BYA KUBA NA MITENGO YA BINTU IBENA KUKANJIJILAKOTU

Yukai’mba Kulutwe Bintu Bikawama Bingi

Nanchi bintu biji bingi na mutengo mu kyalo mo mwikala nyi? Nanchi bijikila bimuvujila pa kuba’mba mwikebele bintu byenu ne bya kisemi kyenu nyi? Inge ano o makatazho o mubena kupitamo, ko kuba’mba mwakonsha kwakamwa bikekala bwikalo bwenu kulutwe. Pano bino, nangwa kya kuba bintu bimukatazha mu bwikalo bwenu, kuyuka’mba kulutwe ano makatazho onse akapwa, kwitukwasha kuketekela bingi mwi Lesa.

ENE MAMBO O KWAWAMINA

Bantu bayuka’mba bintu bikawama kulutwe kechi bakamwa ne. Luketekelo lwibakwasha kwingila na ngovu ne kuyuka mwa kubila na makatazho o babena kupitamo. Onkao mambo, masawakya amo amwesha’mba bantu bayuka’mba bintu bikawama kulutwe . . .

bachinchika bingi makatazho
bayuka mwa kubila inge bintu byaaluka mu bwikalo bwabo
bafuukulapo bintu byawama bibakwasha kwikala na butuntulu bwa mubiji bwawama ne kwikala na lusekelo mu bwikalo bwabo

BYO MWAFWAINWA KUBA

Kintu kitanshi, monai Baibolo byo afwainwa kwimukwasha. Mu Baibolo muji mafunde afwainwa kwimukwasha kuyuka mwa kubila na mutengo wa bintu byo abena kuyilakotu palutwe. Bintu byo baambapo mu Baibolo byafwainwa kwimukwasha kuleka kulanguluka’mba pano kyapwa anweba kafwako bintu bikemuwaminapo mu bwikalo bwenu ne. Pakuba kuji byo mwafwainwa kuba luno nangwa kya kuba kulutwe bintu bikakatazhe byepi.

“Maana a kupima bintu akakulamanga, ne milangwe ikakuzhikijilanga.”—Byambo bya Maana 2:11.

Kya bubiji, monai Baibolo byo afwainwa kwimukwasha lelo jino. Inge mwamona maana aji mu Baibolo byo awama, po po mukakebesha kufunjilapo byavula pa Baibolo byo aamba pa bwikalo bwa kulutwe. Baibolo waamba’mba Lesa ukeba anweba “kwikala bwikalo bwawama bwa kulutwe.” (Yelemiya 29:11) Kabiji Baibolo waamba ne kuba’mba Bufumu bwa Lesa, bo bo akengijisha kufumyapo bintu byonse byatama ne kuletapo byawama.

BUFUMU BWA LESA BO BU KA KABIJI BUKOBA ÑANYI BINTU?

Bufumu bwa Lesa ke kafulumende ukalamanga ino ntanda yonsetu. (Danyela 2:44; Mateo 6:10) Pa kyokya kimye, kafwako muntu nangwatu umo ukayanda nangwa kukajilwa kintu ne. Mambo bantu bonse bakekalanga mu mutende ne kwikala na bintu byonse byo bakeba pa kuba’mba bekale na lusekelo. Umvwai milaye iji mu bino binembelo.

“Mukasangalalanga ne kwikala na bintu byawama.”—Salamo 128:2.

“[Bakekala mu buno Bufumu] kechi bakengilanga kyatutu ne.”—Isaya 65:23.

“Kajo kakavula bingi pano pa ntanda.”—Salamo 72:16.

Bantu bavula baketekela mu ino milaye mambo bashiinwa’mba Lesa kechi ‘ubepa’ ne. (Titusa 1:2) Tubena kwimutundaika kwitangila anweba bene ino milaye mu Baibolo. Bintu byaambapo Baibolo byafwainwa kwimukwasha kuyuka mwa kubila na makatazho a mu bwikalo ne kuketekela’mba Lesa ukawamisha bintu kulutwe na lwendo.