Sukulu Itufunjisha Mingilo Yanema Mubwikalo
1 Bantu baya kusukulu nakukafunda bintu bikebakwasha kwingila mingilo yobakeba mubwikalo. Bino nga mwingiloka wakonsha kunema kukila mwingilo wakutota mwine Mpanyi upana bumi newakukwasha bakwenu kufunda nkebelo yanji nemashinda anji? Kafwakone. Sukulu ya Mwingilo wa Teokalasi kyoyaikelako kekwitufunjisha mashinda motwakonsha kufunjishisha bakwetu bintu byotwaitabila. Onkao mambo, byotutanwa kuino sukulu mulungu nemulungu, tufunda busendwe bwitukwasha kwingila mingilo yakilamo kunema mubwikalo.
2 “Mutanchi wa Sukulu ya Mwingilo wa Teokalasi wamu 2003” uji mu Mwingilo wetu wa Bufumu wañondo wapwa. Muuno mutanchi momuji byambo byalumbulula ino sukulu byoikobiwanga. Kampe kyakonsha kwimuwamina kubika uno mutanchi mubuku wenu wa Icitabo ca kusambililamo Isukulu lya Butumikishi bwa Bufumu, yomwafwainwa kukasendanga pakwiya ku Sukulu ya Mwingilo wa Teokalasi mulungu nemulungu. Akimonai majashi aji mu Sukulu ya Mwingilo wa Teokalasi mu 2003.
3 Ñambilo: Kutatula mu January, kupwila konse kwasukulu kukatendekanga najashi jamaminiti atanu jibena kwamba pañambilo nangwa pabyafwainwa kwikala ntangilo, mfunjilo nemfunjishisho. Utangijila sukulu yeukambanga ano majashi atanshi, nangwa wakonsha kupako mukulumpe mukwabo wayuka bulongo kwamba jino jashi. Ñambi wakonsha kwambapo mwatala ñambilo nepabuneme bwayo. Apa bino kwambapo nebyambo bikwabo byaamba pabyakumwenako byamu Binembelo nekulumbulula byakwingijisha ñambilo, saanemenena mukulumbulula kuba kino byokwakonsha kulengela kuyilako palutwe mumwingilo wetu wamubujimi.
4 Jashi Na. 1: Balongo bapewa kwamba jino jashi jakufunda bavululwako nejikwabo “kukonkomwena pabuneme buji mubyambo bibena kwambiwa.” Kino kibena kulumbulula kubula kipwilo byakwingijisha bino byambo. Umvwe mwapewa jino jashi, tangai mikambizho yabyomwafwainwa kwijinengezha mubuku wa Isukulu lya Butumikishi pamapeja 48-9, nebyambo biji pamapeja amweshiwa kumpelo yabuku pamutwe wakuba’mba icisontelelo pakamutwe “Ukulondolola ifyo ifyebo fingabomba.”
5 Mutanchi Wakutanga Baibolo: Umvwe kunyumakwe kechi mubalondelenga kutanga Baibolo mulungu nemulungune, nanchi uno mwaka kuba mwafuukula’mba mulondelenga uno mutanchi nenyi? Aba basakulondelenga uno mutanchi bakapwisha kutanga Binembelo byabwina Kilishitu bya Kingiliki pakupwa kwamwaka. Mfweto iji mukutatwilapo kutanga Baibolo na Binembelo byabwina Kilishitu bya Kingiliki yalondololwa pa peja 10, palagalafu 4 mubuku wa Isukulu lya Butumikishi.
6 Bishinka bikatampe Kufuma Mukutanga Baibolo: Jino jashi jaikala pano kejamaminiti jikumi kuba’mba luonde lukakonshenga kwambapo pabyapitala byobatanga muyewo mulungu. Aba bapewa kwamba jino jashi bafwainwa kwijamba mukimye kyapewa. Jikambiwanga mulungu nemulungu, kumvwangakotu nemumulungu wakwisamba kwakupituluka mubyafunjilwe. Byomubena kutanga byapitala byakutanga muyewo mulungu, monaipo bishinka byakonsha kwimukwasha palufunjisho lwakisemi, mumwingilo wenu nangwa mubwikalo bwenu. Byubiloka Yehoba byoamwesheshe kubantu banji nekumikoka ikwabo? Kika kyomwafunjile kyakoseshe lwitabilo lwenu nekubaisha lusanchilo lwenu lwakusanchila Yehoba? Ikalai bakasuluka kwambapo bishinka biji mubyapitala byanegezhiwe kutangiwa, nemumavesitu akatangiwanga mu Jashi Na. 2, mambo mulongo ukatanganga jino jashi kechi ukambangapo pamavesine.
