Kikoba Kitwezha Mema kya Mansobela uji na Miba pa Mubiji

MANSOBELA uji na miba wa ku Australia ukoka mema ku kamfwa, kinyanzhinyanzhi ne ku busenga bwazoba. Panyuma ya kuba bino, utoma ano mema. Pano utoma byepi? Kyamweka wingijisha kikoba kyanji kyalengwa mu jishinda ja kukumya.

Langulukai pa kino: Kikoba kya uno mansobela uji na miba kiji na mabamba. Bashayuka ba bya sayansi bamo balanguluka’mba kinyanzhinyanzhi nangwa kime kitwela mu mabamba kupita mu kikoba kyakosakana ne kutwela mu tumashinda twapita mu mabamba. Tuno tumashinda mupita mema twasambakana tonse kabiji tutwala ano mema mu kanwa ka uno mansobela.

Pano uno mansobela upisha byepi mema kufuma ku maulu kupita pa mubiji ne kuya na kutwela mu kanwa? Kabiji uno mansobela uji na miba ukoka byepi mema ku bintu byauba kinyanzhi kupichila mu kukwesako jivumo janji?

Bashayuka ba bya sayansi batana kilengela uno mansobela kuba bino. Tumashinda mupita mema tuji peulu ne panshi ya uno mansobela twanungakana pamo kwingijisha tumishipeshipe tuji na uno mansobela. Byalengwa tuno tumishipeshipe tulengela mema kutwela mu mubiji kwakubula nangwa kunkuchikako ne. Onkao mambo kikoba kya uno mansobela kingilatu nobe butonge bukwata bulongo mema.

Mukulumpe pa sukulu mukatampe ufunjisha pa bilengwa na Lesa aye Janine Benyus waambile’mba kulondela jishinda jingijisha uno mansobela ja kutwezhezhamo mema jakonsha kukwasha bashayuka ba bya kulengalenga kufumya kinyazhinyazhi ku bishimikwa mu jishinda jawama ne kulenga mema awama a kutoma.

Mwalangulukapo’mba ka? Nanchi kikoba kitwezha mema kya mansobela uji na miba pa mubiji kyaishilekotu nyi, inyi kyalengelwe?