Ntanda Ipya Monka Mwayila Mulaye Wa Lesa

BAIBOLO, Mambo anembwa a Lesa, etupa luketekelo byoamba’mba: “Monka mwayila mulaye wanji tutengela bya mwiulu bipya ne ntanda ipya, mo bwaikala bololoke.”—2 Petelo 3:13.

Nanchi ‘jiulu jipya’ jo ji ka? Baibolo yesakanya jiulu na bukalama. (Byubilo 7:49) ‘Jiulu jipya’ ke kafulumende mupya ukalama ntanda. Utelwa kuba’mba mupya mambo ukafumyapo bukalama bujipo luno; kabiji ke jishinda jipya ja kupwishishamo pachepache nkebelo ya Lesa. Ke Bufumu Yesu boetufunjishe kulomba. (Mateo 6:10) Lesa byo aji Nsulo ya uno kafulumende ne kwikala wikala mwiulu, butelwa’mba “bufumu bwa mwiulu.”—Mateo 7:21.

Nga “ntanda ipya” yo i ka? Kechi pulaneti wa katataka ne, mambo Baibolo wamweshatu patoka kuba’mba bantu bakekala mu ntanda myaka ne myaka. “Ntanda ipya” ke bwikalo bupya bwa bantu. Ikekala ipya mambo babi bakebafumyamo. (Byambo bya Mana 2:21, 22) Bonse bakekalangamo, bakanemeka ne kukokela Mulenga kabiji ne kwikela monka mwayila mikambizho yanji. (Masalamo 22:27) Bantu ba mu mikoka yonse baitwa kwiya na kufunda yoyo mikambizho kabiji ne kwikala bwikalo bwa mwayila ino mizhilo lonka luno. Nanchi byobyo mubena kuba nyi?

Mu ntanda ipya ya Lesa, bonse bakanemeka bukalama Bwanji. Nanchi butemwe bwa kutemwa Lesa bwimulengela kumukokela nyi? (1 Yoano 5:3) Nanchi mukokela mikambizho ya Lesa mu nzubo yenu, ku nkito nangwa kusukulu, ne mu jishinda jo mwingijishishamo bumi bwenu nyi?

Mu ntanda ipya, bantu bakakwatankana mu kupopwela Lesa wa kine. Nanchi mupopwela Mulenga walengele jiulu ne ntanda nyi? Nanchi mpopwelo yenu kine imukwatankanya pamo na bakwenu bapopweshi ba mu mikoka yonse, mitundu yonse, ne njimi yonse nyi?—Masalamo 86:9, 10; Isaya 2:2-4; Zefwaniya 3:9.

[Kitenguluzha pa peja 17]

Lesa Walaya Bino Bintu

Lesa walaya bino bintu, ye Mulenga wa jiulu ne ntanda. Yeye batelele kwi Yesu Kilishitu amba “Lesa yenka wa kine.”—Yoano 17:3.

Bantu bavula banemeka tubalesa twabo to belengela abo bene. Bavula bafukamina bimpashañano byabulapotu nangwa bumi ne. Bakwabo nabo batumbijikako maana a bantu, bya ku mubiji, butemwamaana, nangwa milanguluko yabo bene. Nangwatu aba bamba’mba batanga Baibolo kechi bonse banemeka jizhina ja muntu watongolwa mu Baibolo amba “Lesa wa kine” ne.—Mpitulukilo ya mu mizhilo 4:35.

Aye mwine, Mulenga waamba’mba: ‘Amiwa ne Yehoba. Ajo jo jizhina jami.’ (Isaya 42:5, 8) Jino jizhina jitanwamo bimye nobe 7,000 mu Baibolo mu milaka itanshi mo yanembejilwe. Yesu Kilishitu wafunjishe baana banji ba bwanga kulomba’mba: “Tata wetu wa mwiulu, Jizhina jenu jizhile.”—Mateo 6:9.

Byubilo bya mutundu ka Lesa wa kine byo aji nabyo? Aye mwine wilumbulula kuba’mba ye “wa lusa ne wa bibusa, ubanda kuzhingila, wayula na butemwe bubula kwaluka ne bukishinka” kabiji kechi wibalekatu bantu balala mikambizho yanji kyanshiji kwa kubula kwibakabisha ne. (Kulupuka 34:6, 7) Mpito ya byo aingijilenga na bantu imwesha bukine bwa ino ndumbulwilo.

Jizhina ne muntu mwine mwinajo byafwainwa kuzhijikwa. Byo aji Mulenga kabiji Nkambo wa Bilengwa byonse, twafwainwa kumukokela ne kumupopwela. Nanchi anweba bunke bwenu mu mukokela ne kumupopwela nyi?

[Kitenguluzha/Kipikichala pa peja 18]

‘Jiulu Jipya ne Ntanda Ipya’ Bikaleta Ñanyi Lupimpu?

Ntanda ikekala Paladisa Luka 23:43

Mingilo ileta lusekelo, kajo kavula Isaya 25:6; 65:17, 21-23

[Kitenguluzha/Bipikichala pa peja 19]

Nanchi Mukamwenamo Nyi?

Lesa kuba wabepa ne!—Titusa 1:2.

Yehoba waamba’mba: “Byambo byami . . . kechi bikabwelatu byatu kwi amiwa ne, poso kuba kyonkakya kyo nafukula, ne kulumbulukila mu kyonkakya kintu kyo nebitumijile.”—Isaya 55:11.

Yehoba watatulako kala kulenga ‘jiulu jipya ne ntanda ipya.’ Kafulumende wa mwiulu watatulako kala kwingila. Kitendekesho kya “ntanda ipya” kyaajilwa kala jimo.

Panyuma ya kumwesha mingilo imo ya kukumya ayo ‘jiulu jipya ne ntanda ipya’ joikaletela bantu, Lumwekesho waambile byambo bya mwine Lesa, Nkambo wa Bilengwa byonse, amba: “Tala naalula bintu byonse ke bipya.” Kabiji wanungilepo’mba: “Nemba: mambo bino byambo byo bya kishinka ne bya kine.”—Lumwekesho 21:1, 5.

Pano jipuzho janema ke ja kuba’mba, nanchi tubena kuba lupimpu lwafwainwa pa kuba’mba tukekale bafwainwa kwikala mu “ntanda ipya” ikatangijilwanga na ‘jiulu jipya’ nyi?