7 Jashi Na. 2: Jashi jitashi jikambanga mwana wasukulu mulungu nemulungu jikekalanga jakutangatu. Kutanga konse kwajino jashi kukafumanga mukutanga Baibolo kwamulungu nemulungu kufumyakotu kutanga kwamulungu wakumpelo pañondo pañondo. Kutanga kukapelangako kumpelo yañondo kukafumanga mu Kyamba kya Usopa. Mwana wasukulu ubena kwamba jino jashi wafwainwa kutangatu byambo byobamupa kwakubula kwambako byambo bitanshi nangwa byambo byakupezhakone. Mujino jishinda ukatesha muchima pantangilo yanji.—1 Timo. 4:13.
8 Majashi Na. 3 ne Na. 4: Majashi amo auno mutundu aji napakufumya byambo pavula mubuku wa Ukupelulula kukila akwabo; amo ajitu namutwetu kwapwa. Aba bapewa jashi jiji nabyambotu bicheche mojafuma nangwa jijitu namutwetu kwapwa baji najishuko jakwamba jino jashi jabo kwingijisha byambo byobapesa-pesa mumabuku etu abwina Kilishitu. Kino kyakonsha kupelelako banyenga kwesakanya byambo byabo neyebaji nanji mujashi.
9 Mashinda Akunengezhezhamo: Byonka byokyamweshiwa papeja 45 mubuku wa Isukulu lya Butumikishi, utangijila sukulu wakonsha kubulañana mwakunengezhezha. Inge nekubulwane, banyenga bene bakonsha kusala jishinda mwakunengezhezha pamutanchi uji pa peja 82. Umvwe nyenga wamba jashi jimo panyuma yakupitapo bañondo babiji, ano mashinda 30 amwakunengezhezha akapana mwakwambila mwapusana-pusana pamyaka itanu. Banyenga basala jishinda mwakunengezhezha ja Na. 30 jakuba’mba “Imitantikile imbi iingabomba ku ncende mwabela,” bafwainwa kwijinemba kunshi nangwa kunyuma yakapepala kobebapelapo jashi (S-89). Utangijila sukulu ukanemba juba joaambilamo mwana wasukulu jashi janji papeja 82 mubuku wanji kubwipi najishinda jakunengezhezhamo joaji kwingijisha. Wakonsha kuba kino pakimye kimotu kyoabena kunemba kufundañana papepala wakufundañenapo.
10 Pepala Wakufundañenapo: Pepala wenu wakwimufunjilapo uji monka mubuku wenu. Uji pamapeja 79-81. Onkao mambo mwafwainwa kutwala buku wenu kuutangijila sukulu panyuma yajashi jonse jomwaamba. Utangijila sukulu wafwainwa kunemba bishinka byakufunda mwana wasukulu byoabena kwingijilapo.
11 Kwisamba Kwakupituluka Mubyafunjilwe: Kupituluka mu Sukulu ya Mwingilo wa Teokalasi kukekalanga kwakwisamba. Kukobiwanga jimo umvwe papita bañondo babiji kabiji kukekala kwamaminiti 30. Mepuzho akwisamba pakupitulukamo akatwajijila kunembwa monka mu Mwingilo wetu wa Bufumu. Umvwe mulungu mwatanchikwa kwisamba kwakupituluka mubyafunjilwe yewaikala mulungu mukobiwa kupwila kwakijiiji nangwa kufwakasha kwamukulumpe wakijiiji, majashi amulungu walondelapo oafwainwa kwambiwa muyewo mulungu apa bino kwisamba kwakupituluka mubyafunjilwe kwaubiwa mumulungu walondelapo.
12 Bibamba Bikwabo Mwakufunjila: Umvwe mukipwilo muji baana basukulu bakila pa 50, bakulumpe mukipwilo bakonsha kumonapo bibamba bikwabo mwakufunjila. “Mubino bibamba mwakonsha kwambilwa majashi onse apewa kubaana basukulu nangwa kukambilamotu majashi abiji apelako, Na. 3 ne Na. 4.” (Isukulu lya Butumikishi, pega. 285) Mulanguluko wakwambilamotu majashi abiji apelako kewakukwasha bipwilo biji nabanyenga bavula mwakepa balongo bakwamba majashi akutanga. Bakulumpe mukipwilo bafwainwa kusala balongo bayuka bulongo bakutangijila mubino bibamba.
