Bwipuzho Bwapeela bo Mwakonsha Kwipuzha

Ba Mary ne bamwatawabo ba John bekala mu kyalo mwiya na kwingijila bantu bavula bafuma ku kyalo kya Philippines,a kabiji bekala bingi na lusekelo kusapwila ku bano bantu. Mu kimye kya mwalo wa COVID-19, ba Mary batendekele kufunjisha bantu Baibolo kuvwangakotu ne bantu bekala mu byalo bingi. Baubile byepi bino?

Ba Mary baipuzhanga bantu bo bafunjishanga Baibolo amba, “Nanchi mwayukapo bantu bakwabo bakonsha kutemwa kufunda Baibolo nyi?” Inge baamba’mba emwane, bebepuzhanga jikwabo’mba, “Nakonsha kwibataana byepi?” Kwipuzha buno bwipuzho bwapeela mufuma bintu byawama bingi. Mambo ka? Mambo bantu batemwa byo bafunda mu Mambo a Lesa javula bakeba kubuulako ba mu kisemi kyabo ne balunda nabo bintu byo babena kufunda. Ñanyi bintu byawama byafuminemo ba Mary byo baipwizhe buno bwipuzho?

Muntu ba Mary ye bafunjishenga Baibolo aye Jasmin wibabuujile pa bantu bana bakebelenga kufunda Baibolo. Pa bano pajinga ne ba Kristine batemenwe bingi byo bafunjilenga kya kuba baambijile ba Mary kuba’mba bebafunjishenga jibiji mu mulungu. Ba Mary byo bebepwizhe inge kwajingapo bantu bakwabo bakebelenga kufunda Baibolo, ba Kristine baambile’mba, “Emwane, nkabuula balunda nami bakeba kufunda Baibolo.” Mu milungutu icheche, ba Mary batendekele kufunjisha Baibolo balunda ba ba Kristine. Palutwe kacheche, ba Kristine babuujileko ne balunda nabo bakwabo, kabiji bano nabo baubiletu kintutu kimo ku bakwabo.

Ba Kristine bakebelenga ne kisemi kyabo kyajinga mu kyalo kya Philippines kufunda Baibolo. Onkao mambo, besambile na mwanabo wamukazhi aye Andrea. Patanshi, Andrea walangulukanga’mba, ‘Bakamonyi ba kwa Yehoba ke jibumba ja bupopweshi jabula kwitabila mwi Yesu kabiji bengijishatu Binembelo bya Kihebelu.’ Pano bino, pa juba jitanshi jo atendekele kufunda Baibolo, wayukile’mba byo alangulukanga pa Bakamonyi ba kwa Yehoba byajinga bya bubela. Kimye kyonse inge wafunjilapo bya katataka, waambanga’mba, “Kikulutu Baibolo inge byo byo aamba, ko kuba’mba bya kine.”

Mu kuya kwa kimye, Andrea wabuujile ba Mary pa balunda nanji babiji ne mukwabo mo baingijilanga bakebelenga kufunda Baibolo. Kabiji Andrea wajinga na bashanjinkazhi bafwile meso batanwanga pa lufunjisho kwakubula ba Mary kuyuka. Juba jimo, ba Angela baambijile Andrea kuba’mba nabo bakeba kufunda Baibolo. Ba Angela batemenwe bingi bintu byo bafunjilenga. Mu ñondotu umo, balabijile binembelo byavula bingi kabiji bakebelenga kufundanga Baibolo jina mu mulungu. Na bukwasho bwa kwa Andrea, batendekele kutaanwa ku kupwila kimye kyonse pa Zoom.

Ba Mary byo bayukile’mba balume ba ba Kristine abo ba Joshua baikalanga kipikipi inge bakazhi babo babena kufunda Baibolo, ba Mary bebepwizhe inge bakonsha kutemwa kutanwapo pa lufunjisho. Ba Joshua baambile’mba, “Nsakutelekangakotu kabiji kechi mwafwainwa kungipuzha mepuzho aji onse ne; inge mutendeke kungipuzha mepuzho, nsakufumapo.” Byo papichiletu mamini atanu kufuma po batendekejile kufunda Baibolo, baipwizhe mepuzho avula bingi kukila ne mepuzho aipwizhe ba Kristine kabiji nabo bakebelenga kufunda Baibolo.

Bwipuzho bwapeela bwaipwizhe ba Mary bwibalengejile kutaana bantu bavula ba kufunjisha Baibolo. Na mambo a kuba’mba bantu bakebelenga kufunda Baibolo bavujile, baambijile basapwishi bakwabo kuba’mba bebafunjishenga Baibolo. Ba Mary batendekele kufunjisha bantu Baibolo 28 bekala mu byalo bina.

Jasmin ye twaambapo ku ntendekelo wabatizhiwe mu April 2021. Ba Kristine babatizhiwe mu May 2022 kabiji babwela ku kyalo kya Philippines na kwikala pamo na kisemi kyabo. Kabiji balunda ba ba Kristine babiji bo batendekele kufunjisha Baibolo ku ba Mary nabo babatizhiwe. Ba Angela babatizhiwe byo papichile bañondo bacheche kabiji luno ke bapainiya ba kimye kyonse. Balume ba ba Kristine abo ba Joshua ne mwanabo wamukazhi Andrea kuvwangakotu ne bantu bakwabo babena kufunda Baibolo babena kuba bingi bulongo.

Mu myaka kitota kitanshi, mambo awama akumbene bukiji ku ba mu kisemi ne ku balunda. (Yoa. 1:41, 42; Byu. 10:24, 27, 48; 16:25-33) Ne anweba mwafwainwa kwipuzha bo mufunjisha Baibolo ne bantutu bakwabo bakeba kufunda Baibolo amba, “Nanchi mwayukapo bantu bakwabo bakonsha kutemwa kufunda Baibolo nyi?” Inge ke mwipuzhe buno bwipuzho bwapeela, kampe ne anweba mukataana bantu bavula ba kufunjisha Baibolo.