Batwajijile Kusapwila

Balongo pa musampi byo baumvwinetu’mba balekesha mwingilo wetu, bafuukwilepo kuba kintu kimo. Ronald Jacka waambile’mba: “Twavilwile bintu bya bufyamfya, mabuku ne mali a musampi ne kukeafya kwafyamika monse mu Jakarta. Kabiji twakashimikijile ofweshi wa musampi ku mpunzha kungi ne kupotesha bishimikwa bya ofweshi wa musampi wa kala kwa kubula bantu kuyuka.”

Balongo bavula bakonkakwa batwajijile kwingila kwa kubula kuchina. Bachinchikile meseko avula bingi aishile na mambo a kukanya mwingilo, kabiji batwajijile kuketekela mwi Yehoba. Bino balongo bamo bakankelwe kuchinchika. Bakulumpe bamo mu kipwilo baumvwine moyo ne kunemba’mba baleka kusapwila. Pakuba bakwabo basolwele mazhina a basapwishi mu kipwilo. Ofweshi wa musampi watumine balongo bafikilamo kuya na kukosesha bipwilo ne kukwasha boba bakankelwe kuchinchika. John Booth wa mu Jibumba Jitangijila naye wafwakashijile Indonesia ne kutundaika balongo bamo ne banyenga.

Kwambatu kine, Yehoba Kafunga Mukatampe wakoseshenga ne kutekenesha bantu banji. (Ezi. 34:15) Bakulumpe mu kipwilo batendekele kutangijila kabiji basapwishi bamwenepo mashinda akatataka a kwingijisha pa kusapwila. (Mat. 10:16) Balongo bavula bapotele ma Baibolo akatataka apeela mutengo ku kipamo kya Indonesian Bible Society ne kupa bantu bo basapwilangako mambo a Bufumu kwa kubula kwibalabijila. Bakwabo bafumyangapo keyala pa mabuku etu ne kwiapana ku bantu bakebanga kufunda. Bapainiya bavula batwajijile kusapwila saka babena kwifwanyikizha nobe basulu byonkatu byaubanga bakwabo kimye kyo bebalamanga ku kyalo kya Japan.

Mu 1977, Kipamo Kitala pa bya Bupopweshi kyalukukile jikwabo Bakamonyi, kabiji kyakaine kupa bitupa bamishonale ba Bakamonyi ba kwa Yehoba. Bamishonale bavula ba Bakamonyi bebatumine kuya na kwingijila ku byalo bikwabo.a Norbert Häusler mishonale waingijilanga pamo na mukazhanji Margarete ku Manado mu North Sulawesi, waambile’mba: “Balongo ne banyenga bavula baishile ku kibanza kya ndeke na kwitwambila’mba mwendepo bulongo. Twakanjijile mu ndeke ne kutala kunyuma. Bavula betusokwene ne kwitwambila’mba: ‘Mwendepo bulongo. Kyawama bingi byo mwaishile kuno.’ Twaikele mu ndeke ne kutendeka kujila.”

Ba pa Jikuji ja Sumba Bazhingijile Bingi

Mbila byo yakumbene pa makuji onse, Machechi a mu Indonesia aambijile bantu babo kuba’mba inge bataana Kamonyi na kusapwila bafwainwa kuloba ku bakapokola. Akino kyalengejile bavula baikalanga pa makuji kwibakwata ne kwibatotolwesha.

Mu Waingapu pa jikuji ja Sumba, mukulumpe wa bashilikale watwajile balongo 23 ku kampu wa bashilikale ne kwibakambizha’mba banembe pa pepala amba basankilapo lwitabilo lwabo. Balongo byo bakaine kunemba, mukulumpe wa bashilikale waambijile balongo amba bakabwele ku kampu kesha, po baendanga makilomita 14 kuya ne kubwela.

