa jino jibumba jicheche ja bena Kilishitu babena kumweka nobe kechi bajipo ne na wa kwibalamwinako ne? Mambo Yehoba wituzhikijila na byapi byanji bya kifwanyikizho!—Masalamo 17:7, 8.