Lesa Walayile Paladisa

KINO kipikichala kibena kumwesha paladisa nabiji yewa Lesa ye amwesheshepo ngauzhi wanji, aye Isaya. Isaya waikeleko Yona saka afwa kala.

Paladisa ke “bujimi” nangwa’mba “paaka.” Nanchi kino kibena ku kuvululako kintu kimo kyo twamona kala mu uno buku nyi? Buno bujimi bubena kumwekana nobe byonka byajinga bujimi bwawama Yehoba Lesa mo abikile ba Adama ne Evwa, kechi ibyo nenyi? Nanchi ino ntanda yonse ikekala ke paladisa nyi?

Yehoba waambijile ngauzhi wanji Isaya kunemba pa mambo a paladisa ubena kwiya wa bantu ba Lesa. Waambile’mba: ‘Misuka ne mikooko ikekala pamo mu mutende. Baana ba bañombe ne ba mabokwe bakekalanga pamo kabiji baana babacheche bakebatangijilanga. Nangwatu mwana ukyamwa ukakayilanga pamo na muloolo kwa kubula kumusuma.’

Bavula bamba’mba: ‘Kino kechi kyakonsha kubiwa ne. Makatazho panopantanda atendekele kala kabiji kechi akapwa ne.’ Bino akikilangulukepotu: Muzhi wa mutundu ka Lesa ye apele Adama ne Evwa?

Lesa wabikile Adama ne Evwa mu paladisa. Batayile muzhi wabo wawama, na mambo a kubula kukokela Lesa kabiji batendekele kukota ne kufwa. Lesa walaya’mba aba bantu bamutemwa ukebapa byobya bintu byawama byaelele ba Adama ne Evwa.

Mu paladisa ipya ibena kwiya, kafwako kintu nangwa kimo kikakozhañananga nangwa konauna kikwabo ne. Mukekala mutende wa kine. Bantu bonse bakekala bulongo ne kusangalala. Kikekala byonkatu Lesa byo akebelenga’mba kikale ku ntendekelo. Bino, kulutwe tukafunda Lesa byo akalengela ino paladisa kwikalako.