Balongo byo baishile na kumona mukulumpe wa bashilikale juba jalondejilepo, bebechilenga umo umo ne kwibakambizha kunemba pa pepala. Inge mulongo wakana kunemba, bashilikale bamuzhipaulanga na kichi kya miba. Bashilikale bapuminenga balongo betu ne kwibasha saka bapungila. Nangwa byonkabyo, balongo bakwabo nabo bapembejilenga kuyako. Mulongo mwanyike wapeleleko wa jizhina ja Mone Kele wayile ne kunemba pa uno pepala. Balongo byo bamwene kino, bakankamenetu, pakuba mukulumpe wa bashilikale wazhingijile bingi. Mambo Mone wanembele’mba, “Nasalapo kutwajijila kwikala Kamonyi wa kwa Yehoba!” Mone bamupumine ne kukapupulukila ku kipatela, pano bino kechi wasankijilepo bulunda bwanji ne Yehoba ne.

Mukulumpe wa bashilikale waesekele pa moba 11 kuba’mba alengele balongo kusankilapo bukishinka bwabo. Wibakambizhe kwimana juba jonse mu mute wazonga. Wibakanjikizhe kukalaba musinso walepa ne kunyema musinso walepa saka basenda bintu byanema. Byo ebashishikile mupenyi pa nshingo, uno mukulumpe wibakambizhe kunemeka mbandela; bino abo bakaine. Wakambizhe’mba bebapume ne jikwabo.

Pa juba pa juba, balongo bayanga ku kampu kwa kubula kuyuka byo basakwiboba. Byo bayilenga, balombejile pamo ne kwitundaika mulwabo kwikala ba kishinka. Pa kubwela ku nzubo saka baji na bilonda ne bizabila bya mashi, basangalalanga mambo baikele ba kishinka kwi Yehoba.

Ofweshi wa musampi byo aumvwine’mba balongo babena kwibamanyika, ponkapotu batumine nkalata ya kwijizhanya ku mukulumpe wa bashilikale wa mu Waingapu, mukulumpe wa bashilikale wa mu Timor, mukulumpe wa bashilikale wa mu Bali, mukulumpe mwine wa bashilikale wa mu Jakarta ne ku biloolo bikwabo bya mu kafulumende. Byo kyamukolele ku muchima pa kuyuka’mba bintu byo aubilenga bebiyuka monse mu Indonesia, mukulumpe wa bashilikale wa mu Waingapu walekele kumanyika balongo.

“Bakamonyi ba kwa Yehoba Baji Nobe Misomali”

Mu myaka yalondejilepo, Bakamonyi bavula mu Indonesia monse bebakwachile, bebatotolweshe ne kwibapuma. Mishonale umo aye Bill Perrie waambile’mba, “Ku mpunzha imo, balongo bebazokwele meno. Inge bataana mulongo mukwabo uji na meno onse mu kanwa, bamwipuzhanga’mba: ‘Wiwakatataka nyi? Nangwa wasankijilepo lwitabilo nyi?’ Nangwa kya kuba bapichilenga mu makatazho, aba bo bamanyikilenga kechi balekele kwingijila Yehoba ne.”

Pa myaka 13 yapichilepo, Bakamonyi 93 bebakashile mu tuleya pa bañondo babiji kufika ku myaka ina. Akuno kwibamanyika, kwibakwashishe kukosesha bukishinka bwabo ne Yehoba. Musa Rade byo afumine mu kaleya mo bamukashile bañondo batanu na basatu, wafwakashijile balongo mu mpunzha mo aikalanga ne kwibatundaika kutwajijila kusapwila. Waambile’mba: “Kwikala mu kaleya kwandengejile kukilamo kuketekela mwi Yehoba, kabiji kwandengejile kukosesha bulunda bwami ne aye. O ene mambo bantu bamo o baambijile’mba: “Bakamonyi ba kwa Yehoba bajitu nobe misomali. Umvwe mwatwajijila kwibamanyika, po po bakoselako mu lwitabilo lwabo.”