Kitango 60

Bikekala Bufumu bwa Lukumo bwa Kilishitu

YESU wayile mu mapunzha a Kesalea Filipai kabiji wafunjishenga jibumba pajinga ne batumwa banji. Waambile bino byambo bya kuba’mba: “Kine nemwambila namba, mwi anweba baimana pano, bamo kechi bakafwa ne, poso bakamone Mwana muntu saka eya mu Bufumu bwanji.”

Baana banji ba bwanga kyamweka balangulukilenga amba ‘Yesu watazha mu ka?’ Byo papichile mulungu umo, Yesu wasendele Petelo, Yakoba ne Yoano ne kuya nabo ku mutumba walepa. Kampe bwaijile mambo baana banji ba bwanga bakunukilenga. Yesu byo alombelenga, waalukile kwi abo. Kilungi kyanji kyasamine nobe juba kabiji bivwalo byanji byatokeletu too nobe kyeya.

Kabiji bantu babiji abo ba “Mosesa ne Elaija” bamwekele ne kutatula kwisamba ne Yesu ‘pa mambo a kufumapo kwanji, ko afwainwe kufikizha ku Yelusalema.’ Kuno kufumapo kwalumbulwilenga lufu ne lusanguko lwa Yesu. Onkao mambo, uno mwisambo wamwesheshe kuba’mba kechi wakonsheshe kuchinuzhuka alwa lufu lwatama byonka byakebelenga Petelo ne.

Baana banji ba bwanga byo babukile, bakuminye bingi pa kyo bamwene ne kumvwa. Nangwa kya kuba kino kyajinga kimwesho, Petelo wikimwene nobe kyakine, kya kuba waambile’mba: “Nkambo, kituwamina kwikala ponka pano. Umvwe mukeba, nsakupopa matente asatu, imo yenu, ikwabo ya kwa Mosesa ne ikwabo ya kwa Elaija.”

Petelo byo akyambilenga, jikumbi jabembela jibavwetele kabiji jiwi jafumine mu jikumbi amba: “Uno ye Mwanami ye natemwa, mo namwena lusekelo, mumvwinai.” Baana ba bwanga byo baumvwine jiwi baponene kinkuvumene. Bino Yesu wibambijile’mba: “Imanai, kuba moyo ne.” Byo baimene bamwenekotu Yesu bunke.

Juba jalondejilepo byo bakunkulukilenga pa mutumba, Yesu wibakambizhe’mba: “Kange mubulepotu muntu nangwa umo kino kimwesho ne, poso Mwana muntu akasanguke ku bafu.” Baana ba bwanga byo bamwene Elaija mu kino kimwesho, kibalengejile kwikala na mepuzho. Bashikishe’mba: “Pano mambo ka banembeshi o bambila amba, Elaija wafwainwa kwiya patanshi?”

Yesu wibakumbwile’mba: “Elaija waishile kala kabiji bantu kechi bamuyukile ne.” Nangwa byonkabyo, Yesu waambilenga pe Yoano Mubatizhi wafikizhe mwingilo waingijilepo Elaija. Yoano wanengezhejile jishinda Kilishitu byonkatu Elaija byo anengezhejile jishinda Elisha.

Kino kimwesho kyakoseshe bingi Yesu ne baana banji ba bwanga. Kabiji kyamwesheshenga bikekala Bufumu bwa lukumo bwa Kilishitu. Kiji nobe baana banji ba bwanga bamwene “Mwana muntu saka eya mu Bufumu bwanji,” byonkatu Yesu byo ebabujile mulungu umo wapichilepo. Panyuma ya lufu lwa kwa Yesu, Petelo wanembele pa ‘byo bemwenejile na meso lukumo lukatampe lwa Kilishitu kimye kyo bajinga nanji ku mutumba wazhila.’

Bafaliseo bakebele’mba Yesu ebamweshepo kiyukilo kya kuyukanyikisha amba ye yewa ye baambilepo mu Binembelo kuba’mba ye ukekala Mfumu, Lesa ye asalulula. Wakaine kwibamwesha kiyukilo. Pano bino, baana ba bwanga ba kwa Yesu bebaswishishe kumona kimwesho kya kwaluka kwa Yesu kyafikizhe bungauzhi bwa Bufumu. Palutwe kacheche, Petelo wanembele amba: “Byonkabyo, luketekelo lwetu mu byambo bya bungauzhi lwakoselako.” Mateo 16:13, 16:28–17:13; Mako 9:1-13; Luka 9:27-37; 2 Petelo 1:16-19.

▪ Kilishitu saka akyangye kufwa, bamo bamumwene byepi saka eya mu Bufumu bwanji?

▪ Mu kimwesho ba Mosesa ne Elaija besambilenga pa ñanyi kintu ne Yesu?

▪ Mambo ka kino kimwesho o kyakoseshe baana ba bwanga?