Kitango 8

Kobaji Betukila

W AFWAINWA wayuka’mba kobaji betukila, kabiji baji na bulume kukila amiwa ne obewa. Ñanyi witukila?— Yehoba Lesa. Ibyepi Mufunjishi Wayukisha, nanchi witukila nyi?— Ee, naye witukila.

Yesu waikalanga na Lesa mwiulu. Wajinga Mwana wa ku mupashi, nangwa’mba malaika. Nanchi Lesa walengele bamalaika bakwabo, nangwa’mba baana ba ku mupashi nyi?— Ee, walengele bamalaika bavula bingi. Bano bamalaika nabo betukila kabiji baji bingi na bulume.— Salamo 104:4; Danyela 7:10.

Wavuluka jizhina ja malaika waambilenga ne Maliya nyi?— Wajinga Ngabaliela. Waambijile Maliya amba mwananji ukekala Mwana Lesa. Lesa wabikile bumi bwa Mwananji wa ku mupashi munda mwa kwa Maliya kuba’mba Yesu asemwe mu bumwana panopantanda.—Luka 1:26, 27.

Nanchi kino kya kukumya kyaubiwe nyi? Nanchi Yesu waikalanga na Lesa mwiulu nyi?— Yesu waambile’mba mo mo aikalanga. Nga Yesu wayukile byepi bino bintu? Byo akijinga mwanyike, Maliya kyamweka wamubujile bintu byaambile Ngabaliela. Yosefwa naye kyamweka wamubujile Yesu amba Lesa ye Shanji.

Kimye Yesu kyo abatizwe, Lesa waambile mwiulu amba: ‘Uno ye Mwanami.’ (Mateo 3:17) Kabiji saka akyangye kufwa ne, Yesu walombele’mba: “Tata, muntumbijike ko muji anwe bene na lolwa lukumo lo najinga nalo ko muji, panopantanda kasa pa kyangye kulengwa.” (Yoano 17:5) Ee, Yesu wakebelenga kubwela mwiulu kuba’mba akekalenga na Lesa. Wakonsheshe kwikala byepi jibiji mwiulu?— Wakonsheshe kuba bino kupichilatu mu kumwalula jibiji kwi Yehoba Lesa kuba’mba ekale kilengwa kya mupashi nangwa’mba malaika.

Akishi nkwipuzhepo buno bwipuzho. Nanchi bamalaika bonse bawama nyi?— Kwajinga kimye kimo bamalaika bonsetu kyo bajinga bawama. Kyajinga bino mambo Yehoba ye wibalengele, kabiji bintu byonse byo alenga byawama. Pano bino malaika umo waikele watama. Kyajinga byepi?

Pa kuba’mba tutane mukumbu, twafwainwa kukibwela jibiji kunyuma kimye Lesa kyo alengele mwanamulume ne mwanamukazhi mutanshi, ba Adama ne Evwa. Bantu bamo bamba’mba jino jishimikila kechi ja kine ne. Bino Mufunjishi Wayukisha wayukile’mba jajinga ja kine.

Lesa byo alengele ba Adama ne Evwa, wibabikile mu bujimi bwawama bwaitwanga’mba Edena. Yajinga paladisa. Bakonsheshe kwikala na baana bavula, kisemi kyabaya, kabiji ne kwikala mu Paladisa myaka ne myaka. Bino kwajinga lufunjisho lwanema bingi lo bakebewenga kufunda. Ke lolwa lo twaambapo kala. Leka tumone kana ubena kukivuluka.

Yehoba waambijile ba Adama ne Evwa amba bafwainwa kuja ku bichi byonse byajinga mu bujimi. Bino kwajingatu kichi kimo kyo bafwanyijile kubula kujako. Lesa wibabujile byakonsheshe kwibamwekela umvwe baja ku kino kichi. Waambile’mba: ‘Mukafwa kine.’ (Ntendekelo 2:17) Ñanyi lufunjisho ba Adama ne Evwa lo bakebewenga kufunda?—

Lukokelo. Ee, umvwe ke tumukokele Yehoba Lesa po po twafwainwa kwikala na bumi! Ba Adama ne Evwa kechi bafwainwe kwambangatu pa kanwa amba bamukokela ne. Bafwainwe kumwesha’mba bamukokela kupichila mu bintu byo baubilenga. Umvwe bakokejile Lesa, inge bamwesheshenga’mba bamutemwa kabiji bakeba’mba ekale Kalama wabo. Kuba bino po po bakonsheshe kwikala myaka ne myaka mu Paladisa. Pano byo bajile ku kyokya kichi, kyamwesheshe’mba ka?—

