Bya Kufikizha Bikonkwanyi Byenu bya ku Mupashi
1. Bikonkwanyi ka bya ku mupashi bakyanyike bavula bena Kilishitu byo baji nabyo?
1 Kwa kubula nangwa kuzhinaukatu ne, byo muji mwina Kilishitu wakyanyike, mwibikila bikonkwanyi na mambo a butemwe bo mwatemwa Yehoba ne byambo bya kwa Yesu byo aambile ku bena Kilishitu bonse amba ‘sambilai kukebesha bufumu bwanji patanshi.’ (Mat. 6:33) Kikonkwanyi kyenu kyakonsha kwikala kya kubaishako mwingilo wenu kupichila mu kwingilako bupainiya bwa kimye kyonse, nangwa kwingijila kuji kukajilwa kukatampe kwa basapwishi ba Bufumu. Bamo kampe bakeba kwipana kwingilako mwingilo wa buntungi, kwingijila pa musampi, nangwa kwingijila kuji kukajilwa kukatampe. Bino bikonkwanyi kine byawama kabiji bikebewa bingi!
2. Ki ka kyakonsha kwimukwasha kufikizha bikonkwanyi byenu bya ku mupashi?
2 Kintu kyakonsha kwimukwasha kufikizha bikonkwanyi byenu bya ku mupashi ke kwibinemba. Kyamba kya Usopa kya Kibemba, kya July 15, 2004, kyaambile’mba: “Kunemba mulanguluko kwanema mambo kukwasha kumuvuluka, kukila kumwambatu mukanwa. Onkao mambo, mwakonsha kusalapo kunemba pa kipepala bikonkwanyi byenu ne mashinda mwa kwibifikizhizha.” Kunungapo, bikonkwanyi bicheche byakonsha kwimukwasha kumona byo mubena kukomenako ne kutwajijila bashikimana kimye kyo mubena kukanamina kikonkwanyi kyenu kya myaka.
3. Tongolaipo bikonkwanyi bimo bya mu kakimye kacheche byakonsha kukwasha muntu kufikapo pa kubatizwa.
3 Bikonkwanyi bya mu Kakimye Kacheche: Umvwe mukyangye kubatizwa, langulukai pa bintu byo mwafwainwa kuba pa kuba’mba mufikizhe kyokyo kikonkwanyi. Mwakonsha kukebewa kumvwisha mafunjisho atanshi a mu Baibolo. Umvwe ibyo, kibikai kwikala kikonkwanyi kyenu kya kufunda bulongo buku wa Baibolo Ufunjisha, kutanga binembelo byonse byamweshiwa. (1 Timo. 4:15) Kabiji ibikilai kikonkwanyi kya kutanga Baibolo yense, kufuma ku Ntendekelo kufika ku Lumwekesho, byonka byo bebakebela kuba bamwingilo ba pa Betele ne baana basukulu bafunda sukulu wa Gileada. Panyuma ya bino, twajijilai na mutanchi wa kutanga Baibolo pa juba pa juba. (Sala. 1:2, 3) Akifwanyikizhai kino byo kyakonsha kwimukwasha kukoma ku mupashi! Tendekai ne kupwisha kimye kyonse kyo mubena kutanga Baibolo na lulombelo lubena kufuma panshi ya muchima, kabiji kimye kyonse ibikaingako kwingijisha bintu byo mufunda.—Yako. 1:25.
4. Bikonkwanyi ka bya mu kakimye kacheche byakonsha kwibikila mwina Kilishitu uji na kikonkwanyi kya myaka kya kwingijila pa Betele nangwa mwingilo wa bumishonale?
4 Umvwe kya kuba mwabatizwa kala, bikonkwanyi ka bikwabo byo mwakonsha kwibikila? Abya mubena kukeba kuwamishako busendwe bwenu bwa kusapwila nyi? Kya kumwenako, nanchi mwakonsha kwibikila kikonkwanyi kya kuyuka bulongo bya kwingijisha Mambo a Lesa mu mwingilo wa mu bujimi nyi? (2 Timo. 2:15) Mwakonsha kubaishako byepi mwingilo wenu? Ibikilai bikonkwanyi bya mu kakimye kacheche byaesakana na kimino kyenu ne na bwikalo bwenu kabiji byakonsha kwimukwasha kufikizha bikonkwanyi byenu bya myaka.
5. Kwibikila bikonkwanyi mu kakimye kacheche kwakwashishe byepi mulongo umo kufikizha kikonkwanyi kyanji kya kuya na kwingijila pa Betele?
5 Jishimikila ja Muntu Wafikizhe Kikonkwanyi: Kimye Tony wa myaka ya kusemwa 19 kyo apempwile ofweshi wa musampi wa Bakamonyi ba kwa Yehoba, waishile kwikala na kizaku kya kuya na kwingijila pa Betele. Nangwa byonkabyo, byubilo byanji kechi byawamine ne, kabiji kechi wipaine ne kwipana kwi Lesa ne. Tony wasajilepo kupimpula byubilo byanji kwesakana na bikeba Yehoba kabiji ne kwibikila kikonkwanyi kya kufika pa kubatizwa. Panyuma ya kuba wafikizha kino kikonkwanyi, wibikijile kikonkwanyi kikwabo kya kwingila bupainiya bwa kukwasha ne bwa kimye kyonse, kabiji wanembele moba a kutendekelamo pa kalenda wanji. Akifwanyikizhai byo asangalelepo kimye bamwichile kuya na kwingijila pa Betele panyuma ya kwingilako mwingilo wa bupainiya!
6. Kintu ka kyakonsha kwimukwasha kufikizha bikonkwanyi byenu bya ku mupashi?
6 Ne anweba mwakonsha kufikizha bikonkwanyi byenu bya ku mupashi byo mubena kusambila kukebesha bufumu. Fikizhai “mingilo yenu” kwi Yehoba mu lulombelo ne kwibikako kwiifikizha.—Mana. 16:3; 21:5.