Kitango 14

Twafwainwa Kwilekela Mambo

NANCHI kujipo muntu wakubapo kala kyatama nyi?— Byambo byanji byakukozhezhe ku muchima nyi?— Abya wafwainwa kumuba byonka byo akubile nyi?—

Bantu bamo umvwe bebakozha ku muchima, nabo babwela bauba byonkabyo. Pano bino Yesu wafunjishishe’mba, twafwainwa kwibalekelako mambo aba betulenga mambo. (Mateo 6:12) Pano ibyepi ao muntu umvwe witulenga mambo bimye byavula? Bimye binga byo twakonsha kumulekelako mambo?—

Petelo naye byo byo akebelenga kuyuka. Juba jimo waipwizhe Yesu amba: ‘Nanchi nafwainwa kumulekela mambo jitanu na jibiji nyi?’ Pano bino, kulekela mambo jitanu na jibiji kwakepa bingi. Yesu waambile’mba: ‘Wafwainwa kumulekela mambo bimye makumi atanu na abiji ne jitanu na jibiji’ umvwe awo muntu wa kulenga mambo bimye byavula.

Bino bimye byo byavulapo! Kuba twibibala nangwa kwibibalatu ne, ke ibyo nenyi? Yesu byo byo afunjishenga’mba: Kechi twafwainwa kuvuluka mambo etulenga bakwetu ne. Umvwe balomba lulekelo lwa mambo, twafwainwa kwibalekelako.

Yesu wamwesheshenga baana banji ba bwanga buneme bwa kwilekelako mambo. Panyuma ya kumukumbula Petelo, Yesu watendekele kushimikizha jishimikila ku baana banji ba bwanga. Ukeba wijiyuke nyi?—

Kwajinga mfumu umo wawamine bingi. Wajinga bingi na lusa. Wakongweshanga bakalume banji mali umvwe kebakebe bukwasho. Juba jimo uno mfumu wakebelenga’mba bakalume banji bamubwezhezhe mali o bakongwele. Kalume umo wakongwele mali afika ku 60 milyonyi ndenali bamutwajile kwi mfumu. Ano ke mali avula bingi!

Uno kalume waingijishetu mali onse a mfumu kabiji kechi wakonsheshe kwiabwezha ne. Mfumu wakambizhizhe’mba bamupoteshe. Kabiji wakambizhizhe’mba bapoteshe ne mukazhanji, baana, ne bipe byanji byonse. Mali onse bafwainwe kwiapana kwi mfumu. Nga kalume wafwainwa waumvwine byepi ku muchima?—

Walambile ku maulu a mfumu ne kumupopwela’mba: ‘Mwane bakintekele muchima, nkemubwezhezha byonsetu shata.’ Umvwe yobe wajinga mfumu, inge wamubile byepi uno kalume?— Mfumu wamubile lusa kalume wanji. Kabiji wamulekejileko mambo. Wamwambijile uno kalume amba kechi wafwainwa kumubwezhezha ano mali nangwatu kangwee ne. Kino kyafwainwa kyamuletejile bingi lusekelo uno kalume!

Nga uno yenka kalume waubile byepi? Walupukile pangye ne kutana kalume mukwabo wamukongweletu 100 ndenali. Wamukwachile pa kikolomeno kanyonge ne kunyonga, ne kumwambila’mba: ‘Mpene 100 ndenali yami yo wakongwele!’ Nanchi kino kintu kyaubilenga uno kalume ye balekejileko mambo abaya kwi mfumu kyawamine nyi?—

Kalume wakongwele 100 ndenali wajinga muyanji. Kechi wakonsheshe kubwezha aa mali ponkapotu ne. Wafukamine ku maulu a kalume mukwabo ne kumusashijila’mba: ‘Mwane bakintekele muchima, nkemubwezhezha mali enu.’ Nanchi uno kalume wafwanyijile kumutekela mukwabo muchima nyi?— Umvwe wajinga obewa, inge waubile byepi?—

Uno muntu kechi wajinga na lusa nobe mfumu ne. Aye wakebelenga mali anji ponkapotu. Mambo a kuba kalume mukwabo kechi wakonsheshe kupana mali ne, wamutayile mu kaleya. Bakalume bakwabo bamwenengako baumvwine bingi ku muchima kutama. Baubile bingi bulanda na mambo a kalume wajinga mu kaleya. Onkao mambo bakabujile mfumu byaubile uno kalume.

