Mepuzho Kufuma Kubatanga

Nga Yesu watazhizhe mwepi byambo byo aambijile Nikodema bya kuba’mba: “Ka paji muntu wakanjijilemo mwiulu ne, poso yenka waikijile mwiulu, ye Mwana muntu”?—Yoano 3:13.

Pa kyo kya kimye, Yesu wakijinga panopantanda kechi wabwelele mwiulu ne. Pano bino bintu byo twayuka pe Yesu ne mwatala bino byambo byakonsha kwitukwasha kumvwisha mo atazhizhe.

Yesu “waikijile mwiulu” mambo pa kutendekelapotu waikalanga mwiulu ne Shanji, pano bino bumi bwanji bwatuntulwijilwe mu jivumo ja kwa Maliya, ne kusemwa wasemenwe mu bumuntu. (Luka 1:30-35; Ngalatiya 4:4; Bahebelu 2:9, 14, 17) Panyuma ya lufu lwanji, Yesu wasangwilwe ne kwikala kilengwa kya mupashi kabiji wabwelele na kwikala ne Yehoba. Onkao mambo, Yesu saka bakyangye kumwipaya ne, walombele’mba: “Tata, muntumbijike ko muji anwe bene na lolwa lukumo lo najinga nalo ko muji, panopantanda kasa pa kyangye kulengwa.”—Yoano 17:5; Loma 6:4, 9; Bahebelu 9:24; 1 Petelo 3:18.

Yesu saka akyangye kubwela mwiulu ne po po esambilenga ne Nikodema wajinga Mufaliseo kabiji mufunjishi wa mu Isalela. Pa kyo kya kimye, kafwako muntu wakifwilepo ne kukanjila mwiulu ne. Yesu waambile amba Yoano Mubatishi wajinga ngauzhi wa Lesa, nangwa byonkabyo “awa wa mucheche mu bufumu bwa Lesa ye wamukila.” (Mateo 11:11) Kabiji mutumwa Petelo walondolwele amba nangwatu Mfumu wakishinka aye Davida wafwile kabiji bamuzhikile, kechi wakanjijile mwiulu ne. (Byubilo 2:29, 34) Kuji kintu kyalengejile ba Davida, Yoano Mubatishi, ne bantutu bakwabo ba lwitabilo bafwile Yesu saka akyangye kufwa ne, kyo babujijile kuya mwiulu. Bafwile Yesu saka akyangye kushinkula jishinda ja kuba’mba bantu bamo bakonsha kusangulwa ne kuya na kwikala mwiulu. Mutumwa Paulo wanembele amba Yesu byo aji mutanshi, washinkwile jishinda “jipya jo jumi” ja kuya mwiulu.—Bahebelu 6:19, 20; 9:24; 10:19, 20.

Yesu byo akibujile kufwa ne kusangulwa, watazhizhe mwepi byambo byo aambile kwi Nikodema bya kuba’mba: “Ka paji muntu wakanjijilemo mwiulu ne, poso yenka waikijile mwiulu, ye Mwana muntu.”? (Yoano 3:13) Akimonai mwatala byambo Yesu byo esambilenga ne Nikodema.

Awa ntangi wa Bayudea byo aishile kwi Yesu bufuku, Yesu wamwambijile amba: “Kine, kine, nemwambila namba, inge muntu ne kusemwa jibiji ne, kechi akonshe kumona bufumu bwa Lesa ne.” (Yoano 3:3) Nikodema wakumbwile amba, ‘Nanchi kino kyakonsha kubiwa nyi? Nanchi muntu wakonsha kusemwa jibiji nyi?’ Nikodema kechi waumvwishishe luno lufunjisho lwa kwikala mu Bufumu bwa Lesa ne. Abya wakonsheshe kumvwisha mwatajile bino byambo nyi? Ine, kafwako muntutu wakonsheshe kumubula kino ne, mambo kafwako waikelepo mwiulu wafwainwe kulondolola byo kyakonsha kwikala pa kutwela mu Bufumu ne. Yesu ye yenkatu wakonsheshe kuba bino. Wakonsheshe kumufunjisha Nikodema ne bakwabotu mambo aye ye waikijile kufuma mwiulu.

Bwipuzho bwaipuzhiwa na mambo a mwatala kino kinembelo bumweshatu patoka buneme bwa kufunda Mambo a Lesa. Kechi kyayilamotu nangwa kuyilamo kuzhinauka binembelo mambo a kuba’mba byakatazha kumvwa ne. Bintu bimo byaambiwa pa kinembelo kimo twakonshatu kwibyumvwisha kana twatanga binembelo bikwabo byaamba pa kyo kyo kintu. Kabiji mutwe waambiwengapo wakonsha kwitukwasha kumvwisha kyo kyo kinembelo.