Kitango 27
Lesa Obe Ñanyi?
MAMBO ka buno bwipuzho bwa kuba’mba, Lesa Obe Ñanyi? kyo bwanemena?— Mambo bantu bapopwela balesa bavula bingi. (1 Kolinda 8:5) Kimye mutumwa Paulo kyo atambwile bulume kufuma kwi Yehoba bwa kubuka muntu wabulanga kwenda, bantu baambile amba: “Balesa betwikijila ko tuji baaluka pamo nobe bantu.” Bantu bakebelenga’mba bamupopwelenga Paulo ne mulunda nanji Banabasa. Paulo bamutumbile amba Mekulyusa, Banabasa naye ja Yupita, mazhina a balesa ba bubela.
Bino Paulo ne Banabasa kechi balekele’mba bantu bebapopwelenga ne. Baswatukijile mu jibumba sa babijika’mba: ‘Alulukilai kwi Lesa mumi.’ (Byubilo 14:8-15) Ñanyi “Lesa mumi” walengele bintu byonse?— Ee, Yehoba ye “Mwine Wakila wa panopantanda ponse.” Yesu wamutelele Yehoba amba “Lesa yenka wa kine.” Onkao mambo, ñanyi ye twafwainwa kupopwela?— Yehoba yenkatu kwapwa!—Salamo 83:18; Yoano 17:3; Lumwekesho 4:11.
Bantu bavula bapopwela balesa bangi, kechi “Lesa yenka wa kine” ne. Bapopwela bintu byo balenga na bichi, mabwe, nangwa na byela. (Kulupuka 32:4-7; Bena Levi 26:1; Isaya 44:14-17) Nangwatu banabalume ne banabakazhi baya nkuwa nabo bebalula ke balesa. Nanchi kijitu bulongo kwibanemeka nyi?—
Saulo byo aikele ke mutumwa Paulo, wanembele’mba: “lesa wa panopantanda wiipofula michima ya babula kwitabila.” (2 Kolinda 4:4) Nga awe yenka lesa ye ñanyi?— Ee, Satana Diabola! Satana walengela bantu kupopwela bantu bakwabo ne bintutu bikwabo.
Satana byo akebelenga’mba Yesu amufukamine ne kumupopwela, Yesu wamukumbwile Satana amba ka?— Wakumbwile’mba: “Ukamupopwela Nkambo Lesa wobe ne kumwingijila aye yenka.” (Mateo 4:10) Yesu wamwesheshetu patoka amba Yehoba ye yenka wafwainwa kupopwelwa. Akitwaya tutange pa bansongwalume bamo bayukile kino. Mazhina abo ke ba Shadalaka, Meshaka, ne Abedenego.
Bano bansongwalume Bahebelu bajinga bena Isalela kisaka kya Lesa kabiji bajinga mu buzha mu ntanda ya Babilona. Mu Babilona mfumu Nebukaneza walengele nkishi wa ngolode. Juba jimo wakambizhe amba umvwe baimba pa byombesha, bonse bafwainwa kupona panshi ne kumulambila nkishi. Wibajimwine’mba: ‘Bonse basakubula kupona panshi ne kumupopwela basakwibataya mu kisha kya mujilo.’ Umvwe wajinga obewa, inge waubile byepi?—
Ba Shadalaka, Meshaka, ne Abedenego baubanga byonse byakambizhanga mfumu. Pano bino bakaine kupopwela nkishi. Nanchi wayuka kyo bakanyijile nyi?— Mambo mukambizho wa Lesa waambile’mba: ‘Kechi mukekale na balesa bakwabo, bakubikapo pe amiwa ne. Kechi mukesongele nkishi, nangwa kipashañano ne kwikilambila ne.’ (Kulupuka 20:3-5) Onkao mambo ba Shadalaka, Meshaka, ne Abedenego bakokejile muzhilo wa Yehoba, kechi wa mfumu ne.
Mfumu wazhingijile bingi, kabiji wibechile aba bansongwalume Bahebelu. Wibashikishe’mba: ‘Nanchi kya kine kechi mwibengijila balesa bami nenyi? Pano akye kyo kimye kyapelako. Umvwe mumvwe byombesha, mupone panshi ne kupopwela nkishi ye nalenga. Inge mukane, musakutaiwa mu kisha kya mujilo; kabiji ñanyi lesa wakonsha kwimupokolola mu maboko ami?’
