Yesu “Wafunjile Lukookelo”

Yesu kimye kyonse ukookela Yehoba. (Yoa. 8:29) Pano mambo ka Baibolo o aambila’mba: “Wafunjile lukookelo ku bintu byo amanamine”?​—Hebe. 5:8.

Byo ajinga pano pa ntanda, Yesu wapichile mu bintu byo abujile kupitamo byo ajinga mwiulu. Nangwa kya kuba bamukomeshe ku bansemi baakamwanga Lesa, pano bino bajinga bambulwakulumbuluka. (Luka 2:51) Bamumanyikile ku bantangi ba bupopweshi bakanamine bingi ne babilolo ba mu kafulumende. (Mat. 26:59; Mako 15:15) Kabiji wafwile lufu lwatama bingi. Baibolo waamba’mba: “Wipelwile mwine ne kukookela kufikatu ne ku lufu.”​—Fili. 2:8.

Onkao mambo, bintu Yesu byo apichilemo byo ajinga pano pa ntanda byamufunjishe lukookelo mu jishinda jikwabo. Na mambo a bino, wafikijilemo kwikala Mfumu kabiji Ñanga Mukatampe witubila lusa. (Hebe. 4:15; 5:9) Yehoba wanemekele bingi Yesu na mambo a lukookelo lo afunjile ku bintu byo amanamine. Ne atweba Yehoba uketunemeka bingi inge twatwajijila kumukookela pa kwingila mingilo yonse yo betupa nangwa kya kuba tubena kupita mu makatazho.​—Yako. 1:4.