BANYIKE BEPUZHA’MBA
Nanchi Kwilaala kwa Banabalume Bonka Bonka Nangwa Banabakazhi Bonka Bonka Kwatama Nyi?
David wa myaka 23 waambile’mba: “Byo nakomenenga, lukatazho lo najinga nalo nakumbwanga bingi bansongwalume bakwetu. Nalangulukilenga’mba inge nakoma aluno lukatazho lukapwa, bino lwakitwajijilatu.”
David ke mwina Kilishitu ubena kwibikako bingi kuba bintu bitokesha Lesa ku muchima. Abya wakonsha kutokesha Lesa ku muchima inge watwajijila kwikala na muchima wa kukeba kwilaala na banabalume bakwabo nyi? Nanchi Lesa umvwa byepi ku muchima na bantu belaala na banabalume nangwa banabakazhi bakwabo?
Nanchi Baibolo waambapo’mba ka?
Bantu bakomena mu mapunzha apusana pusana nangwa baikala mu mapunzha apusana pusana, bamba bintu byapusana pusana bingi pa kwilaala kwa banabalume bonka bonka nangwa banabakazhi bonka bonka. Pakuba bena Kilishitu bapusana bingi mambo abo kechi balondela byamba bantu ne. Kabiji kechi ‘balondela mafunjisho a bubela a bantu bajimbaika bakwabo’ ne. (Efisesa 4:14) Onkao mambo, abo balondela byaamba Baibolo pa banabalume nangwa banabakazhi kwilaala mulwabo ne byubilotu bikwabo byatama.
Baibolo wakanya banabalume kwilaala na banabalume bakwabo nangwa banabakazhi kwilaala na banabakazhi bakwabo. Mambo a Lesa aamba’mba:
“Kechi wafwainwa kwilaala na mwanamulume mukwenu byonkatu byo wilaala na mwanamukazhi ne.”—Bena Levi 18:22.
“Lesa wibashile ne kwibaleka , . . . monka mwayila lwiso lwa michima yabo, . . . kwikala na milanguluko yatama ibindankanya muchima, mambo banabakazhi babo balekele kubila mwayila kisemwa kya bantu.”—Loma 1:24, 26.
“Kange bemutwale mungi ne. Ba bulalelale, bapopwela bankishi, bankende, banabalume baswisha banabalume bakwabo kwibalaala, banabalume belaala na banabalume bakwabo, bangivi, ba lunkumbwa, bapendwapendwa, batukana, ne baja bya lunkanankana kechi bakaswana Bufumu bwa Lesa ne.”—1 Kolinda 6:9, 10.
Bantu bonse na mambo a kuba’mba bandengamambo bimye bimo bakeba bingi kuba bintu byatama. Pano bino, atweba bonse twafwainwa kwibikako bingi kwikanya kwivwanga mu byubilo byatama nabiji bulalelale pa kuba’mba tubenga bintu bitokesha Lesa ku muchima.—Kolose 3:5.
Nanchi kino kibena kulumbulula ka?
Nanchi kino kibena kulumbulula’mba Baibolo ubena kwitutundaika kushikwa banabalume belaala mulwabo ne banabakazhi belaala mulwabo nyi?
Ine kechi ibyo ne. Baibolo kechi witutundaika’mba twafwainwa kushikwa bano bantu ne. Pakuba witubuula’mba “kebeshainga kwikala mu mutende na bantu bonse” nangwa boba bintu bitokesha Lesa ku muchima nangwa ne. (Bahebelu 12:14) Onkao mambo, kyatama bingi kuyanjisha bantu na mambo a kuba’mba belaala na banabalume bakwabo nangwa belaala na banabakazhi bakwabo.
Nanchi kino kibena kulumbulula’mba bena Kilishitu bafwainwa kulengulula mizhilo yaswisha banabalume kwisongola mulwabo nangwa banabakazhi kwisongola mulwabo nyi?
Baibolo waamba’mba Lesa wanengezhe kuba’mba mwanamulume ne mwanamukazhi bafwainwa kwisongola. (Mateo 19:4-6) Pano bino, makafulumende a bantu abikako mizhilo yaamba pa masongola mwayila milanguluko ya bantu kechi yaimena pa Baibolo ne. Mambo Baibolo wakambizha bena Kilishitu kubula kwivwanga mu bya pano pa ntanda. (Yoano 18:36) Onkao mambo, bena Kilishitu ba kine kechi batundaika nangwa kukanya mizhilo ibikako kafulumende yaamba pa masongola a banabalume bonka bonka nangwa banabakazhi bonka bonka, nangwa banabalume kwilaala mulwabo nangwa banabakazhi kwilaala mulwabo ne.
Mepuzho akwabo
Pano kyakonsha kwikala byepi inge umo ukilaala na banabalume bakwabo nangwa na banabakazhi bakwabo? Nanchi uno muntu wakonsha kwikileka kino kyubilo nyi?
Ee, wakonsha kwikileka. Mambo bena Kilishitu bamo batanshi bekilekele kino kyubilo. Baibolo byo apwishatu kwamba’mba aba belaala na banabalume bakwabo kechi bakaswana Bufumu bwa Lesa ne, wanungapo’mba: “Bamo mwajinga byonka bino.”—1 Kolinda 6:9-11.
Nanchi kino kibena kulumbulula’mba aba balekele kwilaala na banabalume bakwabo balekele kulangulukapo pa kukeba kwilaala na banabalume bakwabo nyi? Ine. Baibolo waamba’mba: ‘Vwalai bumuntu bupya, bubena kulengwa ke bupya kupichila mu kuyukisha bintu bulongo.’ (Kolose 3:10) Onkao mambo, twafwainwa kutwajijila kwibikako kupimpula byubilo byetu.
Bino kyafwainwa kwikala byepi inge muntu ubena kukebesha kulondelanga mafunde a Lesa, bino kilaka kya kwilaala na banabalume bakwabo nangwa banabakazhi bakwabo kikimukatazha?
Byonkatu byo kikala ku muntu uji na milanguluko yatama ya bintu bimo, muntu mwine wakonsha kusalapo kutwajijila kulangulukangapo nangwa kwibyuba. Wafwainwa kuba byepi? Baibolo waamba’mba: “Endainga monka mwayila lutangijilo lwa mupashi kabiji kechi mukoba bisakasaka mubiji ne.”—Ngalatiya 5:16.
Akino kinembelo kechi kyaamba’mba kyapwa milanguluko yatama kechi ikeyapo jibiji mu muchima wa muntu ne. Pakuba inge saka batanga Baibolo ne kulomba kwi Lesa, bakekala na bulume bwa kukana milanguluko yatama.
David ye twaji kwambapo ku ntendekelo, washiinwe kuba’mba byo abuujile bansemi banji bena Kilishitu pa lukatazho lo ajinga nalo, bintu byamuwamijile. Waamba’mba: “Nakasulukile bingi kabiji bwikalo bwami bwa ku bwanyike inge bwakijilemo kuwama inge kya kuba nabuujile bukiji bansemi bami pa lukatazho lo najinga nalo.”
Kashika bwikalo bwetu bukawama bingi inge kya kuba twatwajijila kulondela mizhilo ya Yehoba mu bwikalo bwetu bonse. Twashiinwa kuba’mba mizhilo ya Yehoba ‘yaoloka, isangajika muchima’ kabiji “mu kwiilama, mufuma mfweto ikatampe.”—Salamo 19:8, 11.