Mutanchi wa Kukomesha Busendwe bwa Buñambi ne Bufunjishi

NANGWA mwi banyike, nangwa bakulumpe, mwi wamulume nangwa wamukazhi, uno sukulu wakonsha kwimukwasha kwikala bakasuluka pa kwamba ne kwikala mufunjishi wayuka kufunjisha bulongo Mambo a Lesa.

Kalama utangijila sukulu ye upana majashi ku banembesha mu Sukulu wa Mwingilo wa Lesa. Pa mapeja asatu alondelapo paji pepala wa kufunjilwapo. Bibelengelo biji kunsa ya mafunde apusana pusana bibena kumwesha mafunjisho aji pa mapeja alondelapo. Mu ano mafunjisho mwalumbululwa byavwangiwamo mu kuyuka ino mbaji ya kwamba ne kufunjisha kabiji ne ene mambo ano mafunjisho onse o anemena. Kabiji mukatanamo ne mikambizho ya kwimukwasha kuyuka mo mwakonsha kubila pa kyo mwafwainwa kwingijilapo.

Misombelo iji pa pepala wa kufunjilwapo ibena kumwesha mafunde engila ku majashi avwangamo (1) kutanga ku luonde, (2) kimwesho kya bantu babiji nangwa kukilapo, (3) jashi ku kipwilo. Kalama utangijila sukulu ukemupa lufunjisho lo mukengijilapo. Kikwasha bingi kwingijilatu pa lufunjisho lumo pa kimye kimo. Mukamwenamo bingi umvwe kemube mingilo ya kuba yanembwa ku mpelo ya lufunjisho lo bemupa kwingijilapo. Umvwe mwamwesha’mba mwaingijilapo bulongo pa mafunde aji mu lufunjisho lo bemupele, kalama wenu wa sukulu ukemupa lubaji lukwabo lwa kwingijilapo.

Umvwe jashi jenu mukejamba mu bukimwesho, mwafwainwa kwikala na jishinda mwa kwambila. Mutanchi wa mashinda mwa kwambila uji pa peja 82, pano bino kechi o onkatu o mwakonsha kwingijisha ne. Mufunjishi wenu wakonsha kwimubula’mba mweseke jishinda jingi pa kuba’mba mupijilwe kwamba bulongo, nangwa wakonsha kwimuleka anwe bene kwisajila jo mukeba.

Kutanga uno buku ne kuba mingilo ijimo nangwatu kimye kyo mubena kubula kunengezha majashi a mu sukulu kwakonsha kwimukwasha bingi kukomenako. Kampe mwakonsha kufunda lufunjisho lukwabo pa mulungu pa mulungu nangwa kukilapo.

Nangwa kya kuba mu uno sukulu nangwa mu mwingilo wa mu bujimi mwabandamo nangwa ne, mwakonsha kutwajijila kukomenako. Mwane mumwenengamo mu lufunjisho luji mu Sukulu wa Mwingilo wa Lesa.