Bano bansongwalume baubilepo byepi? Umvwe wajinga obewa, inge waubile byepi?— Bamukumbwile mfumu amba: ‘Lesa wetu ye twingijila usa kwitupokolola. Bino nangwa wabula kwitupokolola, atweba kechi tusa kwibengijila balesa benu ne. Kechi tusa kumupopwela awa nkishi wa ngolode ne.’
Mfumu waubile bingi bukaji. Wakambizhe amba: ‘Kitwishai kyuya kisha kya mujilo kukila pa jitanu na jibiji pa byo mukelwa kuba.’ Kabiji wakambizhe ne babiyangala banji amba bakasai ba Shadalaka, Meshaka, ne Abedenego mwibataye mu kisha kya mujilo! Kisha kya mujilo kyakabile bingi kya kuba’mba babiyangala ba mfumu bapile na lubebe lwa mujilo! Nga aba Bahebelu basatu ki ka kibamwekejile?
Ba Shadalaka, Meshaka, ne Abedenego bakaponejiletu monka mu kisha kya mujilo. Pano bino banyamukilepo! Kechi bekozhezhe ne. Kabiji bakasulukile. Ki ka kyalengejile kino kubiwa?— Mfumu watajile mu kisha kya mujilo, kabiji byo amwene byamuletejile moyo. Waipwizhe’mba: ‘Nanchi kechi twajikutayamo bantu basatu mu mujilo nenyi?’ Bakalume banji bamukumbwile amba: “Ee mwane, kya kine, bamfumu.”
Mfumu waambile amba: ‘Bino namonamo bantu bana babena kupitañana mukachi ka mujilo, kabiji kechi bapya ne.’ Nanchi awa muntu wa buna wamuyuka nyi?— Wajinga malaika wa Yehoba! Wibazhikijile Bahebelu basatu kuba’mba babule kwibakozha.
Mfumu byo amwene kino, wafwenyenye kwipi na kibelo kya kisha kya mujilo ne kwamba’mba: “Anweba ba Shadalaka ne Meshaka ne Abedenego, bakalume ba Lesa Mwine Wakila, fumaimo, iyai kuno.” Byo bafuminemo, bonse bamwene’mba kechi bapya ne. Kechi banunkilenga nangwa mubabo ne. Kabiji mfumu waambile’mba: ‘Atotwe Lesa wa ba Shadalaka ne Meshaka ne Abedenego, yenka watuma malaika wanji ne kupokolola bakalume banji mambo kechi bapopwela balesa bangi ne, kana yenka Lesa wabo.’—Danyela, kitango 3.
Twakonsha kufunjilako ku byaubiwe kala. Nangwatu ano moba bantu balenga bipashañano nangwa bankishi ne kwibipopwela. Buku umo washimuna’mba: “Byonka biji musalabu, mbandela nayo yazhila.” (The Encyclopedia Americana) Bipashañano byakonsha kulengwa na bichi, mabwe, byela, nangwa bisapi. Baana ba bwanga batanshi ba kwa Yesu kechi bapopwelanga mfumu wa Loma ne, mambo ne shayuka wa mpito aye Daniel P. Mannix waambile amba, kuba bino popamotu ne “kukana kupana mushingi ku mbandela nangwa kwamba byambo bya luchipo ku kafulumende.”
Onkao mambo, nanchi kyawama kumupopwela Lesa kwingijisha bipashañano byalengwa na kisapi, bichi, mabwe nangwa byela nyi?— Nanchi kyawama kalume wa Yehoba kupopwela bino bipashañano nyi?— Ba Shadalaka, Meshaka, ne Abedenego bakaine kuba bino, kabiji Yehoba waumvwine bingi bulongo. Nga obewa wakonsha kulonda byepi kya kumwenako kyabo?—
Aba bengijila Yehoba kechi bafwainwa kupopwela muntu nangwa kintu kiji kyonse ne. Tanga bino binembelo byaamba pa kino: Yoshua 24:14, 15, 19-22; Isaya 42:8; 1 Yoano 5:21; ne Lumwekesho 19:10.
[Kipikichala pa jipa 143]
Mambo ka ba Paulo ne Banabasa o bakanyijile kwibapopwela ku bantu?
[Kipikichala pa jipa 144]
Mambo ka bano banabalume o bakanyijile kupopwela nkishi?
[Kipikichala pa jipa 145]
Yehoba wapokolwele byepi bakalume banji mu kisha kya mujilo?
[Bipikichala pa jipa 146]
Ano moba bantu banemeka ñanyi bintu?