Mfumu naye waumvwine bingi kutama. Wamuzhingijile bingi uno kalume wabujile kulekelako mukwabo mambo. Wamwichile ne kumwambila’mba: ‘Obewa kalume watama, nanchi amiwa kechi na kulekejileko nenyi? Nanchi obewa kechi wafwainwa kumulekelako mukwenu nenyi?’

Uno kalume wabujile kulekelako mukwabo mambo wafwainwe kufunjila kwi mfumu wawama. Pano bino kechi byo byo aubile ne. Mfumu wamutayile uno kalume mu kaleya kuba’mba kana akabwezhe 60 milyonyi ndenali. Nangwa byonkabyo, amwa mukaleya kechi wakonsheshe kutana mali a kubwezha kwi mfumu ne. Ko kuba’mba wafwainwe kwikala monka kufikatu ne kimye kya lufu lwanji.

Pa kupwisha jino jishimikila, Yesu waambijile baana banji ba bwanga amba: “Mo monka mo akemubila ne Tata wa mwiulu kana ne kwibalekela balongo benu mambo abo mu michima yenu ne.”—Mateo 18:21-35.

Wafwainwa kuyuka’mba, atweba bonse tuji na bikoloto kwi Lesa. Mambo nangwatu bumi bo tuji nabo bwafuma kwi Lesa! Onkao mambo bikoloto byo tuji nabyo kwi Lesa byavula kukila byo tuji nabyo ku bantu. Bikoloto byo tuji nabyo ku bantu bijitu nobe oa mali akongwele awa kalume ku mukwabo. Bino bikoloto byetu kwi Lesa bijitu nobe 60 milyonyi ndenali yakongwele yewa kalume kwi mfumu, mambo tuba bintu byatama bingi.

Lesa uji bingi na lusa. Nangwa tuba bintu byatama, aye witulekelako mambo. Nangwa twalenga mambo, aye kechi witwipaya ne. Bino twafwainwa kuvulukanga’mba: Lesa wakonshatu kwitulekelako mambo kanatu netuwa twibalekelako aba betulenga mambo. Kyanema bingi kulekelako bakwetu mambo, ke ibyo nenyi?—

Umvwe muntu wa kutamisha pano bino walomba lulekelo lwa mambo, wafwainwa kuba byepi? Wakonsha kumulekela mambo nyi?— Pano ibyepi umvwe saka abwezhapotu? Nanchi wakonsha kumulekelako nyi?—

Umvwe yetu tubena kulomba lulekelo lwa mambo, twakonsha kumvwa bingi bulongo inge mukwetu witulekelako mambo, ke ibyo nenyi?— Netuwa byo byo twafwainwa kuba. Kechi kwambatu’mba na kulekela mambo ne, twafwainwa kumulekelako mambo kufuma panshi ya muchima wetu. Umvwe ke tube bino, tumweshatu patoka amba tukeba kwikala baana ba bwanga ba Mufunjishi Wayukisha.

Pa kuba’mba tuyuke byo kyawamina kwilekelako mambo, twaya tutange bino binembelo byaamba pa buneme bwa kwilekelako mambo, Byambo bya Mana 19:11; Mateo 6:14, 15; ne Luka 17:3, 4.

[Kipikichala pa jipa 77]

Petelo wakebelenga kuyuka ka pa mambo a kwilekelako mambo?

[Kipikichala pa jipa 78]

Ki ka kyamwekele kalume byo alombele kwi mfumu kumupako kimye kyabaya kya kubwezhezhamo mali?

[Bipikichala pa jipa 78]

Kalume wamubile byepi kalume mukwabo wakankelwe kumubwezhezha mali o akongwele?

[Kipikichala pa jipa 80]

Mfumu wamubile byepi awa kalume wabujile kulekelako mukwabo mambo?

[Kipikichala pa jipa 81]

Wafwainwa kuba byepi umvwe mukwenu walomba lulekelo lwa mambo?