12 Bikonkwanyi

BYO KILUMBULULA

Kikonkwanyi ke kintu kyo ukeba kuba mu bwikalo bobe, kechi kilototu ne. Wafwainwa kwibikako bingi pa kuba’mba ufikizhe bintu byo ukeba kuba mu bwikalo.

Bikonkwanyi bimo wakonsha kwibifikizha bukiji, bikwabo papita bañondo bavula nangwatu myaka. Pa kuba’mba ufikizhe bikonkwanyi bikatampe, wafwainwa kutendekelapo kufikizha bicheche.

ENE MAMBO O KYANEMENA

Kufikizha bikonkwanyi byobe kwakonsha kukulengela kushiinwa’mba wakonsha ne kuba bintu bikwabo, kukosesha bulunda na bakwenu ne kwikala na lusekelo.

Kwiketekela: Inge wibikila bikonkwanyi bicheche ne kwibifikizha, kikakulengela kwibikila ne bikonkwanyi bikwabo bikatampe ne kwibifikizha. Kabiji kuba bino kukakulengela kuyuka bya kushinda makatazho mu bwikalo nabiji inge bakwenu babena kukukanjikizha kuba bintu byatama.

Kwikala na Balunda: Bantu bavula batemwa bingi kupwanañana na bantu bayuka bintu byo bakeba kuba mu bwikalo kabiji bengila bingi na ngovu. Bino pa kuba’mba ukoseshe bulunda bobe na mukwenu, wafwainwa kubilanga bintu pamo na mulunda nobe.

Kwikala na Lusekelo: Inge wibikila bikonkwanyi ne kwibifikizha, kikakulengela kumvwa bingi bulongo ku muchima.

Christopher waambile’mba: “Natemwa bingi kwibikila bikonkwanyi. Kuba bino kundengela kulanguluka pa mashinda o nakonsha kwingijisha pa kuba’mba mfikizhe bikonkwanyi byami. Kabiji inge nafikizha kikonkwanyi, kindetela bingi lusekelo inge namona byo nauba.”

JIFUNDE JA MU BAIBOLO: “Muntu utala bibena kwenda mwela kechi ukabyala nkunwa ne, ne yewa utala makumbi kechi ukanowa kajo ne.”—Musapwishi 11:4.

BYO WAKONSHA KUBA

Wafwainwa kuba bino byalondelapo pa kuba’mba ufikizhe bikonkwanyi byo wibikila.

Yuka byo ukeba kuba. Nemba bintu byo ukeba kuba ne kimye kyo ukeba kwibyuba. Tanchika bikonkwanyi byo ukeba kufikizha patanshi ne bya kulutwe.

Nemba byo ukeba kuba. Londela bino pa kuba’mba ufikizhe bikonkwanyi byo wasala:

• Ibikile kimye kyo ukobilamo kikonkwanyi kyo wibikila.

• Wafwainwa kuyuka byavwangwa mu bikonkwanyi byo wibikila.

• Languluka pa makatazho o wafwainwa kwikala nao ne byo wafwainwa kwiashinda.

Ingijilapo. Kechi wafwainwa kupembelela’mba wikale na bishinka byonse pa bintu byo ukeba kuba ne. Iipuzhe’mba, ‘Ñanyi kintu kitanshi kyo nafwainwa kuba pa kuba’mba mfikizhe kikonkwanyi kyami? Inge wayuka byobyo, popo wafwainwa kutendekako. Pitulukanga mu byo ubena kwingila inge wafikizha kikonkwanyi kimo.

JIFUNDE JA MU BAIBOLO: “Bintu bifuukula muntu wingila na ngovu bikalumbuluka.”—Byambo bya Maana 21:5.