Kitango 17

Wafunjishe Nikodema

BYO akijinga ku Kijiilo kya Lupitailo mu 30 C.E., Yesu waubile biyukilo nangwa amba bya kukumya byavula. Kino kyalengejile bantu bavula kumwitabila. Nikodema wa mu Saniedilini ko kuba’mba kije kikatampe kya Bayudea, watemenwe bingi kabiji wakebele kuyukilapo ne bintu byavula. Onkao mambo, wayile bufuku kwi Yesu, kampe wachiinenga amba jizhina janji jakalengululwa ku bakwabo bantangi Bayudea umvwe bamumona.

Waambile’mba: “Mufunjishi, twayuka namba anweba mwi mufunjishi wafuma kwi Lesa; kabiji kafwako muntu nangwa umo wakonsha kuba bino biyukilo byo mubena kubapo ne, kana Lesa uji nanji.” Yesu wamwambijile Nikodema amba pa kuba’mba muntu atwele mu Bufumu bwa Lesa wafwainwa “kusemwa jibiji.”

Nga muntu wakonsha kusemwa byepi jibiji? Nikodema washikishe’mba: “Nanchi wakonsha kutwela munda mwainanji ne kusemwa jibiji nyi?”

Ine, bino kechi byo bilumbulula kusemwa jibiji ne. Yesu walumbulwile amba: “Pa kuba amba muntu asemwe jibiji wafwainwa kubatizhiwa mu mema ne kutambula mupashi wazhila kufuma kwi Lesa. Mambo inge ne, kechi wakonsha kutwela mu bufumu bwa Lesa ne.” Yesu byo abatizhiwe ne mupashi wazhila byo amwikijile wasemenwe ku ‘mema ne ku mupashi.’ Byo byalondankene na byambo byafumine mwiulu bya kuba’mba, ‘Uno ye Mwanami mo namwena lusekelo,’ Lesa wabijikile’mba wasema mwana wa ku mupashi uji na luketekelo lwa kutwela mu Bufumu bwa mwiulu. Pa Pentekosita mu 33 C.E., bantu bakwabo babatizhiwe batambwile mupashi wazhila kabiji basemenwe jibiji kwikala baana ba Lesa ba ku mupashi.

Mwana Lesa byo ajinga pano pa ntanda, mwingilo wanji wanemene bingi. Yesu wabujile Nikodema amba: “Byonkatu Mosesa byo aimikile muloolo mu kiselebwa, ne Mwana muntu naye bakamwimika pa kichi byonkabyo, kuba amba yense wamwitabila akekale na bumi bwa myaka.” Byonkatu aba bena Isalela bo basumine ku miloolo byo batajile ku muloolo wa lubemba amba bapuluke, ne bantu bonse bafwainwa kwitabila mu Mwana Lesa kuba’mba bakapuluke.

Byo aambilenga pe Yehoba byo atemwa bantu, Yesu wabujile Nikodema amba: “Mambo Lesa byo ebatemwishe ba pano pa ntanda wapaine Mwananji yenkawa umotu, kuba amba bonse bamwitabila kechi bakonaike ne, poso bakekale na bumi bwa myaka.” Onkao mambo, panyuma ya kupitapo bañondo batanu na umo kufuma po atatwijile mwingilo wanji, Yesu wiyukanyikishe mu Yelusalema amba ye jishinda Yehoba Lesa jo asala kupulushishamo bantu.

Yesu watwajijile kulumbulwila Nikodema amba: “Lesa watumine Mwananji pano pa ntanda, kechi na kuzhachisha ba pano pa ntanda ne,” kino kechi kyalumbulula’mba ukazhachisha bantu ne kwibonauna bonse ne. Bino byonka byaambile Yesu, aye bamutumine “kwibapulusha kupichila mwi aye.”

Na mambo a kuchina bantu, Nikodema waishile bufuku kwi Yesu. Onkao mambo, kyayijilemo bingi Yesu kupezhako mwisambo wanji na Nikodema byo aambile’mba: “Kabiji pa kyo kino po paimena luzhachisho kuba amba kyeya [Yesu kyo amwesheshe mu bwikalo bwanji ne mu byo afunjishenga] kyaiya pano pa ntanda; bino bantu batemwako mfishi kukila kyeya, mambo mingilo yabo yatama. Pakuba yense uba byatama washikwa kyeya kabiji kechi wiya ku kyeya ne, kuchina amba mingilo yanji yakasoloka. Bino yense uba mingilo yaoloka wiya ku kyeya, kuba amba mingilo yanji isoloke monka mwayila kyaswa muchima wa Lesa.” Yoano 2:23–3:21; Mateo 3:16, 17; Byubilo 2:1-4; Kubala 21:9.

▪ Ñanyi kintu kyalengejile Nikodema kuya kwi Yesu, kabiji mambo ka o ayijile bufuku?

▪ Nanchi “kusemwa jibiji” kulumbulula ka?

▪ Yesu walumbulwile’mba twafwainwa kuba byepi pa kuba’mba tukapuluke?

▪ Kyatala mu ka kuba’mba Yesu kechi waishile na kuzhachisha ba pano pa ntanda ne?