13 Wakufundañanako Wakibiji: Byonka byokyaambiwa mu Mutanchi wa Sukulu ya Mwingilo wa Teokalasi, wakufundañanako wakibiji wafwainwa kutongolwa najibumba jabakulumpe mukipwilo kufundako bakulumpe nebankwasho bakambanga bishinka bikatampe kufuma mukutanga Baibolo nejashi jakufunda. Mulongo wapewa kuba kino wafwainwa kwikala wayuka bulongo, muntu yebakonsha kumvwina bakulumpe bakwabo mukipwilo pakwibafundako. Kufundañana kwanji kwafwainwa kwikala kwakukwashañana, saka atakaika pañambilo nemfunjishisho yawama kabiji nekutongolapo kishinka kimo nangwa bibiji byafwainwa kwingijilwapo. Kechi kyafwainwa kufundañana pajashi jonse jaamba mulongo wamba majashi javulane. Pano bino mulongo wapewa uno mwingilo wakufundañana wakibiji wafwainwa kuyuka’mba nangwatu balongo babatatule kwamba majashi amvula-bantu bakonsha kukwashiwa kuba’mba bayileko palutwe.—1 Timo. 4:15.
14 Bintu Bakafundañananga Byobafwainwa Kuteshako Muchima: Kika kyakonsha kukwasha wakufundañanako kumvwisha jashi byojiji? Kabokoshi kabusatu mubyapitala byavula 53 mubuku wa Isukulu lya Butumikishi muji ngipipishilo yaamba pabintu bikebewa kumvwisha. Utangijila sukulu naye wafwainwa kuta muchima kubyakuvululako nangwa mikambizho ikwabo iji mubuku yakonsha kumukwasha kuyuka bukiji jashi byojajikwambiwa bulongo nebyojakwasha luonde. Kyakumwenako, monai ndonda yamepuzho aji peulu yapeja 55 kabiji nebyambo biji mupalagalafu yapelako papeja 163.
15 Kunemba Mubishilwa Mwashala: Kununga pamapunzha ajimo mwabula kunembwa bintu, buku wa Isukulu lya Butumikishi uji namapunzha akwabo avula mwabula kunembwa bintu omwakonsha kunembamo byambo byomukeba kimye kyomubena kufunda lufunjisho lwenu lwapabunke nekimye kyomuji ku Sukulu ya Mwingilo wa Teokalasi. (Monai mapeja 77, 92, 165, 243, 246, ne 250.) Monai kuba’mba mulungu nemulungu mwasenda buku wenu. Londelaingamo kimye kibena kwambiwa jashi jitanshi. Shai buku wenu kyashi kimye kyonse kyasukulu. Nembai byambo byakukwasha bibena kwamba utangijila sukulu. Tai muchima kumashinda mwakufunjishisha, mepuzho, byakumwenako, ngesakenyo yabyambo, bifwanyikizho nempusenyo yabintu bibena kwamba bañambi. Uvmwe kemunembe byambo byakonsha kwimukwasha, mukakonsha kuvuluka nekwingijisha bishinka byawama byomwafunda musukulu.
16 Yesu Kilishitu wayukile’mba mwingilo wakusapwila mambo awama a Bufumu bwa Lesa kejishuko jikatampe jakonsha kupewa kuuji yense. Yewajinga mwingilo wanji mukatampe. (Mako 1:38) Waambile’mba ‘Nafwainwa nsapwile mambo awama a bufumu bwa Lesa, mambo kyo kyo natuminwe.’ (Luka 4:43) Byotuji bantu batambwila luno lwito lwakumulondela, neatweba twapayankana nakusapwila mambo awama, kabiji kimye kyonse twibikako kuyilako palutwetu mu “kitapisho kya kutota.” (Hebe. 13:15) Pakuba’mba tube kino, twayai tusakishe kwikalangamo nalubaji mu Sukulu ya Mwingilo wa Teokalasi, sukulu itufunjisha mingilo yanema mubwikalo.