Kyamwesheshe’mba kechi bamusanchijile Lesa pa bintu byo ebobijile ne. Umvwe wajingako, nanchi inge wamukokejile Yehoba nyi?— Pa kutendeka, ba Adama ne Evwa bakokejile. Pano bino umo wibakijile bulume wabepele Evwa. Wamulengejile kupondokela Yehoba. Ñanyi yenkao?—

Baibolo waamba’mba, muloolo waambile ne Evwa. Pano bino wayukishatu kuba’mba muloolo kechi wakonsha kwamba ne. Pano ki ka kyamulengejile kwamba?— Malaika ye walengejile kuba’mba muloolo amwekanenga nobe ubena kwamba. Pano bino malaika ye waambilenga. Malaika watendekele kulanguluka bintu byatama. Wakebelenga ba Adama ne Evwa kumupopwela. Wakebelenga amba bobenga bintu byo aambilenga. Wakebelenga kwikala pa kifulo kya Lesa.

Uno malaika watama walengejile Evwa kutendeka kulanguluka byatama. Wamwambijile uno mwanamukazhi kupichila mu muloolo amba: ‘Lesa kechi waambile bya kine ne. Kechi mukafwa ne umvwe mwaja bipangwa bya ku kichi. Mukekala na maana nobe Lesa.’ Umvwe waji obewa, abya inge waumvwijile bino byambo nyi?—

Evwa watendekele kukeba bintu byabujile kumupa Lesa. Wajile bipangwa bya ku kichi kyo bebakanyishe. Kabiji wapelepo ne Adama. Adama kechi waumvwijile byaambile muloolo ne. Pano bino wamutemenwe bingi Evwa kukila Lesa. Kino kyalengejile naye kujako.—Ntendekelo 3:1-6; 1 Timoti 2:14.

Ki ka kyafuminemo?— Ba Adama ne Evwa baikele bambulwakoloka, bakotele, ne kufwa bafwile. Mambo a kuba bajinga bambulwakoloka, baana babo bonse nabo baikele bambulwakoloka, kabiji bakotele ne kufwa. Lesa kechi wabepele ne! Ne atweba pa kuba’mba twikale na bumi kanatu ke tumukokele. (Loma 5:12) Baibolo witubula’mba, malaika wabepele Evwa utelwa’mba Satana Diabola, kabiji ne bamalaika bakwabo baikele batama batelwa’mba bandemona.—Yakoba 2:19; Lumwekesho 12:9.

Pano wayuka kyalengejile malaika wawama ye balengele kwi Lesa kwikala watama nyi?— Mambo watendekele kulanguluka byatama. Wakebelenga bukulumpe. Wayukile’mba Lesa waambijile ba Adama ne Evwa kusema baana, kabiji wakebelenga amba bonse bamupopwelenga. Diabola ukebatu bantu bonse kusatukila Yehoba. Wituvulañanya na milanguluko yanji yatama.—Yakoba 1:13-15.

Diabola wamba’mba kafwako muntu nangwa umo watemwa Yehoba ne. Wamba’mba obewa ne amiwa kechi twatemwa Lesa ne, kabiji kechi tukeba kuba byamba Lesa ne. Kabiji wamba’mba tukokelatu Yehoba kana bintu ke byende bulongo. Nanchi Diabola wamba kya kine nyi? Abya byo byo tuji nyi?

Mufunjishi Wayukisha waambile’mba Diabola wa bubela! Yesu wamwesheshetu patoka amba watemwa Yehoba kupichila mu kumukokela. Kabiji kechi wakokelangatu Lesa umvwe bintu bibena kwenda bulongo ne. Wakokelangatu kimye kyonse, nangwatu babena kumukatazha. Wajinga wa kishinka kwi Yehoba kufikatu ne ku lufu lwanji. O ene mambo Lesa o amusangwijile kuba’mba ekalenga myaka ne myaka.

Onkao mambo, mulwanyi wetu ñanyi?— Ee, Satana Diabola ye mulwanyi wetu. Wakonsha kumumona nyi?— Ine kuba wamumona ne! Bino twayuka’mba koaji kabiji witukila bulume. Pano bino, ñanyi wakila Diabola?— Yehoba Lesa. Onkao mambo twayuka kuba’mba Lesa wakonsha kwituzhikijila.

[Kipikichala pa jipa 47]

Ba Maliya ne Yosefwa bafwainwa bamubujile Yesu amba ka?

[Kipikichala pa jipa 48, 49]

Ba Adama ne Evwa bakonsheshe byepi kwikala myaka ne myaka mu Paladisa?

[Kipikichala pa jipa 50]

Ñanyi walengejile muloolo amba ambenga ne Evwa?

[Bipikichala pa jipa 50]

Ki ka kyamwekejile ba Adama ne Evwa panyuma ya kusatukila Lesa?